Daily news
Груевски вети плацеви за едно евро во Македонски Брод
„Во времето кога ВМРО-ДПМНЕ влезе во владата во Македонски Брод имаше 996, а сега има над 1.660 вработени лица, или за 67 проценти повеќе вработени. Тоа е ВМРО-ДПМНЕ. Тоа ќе се обидеме да го продолжиме бидејќи изградивме човечки капацитети кои знаат и се обучени да привлекуваат нови инвеститори“, порача лидерот на ВМРО-ДПМНЕ, Никола Груевски, во Македонски Брод, каде што го придружуваше кандидатот за градоначалник Милосим Војнески. Притоа Груевски за учениците од прво до петто одделение вети бесплатен и здрав оброк за да имаат и здрава храна и родителите да имаат помалку трошоци.
„Општината Македонски Брод и Милосим Војнески ќе им овозможат на граѓаните кои немаат сопствен дом и сакаат да стекнат да можат да си купат плац за куќа по симболична почетна цена од само 1 евро по квадратен метар за земјиштето, а исто така ќе се укинат или драстично намалат трошоците за комуналии.
Нудиме концепт во кој нема да има неасфалтирана и неосветлена улица, со парк во секое маало. Предвидуваме реконструкција на локалниот пат од Македонски Брод до село Сланско. Изградба на локалниот пат од село Самоков до село Рамне, како и изградба на локалниот пат од село Самоков до село Бенче. Ќе се изгради и локалниот пат од село Модришта до село Вир во должина од 5500 метри, а ветуваме и реконструкција на локалниот пат до село Долни Манастирец. Се планира и реконструкција на пречистителната станица во село Самоков, како и изградба на водоснабдителен систем во населените места Црешнево, Старовци и манастирот „Старокуќа“. Ќе биде изграден и водоснабдителен систем од село Сушица до село Зркле, како и од село Инче до манастирот „Св.Богородица“ и до село Долни и Горни Манастирец.
Ветуваме изградба на фекалната канализација во Суводол, Девич и Брест. Се предвидува изградба на водоснабдителен систем за Македонски Брод и населеното место Требино.Планираме комплетна внатрешна и надворешна реконструкција на вратите, прозорците и парното греење во Културниот дом во Македонски Брод“, наброја лидерот на ВМРО-ДПМНЕ. Војнески дополни дека заедно со раководство од ВМРО-ДПМНЕ ќе продолжат да градат во Македонски Брод, да изведуваат проекти и патишта.
„Од 53 села, 48 успеавме да ги асфалтираме, во сите населени места успеавме да донесеме водоводи, ќе продолжиме и понатаму. Им порачувам на противниците дека во Македонски Брод има и чист воздух и живот, затоа ние ќе работиме за подобар живот на нашите сограѓани“, рече кандидатот за градоначалник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.