Лидерот на ВМРО-ДПМНЕ, Никола Груевски, денес на прес конференција оцени дека откако државата ја води СДСМ резултатот од привлекувањето нови странски инвестиции е нула, исто како и бројот на новоотворени работни места. Според него, прашање е дали новата влада воопшто има интерес да привлече странски инвестиции, критикувајќи ги новите кадровски решенија во оваа сфера.

Тој беше и против најавеното објавување на договорите со странските инвеститори бидејќи тоа ќе  нанесе, како што рече, штета на угледот на државата.  Уште повеќе тој тврдеше дека пред смената на власта биле во преговори со околу 60 странски компании да дојдат во Македонија, и ако тие не бидат попречени од новата влада, ќе отворат дополнителни 25.000 работни места.

„Само во  првите пет месеци од оваа година донесовме седум инвестиции со над 4.400 работни места. Резултатот на владата на СДС е нула инвестиции, нула работни места. Искусни кадри како Бил Павлески, Виктор Мизо и Владимир Пешевски кои дипломирале на странски престижни факултети и дошле од моќни компании, се заменети со несоодветни министри како Рамиз Мерко и Самка Ибраимовски“, критикуваше   Груевски.

Проблем за него е и што владата ги повлече сите 33 инвестициски промотори од Европа, од Америка и од Азија, прогласувајки ги за непотребни и за трошок. Истите тие, според него,  иницирале или донеле голем број инвеститори и се покажале за полн погодок во целата шема на привлекување странски инвестиции. Тој жали и за рекламирањето на Си-Ен-Ен што беше укинато од владата, бидејќи е  непотребен трошок, а  неколку сопственици или менаџери на компании јавно објавилеа дека токму меѓународните реклами биле првата информација за нив за Македонија.

„ Владата објави дека во иднина секој инвеститор кој сака да дојде во Македонија и д добие субвенции за тоа ќе може но само доколку прифати услов дел од набавките да му бидат од Македонски компании. Колку и да звучи ова убаво, за жал ова доколку се примени ќе одврати многу инвеститори кои наместо во Македонија ќе заминат во некоја од конкурентските земји во регионот или источна Европа каде нема ваков вид услов. Патем речено секој инвеститор посакува да набавува од локален добавувач доколку квалитетот е здоволителен, а цената конкурентна, но не би се чуствувал комотно ако тоа му е услов или закана. Ниту пак Македонија со сеуште високиот број на невработени е во ситуација да поставува вакви услови, кои не сум чул дека ги поставува некоја друга земја во светот. Македонија е во ситуација. Нам ни требаат и оние инвеститори кои нема да ангажираат домашни компании како добавувачи, заради тоа што ќе вработат 200, 300, 500 или повеќе невработени, кои ако не најдат работа во Македонија, ќе мораат да заминат во друга земја или да живеат во сиромаштија и да се на товар на државата преку програмите за социјана помош.

Згора на се, преку редица демагошки настапи се гради атмосфера дека странските инвеститори многу добиле во Македонија, премногу им се дало или дека давале ниски плати и многу од нив биле за ниско квалификувана работна сила, небаре сите невработени во Македонија се со високо образование знаење, па потребни се исклучиво високо технолошки компании. Нашата стратегија беше да привлекуваме и компании кои бараат високо квалификуван кадар, но и компани кои бараат ниско квалификуван кадар од проста причина што имавме многу такви невработени и се трудевме и за нив, пониско квалификуваните да има понуда за работа. Сите се наши граѓани и за сите треба да се грижиме, а не само за оние со високи квалификации.

  Се најави и постепено зголемување на даноците. Она што министерот за финасии ја известил светската банка во разговор со нивни преставници, а исто така неговите соработници и јавноста, е дека новата влада во својот мандат планира освен воведување прогресивно одданочување и постепено золемување на персоналниот данок, данокот на добивка и придонесите за здравство и пензиско, што не е само лоша вест за странските, туку уште повеќе и за домашните инвестори.

