Daily news
(ВИДЕО) Боки 13: Порано бев понижуван, сега ќе се борам за еднакво општество
Досегашниот претседател на Меѓународниот сојуз за цивилно општество-Скопје ја предаде функцијата на новоизбраниот претседател, Бојан Јовановски. На седницата присуствуваа пратеничката од СДСМ, Фросина Ременски, заедно со пратеникот Стефан Богоев, амбасадорот Чарлс Гарет, водителките Лила Филиповска и Јована Стојменовиќ, заедно со видни јавни личности.
„Ја имам честа да зборувам за нешто друго. Врз основа на неговата биографија, 52 делегати го избраа Бојан Јовановски за претседател на Меѓународниот сојуз. Нашата мисија е дека на секого треба да му се даде шанса”, рече Јасна Мандиќ.
Новиот претседател Бојан Јовановски кажа дека од понеделник вратите на Сојузот ќе бидат отворени за сите. Тој испрати порака до сите политичари да ги тргнат суетите на страна и да соработуваат со овој Меѓународен сојуз.
“Меѓународниот сојуз има мисија која е за доброто на секој граѓанин. Неколку пати имам кажано дека сакам да живееме во општество еднакво за сите, различно од другите, општество во ЕУ и НАТО. Програмата е доставена и наскоро ќе се гласа. Очекувам поддршка од цела јавност бидејќи таа е многу важна. Низ годините се трудам да бидам целосно искрен, иако тоа многупати било контрапродуктивно. Мене ме понижуваа многупати, а денес тој истиот стои исправен пред вас и ќе се бори против тоа. Не се богати оние кои имаат финансиски средства туку оние кои ќе знаат да ги поделат”, вели Бојан Јовановски.
Меѓу членовите на Собранието се и видни личности од јавниот живот, меѓу кои новинари и музичари. Првиот почесен член е амбасадорот Чарлс Гарет, а по него екс-министерката Илинка Митрева. По нив се впишуваат и имињата на Јованка Кухар, Сашко Коцев, Жарко Димитриевски, Лила Филиповска, Коста Костадиновски, Иџет Мемети. Почесниот амбасадор на Македонија во странство ќе биде Владо Илиевски.
„Голема е честа да бидам амбасадор на Сојуз кој треба да го поттикне родољубието. Да се бориме за права, да работиме на тоа да нема отфрлени, ниту гладни. Затоа јас ќе помагам на сите, без никакви поделби. Знам од прва рака за какви предизвици станува збор и секоја ранлива категорија треба да добие помош. Ова ќе биде процес каде некои работи ќе се решаваат брзо, а за некои ќе треба време. Верувам дека овој Сојуз ќе донесе многу насмевки кај секого”, рече новиот амбасадор Владо Илиевски.
Јовановски повторно истакна дека финансиската добивка како претседател ќе ја донира секаде каде што е потребно. Првиот проект на Меѓународниот сојуз е „Стоп за деца на улица”, со изградба на центар за заштита. За почесен претседател на овој сојуз е избрана екс-министерката за труд и социјална политика, Фросина Ременски.
„Ретко драго признание и драга чест. Ова е поголемо признание од сите кои сум ги добила досега. Не сакам да биде клише, но навистина сум без зборови бидејќи доцна ја примив оваа вест. Во периодот кога бев министерка, во тоа Министерство го добив моето карактерно изменување. За жал, има многу граѓани кои не можат да им овозможат на своите деца топол оброк. Ние со Бојан утврдивме дека институциите не можеа да помогнат на овие луѓе, туку граѓаните беа тие кои беа хумани. Тогаш си дадов задача дека тоа ќе престане и дека државата ќе биде таа што ќе помогне. Кога соработувавме со Јовановски, увидовме дека треба да помогнеме на општеството бидејќи треба да ја видиме насмевката кај сите деца кои насекаде ги гледаме. Стапката на сиромаштија е огромна, а заедно треба да работиме ова да се подобри и да не очекуваме само Владата да се справува со ова”, вели почесната претседателка на Сојузот, Фросина Ременски.
Таа спомена неколку примери каде институциите останале неми на апелите за помош од страна на поединци, додајќи дека сите деца треба нормално да живеат. За Ременски не е сфатливо да се зборува за малолетнички затвори туку за градинки и едукативни центри. Народниот правобранител на Република Македонија, Изет Меџити, вели дека институциите треба да ги отворат вратите за Сојузот и народниот правобранител.
„Институцијата која е заштита на човековите слободи и права поминала низ многу предизвици. Верувам дека ќе успееме во оваа цел. Во последно време различностите во општеството ги сфаќаме како проблем, а не како придобивка. Мора ова да го промениме. Ние како институција имаме правено многу истражувања, ама тоа не се ефектуира. Денес гледам дека добиваме уште еден сојузник со кој можеме заедно да направиме повеќе. Во последните години сум разочаран бидејќи работам а немам успеси. Ова верувам дека ќе се промени во иднина со помош на соработка и комуникација“, вели Иџет Мемети.
Ова Здружение ќе делува во Македонија и надвор од неа, преку проекти, а согласно Уставот и законите задржувајќи ги европските стандарди.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.