Daily news
Меркел пред четврт мандат
Граѓаните на Германија денеска гласаат на парламентарните избори во земјата на кои се очекува канцеларката Ангела Меркел да го освои четвртиот мандат.
Меркел и нејзиниот конзервативен блок на Демохристијанската партија и баварската Христијанска социјална унија водат во јавните анкети. Иако поддршката за Меркел опадна во минатата недела, сепак нејзиниот блок води со 34 до 37 проценти по што следат социјалдемократите со 21 процент. Најголемиот противник на Меркел е социјалдемократот Мартин Шулц.
По француските ова се најважните избори во Европа годинава така што сите очи се вперени денес во Германија.Парламентарните избори во 2009 и 2013 година донесоа значителен пад на излезноста на изборите на околу 70 проценти, но со растот на популистичките движења кои привлекуваат негласачи од покраините, се очекува бројките годинава значително да пораснат.
Годинава, според германскиот Завод за статистика, 61,5 милиони луѓе имаат право да гласаат на парламентарните избори. Повеќе од една третина од германските гласачи- 22 милиони – се постари од 60 години, што значи дека постарата генерација има особено влијание врз изборниот резултат.
Гласачот има право да селектира двајца кандидати. Гласањето е поделено на два дела. На првото ливче се дава глас за кандидат од изборната единица според мнозински принцип, додека на второто гласачот се определува за политичката партија според пропорционалниот модел.
Пратеничките места потоа се делат еднакво – по 299 за мнозинскиот и пропорционалниот глас. Германија е поделена во 299 изборни единици со приближно по 250 илјади жители, и секоја добива по еден претставник.
Втората половина од Бундестагот се пополнува со т. н. „втор глас“ или глас за партијата за кој важи пропорционалниот модел, односно секоја партија добива пратеници според процентот на освоени гласови.
Она што го прави гласањето особено интересно е што гласачот може да ги подели своите гласови меѓу партиите, па на пример, првиот глас да го даде за локалниот кандидат на ЦДУ во неговата изборна единица, а да гласа за Либералите со вториот глас, со цел да му помогне на традиционалниот коалициски партнер на демохристијаните да има повеќе пратеници во парламентот.
Понекогаш, некоја партија добива повеќе директни места во парламентот преку првиот глас одошто добила преку вториот. Со оглед на тоа што на секој кандидат кој победил во својата изборна единица му се гарантира пратеничкото место, партијата ги задржува тие „прелеани“ места. Оттука, парламентот честопати брои повеќе пратеници од предвидените 598. Актуелниот, на пример, имаше 630 пратеници поради ваквото прелевање.
За една партија да си обезбеди место во Бундестагот мора да освои најмалку 5 проценти од вторите гласови. Овој систем беше усвоен за да се спречат малите партии- како оние во времето на Вајмарската република – да влегуваат во парламентот. Досега пречката од пет проценти беше користена за да им се оневозможи на деснорадикалната НПД и други екстремистички партии да влезат во парламентот.
Во досегашниот состав, во парламентот беа претставени пет партии: демохристијанската ЦДУ на канцеларката Ангела Меркел и нејзината сестринска партија од Баварија – ЦСУ, Социјалдемократите, Левицата, и Партијата на Зелените.Според очекувањата, ним годинава би можеле да им се придружат уште две партии: Либералите, кои во 2013 година за првпат не успеаја да ја преминат границата од 5 проценти, како и популистичката, антиимигрантска Алтернатива за Германија (АфД).
За разлика од претседателскиот систем во САД, гласачите во Германија не го бираат канцеларот директно. Тоа го прави парламентот не подоцна од еден месец по неговото конституирање. Водечкиот партиски кандидат на партијата која освоила најмногу гласови вообичаено успева да формира коалиција. Претседателот, кој е шеф на државата и има церемонијална улога, му го дава мандатот на избраниот кандидат, а парламентот потоа го потврдува новиот канцелар на тајно гласање.
Доколку, како и во претходните три изборни циклуси, ЦДУ освои мнозинство од гласовите, нивниот кандидат за канцелар Ангела Меркел ќе ја добие функцијата и во следните четири години. Во Германија нема ограничување за бројот на мандати на канцеларот. Но досега, по падот на Хелмут Кол, ниту еден канцелар не бил на функцијата подолго од 16 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.