 Народната банка на Република Македонија констатираше дека странските директни инвестиции во првото полугодие близу за 100 милиони евра се помали отколку истиот период лани. Летово доживеавме и период на дезинвестирање, поточно кога повеќе има одлив одколку прилив на странски инвестиции. Минатиот месец се објави информација на ДЗС од која се гледа пад на индустриското произвоство и пад на просечните плати во Македонија. Од повеќето објавени параметри се гледа дека влеговме во период на стагнација на економијата и лоши резултати по речиси сите основи. Ова освен како критика, очекувам да се свати и како рано предупреување на владата.

 Владата на СДС донесе исклучително штетна одлука за декласифицирање и објавување на субвенциите кои се даваат на странските инвеститори во Република Македонија, потег кој ќе влијае на потенцијалните инвеститори и нивните намери да дојдат во земјава да инвестираат. Тука сакам да се осврнам на неколку моменти.

 Не е никаква тајна, ниту е незаконски тоа што Македонија, како и повеќето земји низ светот, кои се борат за странски инвестиции, да дава субвенции по некаква основа. Тоа и досега не било тајна, било согласно закон одобрен од ЕУ и истото даде огромни резултати во намалување на невработеноста.

 Со оваа нова одлука  владата ја руши конкурентоста на државата во однос на другите соседни и регионални држави кои исто се натпреваруваат за инвестиции. Секоја земја прави напори и води преговори со инвеститорите во тој правец. Тоа го прават и Србија, Бугарија, Романија, Чешка, Унгарија, но и одредени држави на пример во САД и други развиени земји кога сакаат да привлечат голем работодавач. Компаниите кои доаѓаат не посакуваат јавно објавување на нивните договори и приходи по основ на субвенции, а тоа не и одговара ни на државата. Прво затоа што се откриваат позициите пред другите земји конкуренти, бидејки најчесто за еден инвеститор во процесот на одлука се натпреваруваат најмалку 5-6 држави некогаш и 10 со различни понуди кои најчесто не се објавуваат. Второ затоа што секој нареден инвеститор ќе бара најмалку иста субвенција од оној кој добил најголема, што не е добро и ја става државата во подредена улога… Понекогаш кога конкуренцијата на земји за еден инвеститор е голема и силна, а неговата важност огромна, субвенциите се поголеми, а некогаш може да се успее и со помали субвенции. Тоа е предмет на преговори. Во поретки случаи се успева да се привлелат и без субвенции.

Најавеното објавување еден вид официјално објавен ценовник за државната помош како и да го наречат тоа, во реалноста ќе резултира со многу загубени битки во однос на привлекување компании од странство да отворат нови работни места во Македонија.

Ваквата стагнација ја чини и допрва ќе ја чини државата и граѓаните. Странските инвестиции беа локомотива на македонската економија и стимулативен елемент на домашното стопанство и на домашните компании кои соработуваат со овие странски инвестиции. Ваквото економско мртвило неминовно ќе доведе до опаѓање на општата економска активност, но и можност за бркање на посточеки инвеститори. Во услови кога во регионот, Европа, но и светот далеку поразвиени држави се борат за секоја нова инвестиција владата на СДС се откажува од таквата трка и излегува од конкуренција“, тврдеше Груевски.

Во овој своевиден отчет во негов мегаломански стил тој  соопшпти дека до  почетокот на оваа 2017та година имало над 100 странски компании  во државата  кои вработуваат илјадници наши граѓани, дека поголемиот дел од нив соработуваат со најмалку петстотини домашни компании и дека во изминатите десетина години владите на ВМРО-ДПМНЕ успеале да привлечат директни странски инвестиции во висина од над 2.6 милијарди евра.

„Во 2006а година немаше ниту една функционална технолошко индустриска развојна зона. Отпочнавме на проект за развој на вкупно 14, сега има  8 целосно функционални зони, додека останатите 6 се во изградба“, тврдеше Груевски.