Daily news
ЛП: Ивица Коневски создаде архитектонски Франкенштајн
Либералната партија порача дека е време за политичка одговорност за градоначалникот на општина Аеродром, Ивица Коневски, кој од една убава населба за живеење направил архитектонски Франкенштајн со изградбата на педесетината нови висококатници, секоја со над 120 жители.
„Локалните избори се момент за утврдување (политичка) одговорност на градоначалникот на општина Аеродром, Ивица Коневски, за активностите со кои изминатите осум години зад грбот на граѓаните Општината и градежните фирми создадоа архитектонски Франкенштајн.
Во општината барем еднаш неделно високата зона нема вода, постои континуиран проблем со електричниот напон, намален е севкупниот зелен и слободен простор и недоволен е капацитетот во градинките, основните училишта и амбулантите.
Аеродром е населбата која во 70-тите и 80-тите години на 20 век во европски рамки била презентирана како типска населба наменета за пријатен и хуман социјален живот, со висок степен на сеизмичка, еколошка, сообраќајна и друга безбедност, со одлично решена инфраструктура, паркинг-простор, централно затоплување, водовод и канализација.
Сега во Аеродром на местата каде што се наоѓале 50-ина приземни објекти, изградени се 50-ина десеткатници кои бројат најмалку 120 стана. Практично, на местото на секоја приземна станбена единица, која имала од 5 до 10 стана, никнува висококатница за колективно живеење со 120 станбени единици. Граѓаните навикнати на полувековен мирен живот во типска населба со многу зеленило и комплетно решена инфраструктура, доживуваат тектонски поместувања во животот.
Во трката за голема и брза заработувачка општинските власти заборавиле на основните постулати во градежништвото принудувалќи ги граѓаните да живеат во станбени блокови како глувци во кутии, едвај оддалечени десет метри еден од друг, без план каде ќе ги паркираат своите возила на тие локации, без зеленило, без хуман простор и социјализација меѓу нив.
Само на улицата Методија Шаторов – Шарло секоја станбена единица имала двор и зеленило од 600 квадратни метри со 480 жители. Сега на оваа улица со широчина од шест метри и должина од 350 метри се изградени висококатници со 1.200 станбени единици и 4.800 жители.
Непланското, краткорочно и неодржливо профитерско менување на ликот на Аеродром во хаотично место за живеење, исполнето со сообраќаен хаос и загадување, мора да запре на претстојните октомвриски избори“, порачуваат од Либералната партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.