Daily news
Сириските бунтовници го напуштија Дамаск
Во Дамаск започна првата евакуација на бунтовници од започнувањето на конфликтот во 2011 година, објави државната телевизија во Сирија. Бунтовниците и нивните семејства почнаа да ја напуштаат Барзех, област во северниот дел на градот, на патот кон северниот дел на земјата. Евакуацијата ќе трае пет дена.
Договорот за евакуација е продолжение на договорот меѓу Русија, Турција и Иран за формирање на безбедносни зони за цивилите, а стапи во сила во саботата во четири области во Сирија, но не и во главниот град Дамаск.
Сириската телевизија не го прецизираше бројот на бунтовниците кои го напуштаат градот, но Сириската опсерваторија за човекови права (SOHR) оценува дека од Дамаск ќе заминат околу 1.500 војници и членови на нивните семејства на нивниот пат кон провинцијата Идлеб во северозападниот дел, кој е во рацете на бунтовниците и џихадистите.
Поголемиот дел од Дамаск е под контрола на сирискиот режим,освен шест населби.Сирискиот претседател Башар ал-Асад се залага за вакви евакуации, како дел од “помирувачки договори“, со бунтовниците кои се подготвени да го предадат оружјето како начин да се намали крвопролевањето во Сирија./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
