Daily news
(Видео) Владиката Петар ѝ измислил непостојна болест на шумата што сака да ја сече, жителите велат сака да профитира
Не постои канадска болест поради која владиката Петар сака да ја сече шумата во ресенското село Јанковец, тврди Шумарскиот факултет. Деканот, проф. Кирил Сотировски, фитопатолог, тврди дека Факултетот не добил барање за испитување на здравствената состојба на шумата. Преспанско-пелагониската епархија планира да продава дрвја од шумата во ресенското село Јанковец за да обезбеди пари за изградба на нова црква. Жителите на селото се против сечата бидејќи сметаат дека дрвјата им се заштита од поплави. Шумата е сопственост на МПЦ, а првото нивно барање било соголување на шумата, но коаг тој план не поминал кај надлежните институции, професори од Факултетот за шумарство изготвиле нов, со кој е предвидено да се исече дел од шумата. Но, жителите не го прифаќаат ниту ова решение.
„Не е добро шумата да ја исечат дивокрадци. Нивна должност беше, ако навистина се загрижени, да исечат 30 отсто од шумата. Жалиме што од нивна страна нема ниту малку разбирање дека манастирската црква е во лоша состојба и се урива. Треба да се оцени дали шумата да ја досечат дрвокрадци или да се направи планско проретчување или, пак, да се исече тоа што не може да опстане, но да не е катастрофално за шумата, со цел таа да се обнови, а не да пропадне целосно, па да останеме и без шума и без црква“, вели владиката Петар, кој додава дека не постои опасност за мештаните.
Владиката Петар, меѓу другото, сечата ја оправдува и поради болеста што тврди дека ја имаат дрвјата.
„Треба да се исече плански и во согласност со законот за да се обнови. Голем дел е заболен од т.н. канадска болест, а станува збор за паразити што ја напаѓаат шумата и ја сушат“, вели владиката Петар.
Професорот Сотировски за „Макфакс“ тврди дека не постои т.н. канадска болест.
„Тука морам да бидам јасен и дециден. Ниту во шумарската, ниту во поспецифичната фитопатолошка пракса не постои т.н. канадска болест. Морам да кажам дека сум истовремено и изненаден, но и револтиран затоа што толку лесно се пласираат многу помпезни термини и во најмала рака сомнителни оценки за одредени состојби, дури и кога се работи за високоспецијализирани работи, како здравјето на шумите, кои само мала група експерти може да ги знаат. Спомнувањето канадска болест и нарушена здравствена состојба на шумата за да се оправдаат интервенциите во неа, кога не би имало многу посериозни импликации, би било гротескно смешно, но во овој случај е прилично сериозно“, вели деканот Сотировски.
Тој смета дека што побргу општеството и стручњаците од областа на шумарството мора да сфатат дека шумите не се само ресурс за дрво и остварување брз профит, туку многу побитен ресурс, со големи влијанија.
Манастирскиот комплекс се состои од два објекта. Едниот е новоизграден, а другиот, според планот на МПЦ, треба да се урне и повторно да се изгради поради неговата дотрајаност.
Кире Диновски, жител на Јанковец, тврди дека планот на МПЦ е профитерски. Жителите тврдат дека може да ги соберат парите за реизградба на црквата, без да се продава шумата.
„Манастирот не го посетуваат голем број верници секојдневно, која е потребата од тоа да го рушиме стариот манастирски храм и да градиме нов? Ние сечеме шума од милион евра, не од сто илјади евра, туку од милион? Некој сака да профитира од ова“, вели Диновски.
„Ние имаме деца во странство. Можеме да ги собереме тие пари. Ќе донираат, како што донираа за горниот манастир. Не даваме да се сече шумата од еколошки причини. Јас секогаш велам – да ги спречиме причините за да не ги лечиме последиците“, вели Златка Божиновска, жител на с. Јанковец.
Здружението „Екогерила“- Преспа, кое е против сечата, вели дека последиците ќе бидат мошне сериозни доколку шумата биде уништена.
„Овој предел е ерозивно земјиште, со самиот порој што би се јавил и со тоа што шумата би била обезличена не би можела да ја оствари својата заштитна функција. Вечна шума е онаа што има дрвја од разни возрасти, но проретчувањето треба да биде строго контролирано, направено врз основа на елаборат кој е издржан“, вели Билјана Нечовска-Стефковска од „Екогерила“ – Преспа.
Министерството за земјоделство, шумарство и водостопанство не одговори на прашањата од „Макфакс“ за тоа дали сечата е со одобрение и за колкава површина станува збор.
Кристијан Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.