Daily news
ВМРО-ДПМНЕ бара посериозен одговор од власта кон еколошките „бомби“ во земјата
ВМРО-ДПМНЕ ја обвини Владата за несериозност во решавањето на проблемот со депонијата во Струга, како и за други „еколошки бомби„ во државата.
„Несовесниот и неодговорниот однос на Владата на СДС во делот на животната средина, имаме можност секодневно да гледаме, но и оправдано да стравуваме од еколошките бомби кои се појавуваат насекаде околу нас.Наместо да имаме активност на решавање на проблемите, пред нас има ретроградни процеси и импровизаторски активности.
Владата на СДС со месеци и со сите владини функционери испратени во Струга не може да изгаси една депонија која и ден денес го труе народот во Струга и во целиот регион. Оваа екоклошка катастрофа предизвикува огромна штета пред се врз здравјето на граѓаните, врз животната средина меѓутиа ја уништува и туристичката сезона во овој регион. И сега после сите штети кои настанаа најавуваат наводно итно решавање на проблемот. СДС остана глува на барањето на граѓаните во Струга заедно со здруженијата за заштита на животната средина од овој град, кои преточено во амандман кој се однесуваше на ребалансот на буџет, да се санира и конечно реши овој проблем.
Тоа го покажа целото лицемерие, негрижа и неодговорност во нивната работа. СДС подеднакво несериозно пристапува и кон решавањето на дивите депонии кои се појавуваат и во Куманово, и во Струмица и во Тетово кои исто така претставуваат сериозна еколошка темпирана бомба можеме да претпоставиме какви се последци може да предизвикаат доколку им се случи пожар како што е овој во Струга.
Владата на СДС не само што не предвидува дополнителни средства за решавање на овие проблеми кои ги имаат општините, туку напротив и ги крати. Ова е стратешка и институционална грешка, која може да има далекусежни последици. Впрочем како поинаку да се толкува одлуката на Владата на СДС која скрати неколку милиони евра во планираниот ребаланс на Буџетот за 2017 во делот за заштита на животната средина.
Ова само укажува каков ќе биде односот на СДС кон оваа проблематика од исклучителна важност за квалитетот на живот и здравјето на луѓето. Тие како и во други области и во областа на заштитата на животната средина и природата, само ја потврдуваат нивната добро позната пракса, додека се опозиција знаат да бидат лицемерни, загрижени и да ветуваат, а кога доаѓаат на власт го покажуваат целото свое неработење, неспособност и индиферентност кон барањата и потребите на граѓаните“, изјави Марјан Додовски од оваа партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.