Daily news
ДУИ: Пред 15 години заедно воспоставивме национална вредност
„Пред 15 години заедно воспоставивме национална вредност сега веќе докажана на дело, наследничка на Ослободителната национална армија, Демократската унија за интеграција.
15 години заедно триумфиравме во постојани битки и во служба на граѓаните, почнувајќи од парламентарните избори во 2002 година, референдумот за територијална поделба во 2004 година, локалните избори во 2005 година, парламентарните избори во 2006, предвремените парламентарни избори во 2008 година, локални и претседателски избори во 2009 година, предвремените парламентарни избори во 2011 година, повторно предвремените избори во 2014 година до последните избори во декември 2016 година.
Во овие 15 години, од основачкото собрание, организиравме четири конгреси, од кои првиот на 19 ноември 2005 година, вториот на 19 декември 2009 година, додека третиот конгрес на годишнината на партијата на 5 јуни 2014 година, при што воспоставивме нов стандард не само за ДУИ туку и за сите партии во земјата и регионот, преку организирање дводневен тематски конгрес во март 2015 година.
Во овие 15 години почитувани членови и граѓани, заедно имаме направено многу, почнувајќи од: Уставните измени во согласност со Охридскиот договор, територијалната поделба, албанските национални симболи, унапредување на употребата на албанскиот јазик, правичната застапеност во државните институции, заокружувањето на инфраструктурата во високото образование со легализација на ДУТ, отворање нови факултети, студентски домови, нови спортски сали, оснивањето на албанскиот државен универзитет во Скопје, изградба на повеќе училишта, детски градинки, спортски сали, изградба на слободни економски зони во Струга, Кичево, Тетово, Скопје, Липково, добивањето на кандидатскиот статус за членство во ЕУ, либерализација на визниот режим со земјите на ЕУ, отворањето на претпристапниот дијалог на високо ниво со ЕУ, проектот за гасификација за Скопје, Тетово и Гостивар, изградба на нови патишта и автопатот Кичево-Струга, енергетската врска со Албанија, граничниот премин со Косово и Албанија без пасош, демаркација на граничната линија со Косово, признавање на независноста на Косово, плоштадот Скендербег, плоштадот Илириа, плоштадот на знамето, Скендербег, Хасан Приштина, Иса Болетини, Јосиф Багери, Неџат Аголи, Пјетр Богдани во Скопје, одбележувањето на 100-годишнината од албанската азбука, раѓањето на Мајка Тереза, како и 100-годишнината од знамето, албанскиот театар во Скопје, библиотеката и театарот во Тетово, Музејот на албанската азбука во Битола и Музејот на слободата, Меморијалниот центар „Албанска мајка“ во Зајас, водоснабдувачки систем во албанските населени места, ургентни центри во Тетово и болнички центар, субвенции за земјоделците, образовни стипендии и безброј други проекти.
Секој предизвик, секое соочување, секое достигнување, секој успех е заеднички, и токму овој 15-годишен јубилеј го отсликува клучниот факт кој ја изедначува ДУИ со народот, ДУИ која не го разочарува народот и ДУИ која целосно дејствува во согласност со очекувањата на народот.
Но, оваа 15-годишнина, исто така, нè наоѓа и пред многу сериозни и одлучувачки предизвици за Албанците, за земјата, за регионот. Во околности на големи судири на геополитички и геостратешки интереси, идеолошки судири, Демократската унија за интеграција и понатаму останува цврста, посветена во својата ориентација, за интегрирање на Македонија и регионот во НАТО и Европската Унија, во искрено пријателство и партнерство со Вашингтон и Брисел.
Истовремено, сите ние при Демократската уунија за интеграција сме повеќе од посветени за да градиме правна држава, држава на правдата, општество во кое ќе владее законот, еднаков за сите. Нашата посветеност на овој јубилеј ќе донесе и нормативно заокружување на Охридскиот договор преку јазичната еднаквост, но и храбар чекор кон вратите на НАТО и ЕУ, како и целосен фокус во зголемување на животниот стандард, економскиот развој и отворање нови работни места.
Поминаа 15 години од кога Демократската унија за интеграција постави нови стандарди во политиката промовирајќи ги вредностите на толеранцијата, солидарноста, помирувањето, консензуалноста, единството, одговорноста, донесувањето храбри одлуки и евро-американски дух.
Поминаа 15 од кога Демократската унија за интеграција е на браникот на отпорот со отстранување на стравот инсталиран со децении, вложувајќи постојани напори Албанците да не се делат и да станат уште поважни, водејќи борба против омразата и нееднаквоста, како и други национални вредности.
И токму оваа 15-годишнина е вистинскиот момент за изразување најдлабока благодарност до сите гласачи, за секој поддржувач и граѓанин кој низ овие години бил до нас, ја вложил својата доверба во жените и мажите на Демократската унија за интеграција за водење на сите процеси во текот на овие години, се наведува во соопштението на ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.