Daily news
Главната причина за рак, инфаркт и астма се наоѓа во вашиот дом
Научниците предупредуваат дека секојдневните домашни работи или нивното избегнување значително можат да го нарушат здравјето на целото семејство!
На пример, активностите како перење и готвење неизбежно го менуваат воздухот кој го вдишувате во домот – користењето на хемикалии при бришење на подовите или прозорците испушта и до 900 видови токсични материи во воздухот! Исто така, во вашиот семеен дом во аглите се кријат мувла, полен, како и јаглерод моноксид кои ги донесувате на облеката, валканите сунѓери, шпоретите на плин, па е подобро да се преориентирате на домашни производи.
Најсилната врска со лошиот квалитет на воздухот во домот научниците ја пронашле со срцевите заболувања, рак на белите дробови и развојот на астма.
Симптоми кои укажуваат на загадување на воздухот во вашиот дом:
Кашлање, солзење на очите, вртоглавица, замор и главоболка се некои од поблагите знаци дека во вашиот дом воздухот е загаден. Но, можат да се појават и посилни симптоми како иритација на очите, осип, болка во мускулите, проблеми со дишењето, температура и чувство на студ.
За среќа, со следните совети можете значително да го намалите внесот на штетни честици, материи и микроорганизми во вашиот дом и така да избегнете опасни болести!
Совети кои можат да ви помогнат и кои треба да почнете да ги применувате веднаш
1. Водете сметка секој ден да ја проветрувате секоја просторија во домот.
2. Користете еколошки производи за чистење – во нив има помалку токсини и загадувачи, па поради тоа и воздухот ќе биде посвеж и почист.
3. Наместо дезедоранс во лимено шише, користете рол-он во пластична кутија.
4. После користењето, како и во текот на ноќта, исклучете ги од струја сите уреди кои не мора постојано да бидат уклучени како полначите кога уредите се полни – ќе имате двојна добивка: и почист воздух и помала сметка за струја!
5. На теписоните се собираат габи, грини, прав, влакна од домашните миленичиња и уште многу штетни честички, па подобро е да се одлучите за дрвен под и домашни влечки.
6. Никогаш дома немојте да влегувате облечени, бидејќи чевлите на себе носат многу загадувачи, нечистотии и земја, која така ќе ја разнесете по целиот дом, а подоцна неминовно ќе дојдете во контакт со неа.
7. Потрудете се облеката да ја сушите надвор на свеж воздух, а доколку немате можност за тоа, што почесто отворајте ги прозорците.
8. Редовно менувајте ги завесите на кадата и обрнете внимание да не бидат од винил – овој материјал ја задржува водата, па на него мувлата се развива со брзина на светлината.
Црна статистика
Се проценува дека непроветрениот стан и загадениот воздух во домот е број еден причинител за развој на болести во Европа. Научниците откриле изненадувачка поврзаност помеѓу изложеноста на загадувачи во затворените простории и кардиоваскуларните болести, а мноу истражувања потврдиле дека загадувањето на воздухот индиректно предизвикува и до два милиони смртни случаи годишно!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.