Daily news
(Видео) Кривична пријава за директорот на „Фени“, Јусуф Миракхмедов, и од Финансиска полиција
Управата за финансиска полиција денес поднесе кривична пријава против генералниот извршен директор на „Фени индустри“, Јусуф Миракхмедов, за злоупотреба на службена должност и овластување. Во двонеделната истрага на документацијата во „Фени“ Финансиската полиција утврдила дека директорот незаконски отуѓувал залихи на фероникел и друга руда од фабриката врз кои банките имале заложно право.
„Спротивно на склучените договори за кредитирање и нотарските акти со Стопанска банка и со Комерцијална банка за воспоставено заложно право на подвижни ствари, фероникел и други производи, директорот самоволно носел одлуки за нивно отуѓување. Со тоа нанел штета од 1.809.617.164,00 денари. Одлуките за отуѓување ги носел без согласност од банките кои имале заложно право и на директен начин им предизвикал штета. Поради тоа веќе поднесовме кривична пријава во Основното јавно обвинителство во Велес“, вели директорот на Управата за финансиска полиција, Арафат Муареми.
Истрагата во „Фени“ не е завршена. Дополнително се испитува работењето во фабриката пред август, годинава, и не е исклучена можноста за нови кривични пријави против раководните лица.
Според сознанијата на Финансиската полиција, Јусуф Миракхмедов ја напуштил Македонија на 29 октомври од аеродромот „Александар Велики“. Директорот Муареми очекува јавното обвинителство да побара меѓународна соработка за наоѓање на директорот Миракхмедов. Тој е по потекло од Киргистан, но има холандско државјанство, а кај нас имал дозвола за времен престој.
Неофицијално продажбата на залихите во фабриката се одвивале преку „Кунико маркетинг“, фирма регистрирана во Дубаи, која е дел од корпорацијата „Кунико ресорсис“, а купувачи биле меѓународни компании.
Освен продажбата, директорот правел и отписи на долгови на должниците на „Фени“. Вработени во фабриката посочуваат дека директорот Миракхмедов во 2016 година, повторно самоволно, направил отпис на побарувања на фабриката во износ од 50 милиони евра. На компании кои купиле фероникел од „Фени“, но не го платиле, Миракхмедов, според вработените, им го отпишал долгот.
Финансиската полиција најави дека ќе ги испита сите тврдења на вработените и ќе реагира на секоја дојава.
За работењето на „Нова логистик“, фирма ќерка на „Фени“ која била приватизирана, „Ролис“ исто така дел од „Фени“ и за бугарски „Екекод“, компанија заинтересирана да го купи комбинатот, предмети отворило и Јавното обвинителство за гонење организиран криминал.
Вчера против директорот Миракхмедов и против раководството на „Фени“ кривични пријави поднесе БСГР малцинскиот партнер во сопствеништвото на „Фени“.
Банките иницираа поведување стечајна постапка за фабриката поради истечените рокови за отплата на кредитите. Рочиштето на кое ќе се одлучува дали ќе се отвори стечајна постапка за „Фени“ е закажано за 13 ноемри во Основниот суд во Велес. До тогаш, банките најавија дека се отворени за раговори со заинтересирани инвеститори кои ќе можат да ја преземат фабриката, да овозможат да продолжи производството и да го сервисираат долгот кој само кон банките изнесува 40 милиони евра.
Во меѓувреме во Централниот регистар сменето е раководството на фабриката и како директор е заведен Рајчо Кацаров, кој е извршен директор на бугарски „Енекод“, фирма која имаше неуспешни преговори со банките за купување на фабриката, а тргнато е името на Јусуф Миракхмедов.
М.И.П.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.