Вкупно 5880 луѓе и неколку фирми лани уплатиле вкупно 1 милион и 880 илјади евра на сметката на ВМРО-ДПМНЕ за донации, покажаа годишните извештаи на Државниот завод за ревизија за политичките партии за минатата година, објавени на веб-страницата на оваа институција.

Најмногу уплати на сметката на ВМРО-ДПМНЕ

На сметката на партијата на Никола Груевски пари за донации во ист ден уплаќале министри, пратеници, градоначалници, директори, како и неколку организатори на протестите „За заедничка Македонија“. Од извештаите може да се забележи дека парите биле уплаќани во неколку денови.

На 5 јануари донирале 272 лица. Извештајот покажува дека на 29 јануари донирале 272 донатори, а 244 луѓе во ист ден решиле да уплатат пари на 9 февруари. На 12 август уплатиле најмногу – 376 лица биле во банка и решиле да одвојат по една плата за партијата.

Кој сè донирал за ВМРО-ДПМНЕ

лидерот на партијата Никола Груевски (30.000 денари),

директорот на БЈБ, Митко Чавков (28.000 денари),

пратеникот Антонио Милошоски (20.000 денари),

министерот Никола Попоски (40.000 денари),

пратеничката Даниела Рангелова (21.000 денари),

министерот Зоран Јолевски (25.000 денари),

министерката Марта Арсовска Томовска (22.000).

градоначалничката Билјана Беличанец Алексиќ (20 000 денари),

градоначалникот на Скопје Коце Трајановски (40 000 денари),

директорот на МНТ Дејан Пројковски (20 000 денари),

директорот на Драмски театар Роберт Вељановски (12.000 денари)

Цветко Грозданов (24.000 денари)…

Од извештајот на Државниот завод за ревизија може да се види дека во два наврати се среќава името на Борис Димовски, кој на 15 април донирал 50.000 денари, а на 28 јуни минатата недела уплатил 41.000 денари. Пари уплатил и аналитичарот и член на ГДОМ, Александар Пандов, кој уплатил 30.000 денари. Членот на Државната комисија за спречување на корпуцијата Александар Даштевски, пак, уплатил 13.000 денари.

 Донации за СДСМ – најдарежлив Владимир Бочварски

СДСМ, пак, минатата година имала 698 донатори. Најдарежлив со донација од 100.000 денари бил пратеникот Владимир Бочварски. За партијата донирале и пратеници, меѓу кои, Оливер Спасовски со 60.000 денари, пратеничката Јогода Шахпаска донирала 40.000 денари, пратеникот Благоја Бочварски дал 58.000 денари… Сашо Поцков, Елиф Фејзулоски и Бетиане Китев донирале различни износи по неколку пати. Во извештајот за СДСМ на Државниот завод за ревизија го нема името на лидерот на партијата, Зоран Заев.

Во ДУИ лани донирале 74 физички лица. Партијата вкупно собрала 227.000 евра. Донирале лидерот Али Ахмети (36000 денари) и актуелниот претседател на Парламентот,Талат Џафери (33000 денари). На списокот на ДУИ се и фирмите „Конти хидропласт“ (300.000 денари) и „Европа 92“ (577.750 денари). ДУИ има донации и од државните институции и јавни претпријатија каде директорите се од оваа партија. Тоа се А.Д. Македонска пошта, општина Липково, Државен студентски дом „Пелагонија“, Дирекција за заштита и спасување, Македонска железница, Аеродроми на МК, Фонд за ПИОМ.

За партијата БЕСА донирале 110 донатори. Најмногу пари дал лидерот Билал Касами – 4500 евра.

На сметката на ГРОМ на Стевчо Јакимовски се уплатени 98.230 денари.

Во Левица донирале 35 лица. Во ЛДП има 12 донатори или 2.863.000 денари. НСДП има 1 донатор – Министерство за правда со 1.513.163 денари.

Демократски сојуз на Павле Трајанов лани имал 177 донатори или вкупно се слеани 788.338 денари.

Кај либералите донирале  двајца – поранешниот и сегашниот претседател на партијата: Стојан Андов дал 36.000 денари, а Ивон Величковски, 215.000 денари.

За донаторите на ВМРО-ДПМНЕ, специјалното јавно обвинителство отвори предистражна постапка во која на информативен разговор за финансирањето на партијата и личните донации за време на изборите во 2014 година, беа повикани стотици лица, а беше казнет и началникот на СВР Охрид за несоработка со обвинителството на Катица Јанева.

Mф/ВМ