Заменик-претседателот на Владата, Кочо Анѓушев, објасни денес зошто Македонија е најголемиот добитник од вчерашниот самит во Трст откако од вкупниот грант од 194 милиони евра доби дури 70 милиони евра.

„Тоа само покажува дека се препознаени реформските процеси и новиот дух на владата, која има за цел да ги имплементира сите процедури и потребни чекори за побрзо и полесно пристапување кон Европската Унија, а со самото тоа и за пристап до нејзините фондовите“, изјави Анѓушев.

„Од вкупните пари, 40 отсто се грант за Македонија, иако таа е само една од шесте земји, а по број на жители е една од помалите. Што значи дека, ако одиме по жител, Македонија е навистина победник во оваа фаза од поддршката на Берлинскиот процес“, објасни тој нагласувајќи дека станува збор за неповратни пари од ЕУ за Македонија.

„Ние како Влада длабоко го почитуваме и го цениме тоа. Мораме да кажеме и дека ја чувствуваме како голема обврска оваа помош за да бидеме навистина реформски ориентирани. Не само поради потребите за пристапување кон Европската Унија туку и за да го подобриме животот на секој граѓанин на нашата земја“, рече Анѓушев.

Сумата со која ќе бидат поддржани вкупниот број проекти што се номинирани на овој самит е над милијарда евра, а овие 194 милиони евра се издвоени како неповратен грант, нагласи тој додавајќи дека проектите што ги номинирала Македонија ќе бидат поддржани со многу поголеми износи.

„Овој грант е добиен за делот на пругата кон Бугарија, што е од исклучителна важност. Како Влада, а со тоа се согласува и Европската Унија, сметаме дека нашето поврзување со Коридорот 8, односно врската помеѓу Македонија, Бугарија и Албанија е од огромно значење. Вие знаете дека по должината на коридорот 10 имаме доста развиена мрежа, но делницата исток-запад не е така развиена. Денес, ако сакате да тргнете и да стигнете до Софија или до Тирана, иако се тоа само делници од 200 – 250 километри, ви требаат повеќе од 4 часа, што е недозволиво“, рече Анѓушев, па додаде:

„Тоа мораме да го промениме. Прво, за да го ослободиме движењето на граѓаните, за да ослободиме движење на производи и друга стока, за да може целото стопанство поефикасно да функционира и работи, и притоа да биде поврзано на две мориња. Како што знаете, тоа е еден исклучително значаен и стратешки коридор“.

Според него, пругата од Бељаковце до Крива Паланка е поделена на три делници, а втората делница е инвестиција од 152 милиони евра, а Македонија доби грант кој е 46 отсто од нејзината вкупна градежна вредност.

„Многу е битно да кажеме дека сите овие средства последните неколку години беа замрзнати за Македонија. Македонија повеќепати аплицираше претходните години за европски средства, но тие не беа доделени. Ценам дека и ова е резултат на препознавањето на новиот дух на владата кој е реформски ориентиран, и овој чекор покажува дека тие сите средби со лидерите на ЕУ во овој месец и половина, не биле случајни. Напротив, тие средби беа со цел да докажеме пред меѓународната заедница дека Македонија е просперитетна држава и коректен партнер за сите на Балканот и во Европа. Мислам дека тоа успеавме да го покажеме, во интерес на граѓаните на Македонија и на целокупното македонско општество“, рече Анѓушев.

Анѓушев во Трст се сретнал и со пртеставници на Светската банка, која според него последните години била прилично незадоволна од ситуацијата кај нас и со неа Македонија не потпишала ниту еден договор, а тоа што било потпишано претходно не се имплементирало. Целта била да се одглави соработката, а теми инфраструктурата, автопатскиот дел од коридорот 8, како и можната поддршка на буџетот со која ќе се помогне македонската економија, која е извозно ориентирана и кон нови технологии.

„Тие беа расположени да дадат таква поддршка и најавија дека за две недели ќе дојдат во Македонија само за таа намена, за да работиме заеднички со нив и со нивната групација AFC, за да дојдеме до такви мерки и до такви средства кои ќе бидат директна поддршка за македонската економија“, соопшти тој.

На крајот Анѓушев најави посета на највисока владина делегација во најголемата асоцијација на работодавачи на Франција за да се поттикне меѓусебната соработка.