Daily news
Наставничкиот пленум контра СОНК
Наставничкиот пленум испрати јавна реакција со која го обвинува СОНК дека сака да си ги препише заслугите од идните реформи во образованието, иако досега одобрил многу закони без учество на наставниците и на нивна штета.
„Деновиве регионалните претставници на СОНК, па и самиот Неделков, интензивно држат состаноци со членството на коишто, како што дознавме, се обидуваат да го оцрнат Наставнички пленум, а заслугите за придобивките од идните реформи за основно и средно образование да си ги препишат себеси.
Најпрвин да им се извиниме на сите засегнати од спомнатите закони за тоа што предлозите за измена на новите закони не можеме да им ги соопштиме. Тоа е од едноставна причина што не сме стручни да ги евалуираме правните аспекти на предложените измени, па за да не создаваме непотребни шпекулации околу евентуални правно неиздржани прелози, решивме да почекаме предлог-реформите да ги објави МОН. Тогаш целата јавност ќе може да ги види, а потоа да дебатира за тоа што може уште повеќе да се подобри.
СОНК постои долго време и со премолчување одобри многу закони и измени донесени без учество на наставници практичари, многу од нив на штета на наставничката фела и квалитетот во образованието. Такви се: екстерното тестирање, заменските наставници, како и патните трошоци како дел од бруто-платата, што финансиски значително им штети на наставниците претежно во руралните општини. Лоши реформи против кои Пленумот се бори две и пол години.
Во борбата за поквалитетно образование на Пленумот СОНК не се вклучи, туку застана во одбрана на лошите реформи во образованието и пленумците ги нарекуваше со секакви погрдни имиња. Заслужуваа ли членовите на СОНК, кои беа и сè уште се членови на СОНК и Пленумот, такви понижувања од синдикатот што долго време го финансираат?
МОН прифати учество на наставници практичари во изготвувањето на реформите за подобар квалитет на образованието по барање на Наставнички пленум. Групите што работат на идните реформи, односно законите, наставните планови и програми и олеснувањата на административната работа се хетерогени во секој поглед, полова структура, етничка застапеност, припадност на организации итн. Во работните групи има и претставници на синдикатите за образование СОНК и МЕСО, но најбројни се членовите на Наставнички пленум. Дел од пленумците сè уште се членови на СОНК, а другите се поранешни членови кои во јануари 2015 го напуштија синдикатот поради прекинот на штрајкот без консултација со членството.
Една од клучните измени предложени од наставниците практичари и пленумците се барањата за враќање на надлежностите кои ги има локалната самоуправа кај МОН. Веруваме дека децентрализацијата што доби амин од СОНК донесе низа негативности во основното образование, како на пример ненавремената набавка на огрев во повеќе општини, создаде сложен механизам што резултира со ненавремено исплаќање на платите и го зголеми на бројот на образовен кадар со средна стручна подготовка кои го снижија квалитетот на наставата, а добиваат иста плата како кадарот со високо образование благодарение на Неделков“, стои во реакцијата на Пленумот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.