Daily news
Лесно но ефективно – Нови трикови за слабеење
Сите знаеме дека ако сакаме да ги намалиме килограмите, треба да јадеме помалку и да вежбаме повеќе, но во пракса тоа и не е толку лесно.
За среќа овој проблем е глобален и постојано се прават истражувања на оваа тема, кои покажуваат дека постојат одредени трикови кои можат да ви помогнат полесно да ја освоите битката со килограмите, да бидете поздрави и подобро да се чувствувате во врска со себе.
- Во јогуртот секојдневно додавајте малку цимет. Вкусот е моќен двигател на метаболизмот. Половина мала лажичка цимет дневно може да ви помогне да согорите 1 килограм повеќе во тек на месец дена.
- Никогаш не јадете на работната маса. Истражувањата покажуваат дека лицата кои јадат на работната маса внесуваат околу 250 калории повеќе за време на еден оброк.
- Смејте се. Со 10 до 15 минути смеење согорувате околу 300 калории.
- Пијте сок од моркови. Една чаша природен цеден сок од морков ќе ви помогне во тек на 12 недели да изгубите 2 кг повеќе од лицата кои се на истата диета, а не пијат сок од моркови.
- Земајте суплемент за калциум. Со помош на калциумот може да изгубите до 2,6 повеќе килограми од лицата кои не пијат калциум.
- Додека вежбате слушајте музика. Музиката ќе ви даде додатна мотивација за вежбање.
- Секогаш кога сте во можност вежбајте во група. Лицата кои вежбаат во група согоруваат повеќе калории бидејќи меѓусебно се мотивираат.
- Јадете црвена пиперка, таа содржи супстанца која го поттикнува метаболизмот.
- Стресот за работа е една од најзастапените причини за прејадување. Контролирајте го стресот со дишење, а не со прејадување.
- Вежбањето наутро помага во побрзо согорување на мастите, бидејќи вашето тело е приморано да троши од насобраните резерви.
- Грицките заменете ги со свежо овошје.
- Засладените сокови заменете ги со незасладена лимонада.
- Исклучете го телевизорот додека јадете. Се смета дека гледањето ТВ за време на оброците го зголемува внесувањето на храна, како и телесната тежина за околу 3,5 кг годишно во просек.
- Јадете од мали чинии.
- Секогаш користете го приборот за јадење правилно, на тој начин јадете побавно, повеќе уживате во храната и помали се шансите да се прејадете.
- Вареното јајце е идеален појадок. Богато е со хранливи состојки, а има малку калории.
- Слушајте смирена класична музика за време на оброкот. На овој начин ќе бидете опуштени, повеќе ќе ја џвакате храната и побргу ќе почувствувате ситост.
- Водете љубов често. Освен што ќе согорите калории, хормонот кој се лачи при возбуда и оргазам ја поттикнува работата на метаболизмот.
- Калинката ја намалува можноста за таложење на маснотиите, па затоа кога ќе имате прилика купете го ова овошје.
- Гответе. Готвењето согорува калории и ви овозможува контрола над состојките кои ги користите. Но, никако не грицкајте додека го приготвувате оброкот.
- Пијте зелен чај, тој содржи состојки кои ја поттикнуваат работата на метаболизмот.
- Воведете барем еден оброк со спанаќ неделно. Спанаќот го поттикнува оргазнизмот полесно да ги преработи мастите.
- Барем еднаш неделно јадете оброк зачинет со лута црвена пиперка. Ензимите во лутите пиперчиња му помагаат на телото да ја користи енергијата од мастите, а не онаа од јагледхидратите.
- Кога пиете сокови пијте во голтки, и по секоја голтка спуштете ја чашата.
- Појадувајте. Оние кои го прескокнуваат појадокот имаат побавен метаболизам.
- 15-тина минути пред оброкот јадете јаболко. На овој начин ќе конзумирате 187 калории помалку во просек.
- Користете маслиново масло за салати. Тоа содржи протеини кои ви кажуваат кога вашето тело е сито, и на тој начин полесно ќе го спречите прејадувањето.
- Правете сендвичи со домати: доматите ќе ви помогнат подолго да се чувствувате сити, отколку кога би јаделе сендвич без домати.
- Не прескокнувајте оброци и не правете премногу долги паузи меѓу оброците.
- Јадете ананас, тој содржи супстанци кои го поттикнуваат варењето.
- Оцетот во храната го убрзува разградувањето на мастите, па затоа со оброкот јадете салата зачинета со оцет.
- Продуктите богати со витамин Ц го поттикнуваат метаболизмот.
- Секогаш седете додека јадете. На овој начин се јаде една третина помалку отколку кога јадете во движење.
- Јадете во друштво. Истражувањата покажуваат дека луѓето кои јадат во друштво внесуваат помалку храна, особено жени во друштво на мажи.
- Избегнувајте енергетски пијалаци и алкохол.
Ефектите треба да бидат евидентни./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.