Поранешната директорка на Домот за деца без родители „11 Октомври“ Ристенка Атанасова во реакција за сторијата на „Макфакс“ за неоправданите трошоци, наведува дека сметката за алкохол направена за време на зимувањето на штитениците во ски-центарот на Попова Шапка е почастување на директори кои дале попуст за хотелското сместување на децата.

За сметката која беше јавно објавена за скапите часовници, Атанасова вели дека е направена за набавка на пет часовници за пет матуранти како подарок од установата и не е помината од магацин бидејќи им е директно подарено на децата.

За повисоките телефонски сметки, Атанасова вели дека се случувале само кога била на службено патување во странство и морала да бидам достапна во секое време и информирана за сè што се одвива во установата, а паркингот на службеното возило е платен од телефон за кое МТСП не ѝ дал посебна субвеција.

„Скапиот телефонски апарат е земен како субвенција од владата на Република Македонија и се отплаќа месечно на договор, а не е земен од други средства. Во моите мандати сум додавала дополнителни часови кога сум останувала на работа повеќе од работното време и во празниците и тоа е законски“, вели Атанасова по објавување на истражувачката сторија на „Макфакс“ – „Каде завршувале парите од донации во Домот за деца без родители „11 Октомври“?“.

Атанасова вели дека за сите донации во Домот се склучува договор за донација, но не се склучува ако донаторот не сака да склучи бидејќи тоа е негово право.

„Пред моето прво вработување во установата паричните донации се примале во неограничен износ во кеш. Првата работа што јас како нов директор ја воведов беше донациите над 6.000 денари да бидат уплатени на донаторска сметка која ја раководеше МТСП, а тие донации под 6.000 денари се примаа во кеш, за сите донации постои документ за што се наменети и потрошени секогаш за децата. Секој донатор добива потврда за што е употребена неговата донација. Сите донации и мали и големи се пријавуваа во МТСП. Јас како директор на установата неможев да имам никаков пристап до тие средства без истите да бидат одобрени најпрво од МТСП“, вели Атанасова.

Таа вели дека кога дошла на директорското место, условите во Домот биле на најниско ниво. Таа, како што вели, ги реновирала сите тоалети, се направиле нови кујни, се ставиле нови прозори, се реновирала фасадата и сите подови, биле поставени нови машини за перење во сите тоалети, се набавиле ЛЦД телевизори, се обновиле душеците и креветите, се вовело Wi-Fi, и биле донесени таблети и лап-топи.

Таа појаснува дека кога стапила на функција се зголемил џепарлакот на сите деца од 900 на 2.000 денари месечно.

„Податокот дека МТСП дале 500.000 денари за реновирање е лажен. Во годишниот буџет министерството одобрува само 120.000 денари за реновирање и истите се искористени за реновирање и санирање на установата. Донаторските средства не смеат да се трошат за санирање бидејќи донаторите наменски ги даваа средствата и на мое барање да помогнат за санирањето реагираа дека тоа е работа на државата“, вели Атанасова.

Таа вели дека за време на нејзините службени патувања како самохран родител немала каде да го остави детето и затоа го земала со себе, но за тоа плаќала од сопствени средства.

Во врска со отпуштањето на самохрана мајка, Атанасова појаснува дека таа била ангажирана под договор за дело и кога се отворил јавен конкурс, комисијата избрала нов кандидат, а таа си нашла вработување во Министерството за образование и наука.

„Јас немав никаква улога во изборот на кандидат“, тврди Атанасова.

Екс-директорката вели дека должност на установата „11 Октомври“ е да му овозможи на секое полнолетно дете превоз за да може да гласа на избирачкото место кое му стои во личната документација.

„Јас како директор тоа го направив кога разговарав телефонски со многу организатори на изборите бидејќи установата е исто така и избирачко место, јас не делував на децата во врска со нивното гласање бидејќи тоа е нивно право“, вели Атанасова.

Таа вели дека пред да дојде министерката Фросина Ременска на функција, во Домот имало три финансиски ревизии на кои не била најдена никаква нерегуларност и повеќе санитарнии инспекции во кои сè што недостигало е санирано.

За стаклената градина во дворот на установата, вели дека е донација од Охридска Банка која сама си нашла изведувач и самата одлучила што да прави со средствата со кои, како што вели, таа немала никаков допир.