Daily news
(Видео) Ќе добие ли ВМРО-ДПМНЕ лидер независен од Груевски?!
По најавената оставка од функцијата претседател на ВМРО-ДПМНЕ, според Статутот на партијата, Централниот комитет треба да закаже седница и да почне процедура за вонреден конгрес, кој треба да се одржи на 23 декември.
Паралелно со оставката на Груевски во јавноста веќе се споменуваат имиња што би можеле да го заменат Груевски. Некои од нив се генералниот секретар Христијан Мицкоски, Илија Димовски, Антонио Милошоски, Никола Поповски, сите тројца членови на Извршниот комитет на партијата. За универзитетскиот професор Јове Кекеновски, вонредниот конгрес што го најавува Груевски и лицата што се споменуваат за нов лидер не се среќно решение за ВМРО-ДПМНЕ затоа што тоа се луѓе блиски до Груевски преку кои тој би бил лидер во сенка.
„Намерата на Груевски ниту е фер ниту чесна. За старите вмровци, организирањето ваков конгрес е неприфатливо. На партијата не ѝ треба лидер што е близок до Груевски, тој нема да донесе промени во партијата. Ваков конгрес не е демократски, тој ја отсликува скриената намера на Груевски за владеење со партијата“, рече Кекеновски за „Макфакс“.
Централниот комитет има речиси 130 члена и во него се претставниците на општинските комитети, Извршниот одбор, раководството и други партиски тела. Статутот на партијата предвидува одлуката за одржување вонреден конгрес да се донесе со половина од вкупниот број членови. За професорот и аналитичар Ненад Новковски, кој е и еден од најстарите членови на ВМРО-ДПМНЕ, комитетот ќе се состане во формална смисла и ќе ја донесе оваа одлука, но таа ќе биде во интерес само на старото раководство. Според него, членовите на Извршниот и на Централниот комитет треба да си дадат оставки заедно со Груевски.
„Промени може да има доколку старото раковдство се повлече од партијата. Во една демократска држава тоа е сосема нормално. Ние постарите членови можеме да поверуваме во намерата само доколку сите членови на ИК си поднесат оставки заедно со претседателот на партијата. Тогаш ќе бидеме сигурни дека никој од овие лица нема да биде на чело на партијата“, изјави Новковски за „Макфакс“.
Според аналитичарот Кекеновски, вистинска промена во партијата би се случила доколку се изберат нови органи, кои би имале доволно време да организираат демократски избор на нов лидер.
„За да се избере нов лидер, потребна е цела постапка со нови тела и нови органи со распишување транспарентен оглас за пријавување кандидати. Таа постапка не треба да се одвива набрзина како што сега тоа сакаат да го направат Груевски и неговата дружина“, изјави Кекеновски.
Неколку месеци смена, односно демкратски избор на највисоките тела на партијата, бараат и иницијаторите за реформи во ВМРО-ДПМНЕ. Воедно, реформаторите бараа промена на Статутот на партијата, оставка од Груевски и формирање управувачки комитет како привремено тело со рок до кога би се спровеле внатрепартиски реформи. По ова, би требало да се одржи конгрес, кој би бил демократски и прифатлив за најголемиот број членови.
Со слични ставови, кои се приклучија на оваа иницијатива, беа и истакнати членови на ВМРО-ДПМНЕ, кои јавно повикаа на т.н. процес на дегруевизација.
Подемократска ВМРО-ДПМНЕ очекуваат и ветераните, кои, покрај оставка, побараа и распуштање на сегашниот состав на Извршниот и на Централниот комитет.
Инаку, последниот конгрес на ВМРО-ДПМНЕ се одржа во мај 2015 година во Куманово. Тогаш Груевски како премиер и претседател на партијата беше единствениот кандидат за претседателската позиција и го поддржаа 538 од 560 присутни делегати.
За да биде веродостоен најавениот конгрес кон крајот на декември, треба да присуствуваат најмалку 250 делегати.
Г.Д.М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.