Daily news
На Латас му се заканува казна од 4 години затвор, тој побара изземање на бомбите

На новинарот и бизнисмен Драган Павловиќ – Латас, кој е обвинет во случајот „Тотал“, му се заканува казна затвор од минимум четири години. На денешното рочиште не беа присутни претставници на правните лица.
Судот за правните лица „Тотал маркетинг“ ДООЕЛ И „Тотал медија центар“ ДООЕЛ Скопје побарал присуство на претставниците бидејќи управителот Драган Павловиќ – Латас е обвинет во постапката. Фирмите биле пријавени на домашната адреса на Латас. Кога поканите биле неуредно вратени, судот побарал од Латас да определи застапници од фирмите. На ова Латас преку писмено известување информирал дека поради мерката претпазливост е спречен да определи претставници, но и забранува судот да определи бидејќи сакал тоа да се лица во кои тој имал доверба.
Судијката Софче Гаврилова-Ефремова побара од одбраната денес да бидат назначени претставници бидејќи смета дека намерно се одолжува овој процес, во спротивно ќе се назначат адвокати по службена должност. Во однос на правното лице „Медија макс“ ДООЕЛ Скопје, повторно поканата за претставници по два обида се врaтила со забелешка дека таму немало означено оти постои такво правно лице.
По ова, управителот Петар Вељановски известил дека поканата ја добил на домашна адреса. Управителот рекол дека не е во можност да допатува од Охрид, каде што живее, до Скопје. Централен регистар го известил судот дека правните лица немаат извршено промена на адресата. Во однос на правното лице „Медија макс“, управителот Петар Вељаноски вчера го известил судот дека поради работните обврски, замолува да се оправда неговата неможност да се јави на суд. Судот не наиде на разбирање и објасни дека ова е несериозен пристап.
Судот констатира дека од одбраната на Латас биле доставени неколку писмени поднесоци, и тоа барање за дополнување на листата на докази со изготвеното вештачење на одбраната и тоа е проследено до Обвинителството, потоа два поднесока од Државното правобранителство, кое барало оштетно побарување, доставен е и поднесок со кој се бара пред главната расправа судот да даде можност за жалба, но и да го одбие доказот на наодот и мислењето од вештачењето доставен од страна на Обвинителството.
Адвокатите на Латас барале и второ дополнување на доказите, поднесок имало и вчера со дополнување докази со алтернативно мислење и со него се бара судот да одбие дел од доказите бидејќи, според одбраната, биле набавени на незаконски начин.
Овој совет на судии не нашол причини за одбивање на доказите ниту, пак, постоење причини за издвојување докази стекнати на незаконски начин. Судот остави можност во доказната постапка по однос на приговор за одреден доказ да одлучи со образложено решение. Воедно, судот смета дека дел од приговорот, кој се однесува за застареност на кривичното дело, веќе е ценет од друг совет.
„Денес ќе известиме кој ќе ги застапува правните лица“, рече адвокатката Светлана Савиќ, а на ова судијката укажа дека ако не го направи тоа, адвокат ќе биде поставен по службена должност. „Во ЗКП има и други одредби што се однесуваат на работата на советот. Ние како нивна одбрана поднесовме опширен поднесок, се надеваме дека од љубопитност ќе закаже седница. Ние во поднесокот кажавме дека има докази набавени на незаконит начин и имаме нееднаквост во орудијата, затоа бараме да бидат изземени“, рече адвокатката Светлана Савиќ.
За денешното рочиште не беа исполнети законските процедури бидејќи немаше претставници на правните лица. Судот закажа рочиште за главна расправа на 7 декември.
Во случајот „Тотал“ е обвинет новинарот и бизнисмен Драган Павловиќ – Латас заедно со три фирми: „Тотал маркетинг“ ДООЕЛ, „Тотал медија центар“ и „Медијамакс“, во кои тој се јавува како сопственик или управител.
Според обвинението, Латас во периодот од 2008 до 2015 година одбегнал плаќање данок. Тој и правните лица давале лажни податоци за даночните обврски – фирмите не плаќале данок, а обвинетиот и самиот одбегнал да плати данок. Латас како управител на компаниите ја намалил основицата за данок и не пријавил лични приходи. Тој набавката на опрема за себе ја евидентирал како опрема за фирмите, иако во фирмите немало вработени лица, односно во една фирма имало само еден вработен. Овие средства биле евидентирани како основни средства и тековни трошоци, а Латас ја намалил обврската и по основа на ДДВ. Износот за добра и набавени услуги осомничениот не го пријавил во годишната даночна пријава.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Бислимовски – Лорковски: Реформите во енергетиката мора да продолжат

Претседателот Марко Бислимовски, заедно со членовите и раководителите на секторите на Регулаторната комисија за енергетика, водни услуги и услуги за управување со комунален отпад (РКЕ) остварија средба со Артур Лорковски, директорот на Енергетската заедница.
Реформите во енергетиката мора да продолжат, континуитетот е клучен – фокусот да се задржи на активностите поврзани со интегрирање на пазарите за електрична енергија, нивна транспарентност и интегритет, како и неопходните реформи на пазарот со природен гас, што ќе обезбедат фер пристап за сите учесници, согласно новите европски мрежни правила – се сложија соговорниците.
Претседателот Бислимоски му се заблагодари на директорот Лорковски за позитивниот наратив за работата на РКЕ при презентацијата на Извештајот за имплементација на законодавството на Енергетската Заедница за 2024 година за државава во Собранието.
„Во очекување на новиот Закон за енергетика, РКЕ во соработка со Министерството за енергетика континуирано работи на подготовка за имплементација на новиот енергетски пакет. Интегрираниот пристап помеѓу сите чинители досега покажа дека е клучен за квалитетна и успешна регулатива, која ќе биде основа за развој на енергетските пазари . Капацитетите со кои располагаме, професионалниот тим кој се гради со години наназад и овој пат може да одговори на сите предизвици кои претстојат. “ изјава Марко Бислимоски, претседател на РКЕ
Лорковски посочи дека Енергетска Заедница ќе остане партнер во понатамошните процеси и дека стојат на располагање за поддршка во делот на креирање на подзаконските акти, откако ќе се донесе новиот закон за енергетика. Процесот на транспонирање на ЕУ правилата е клучно за да осигура работата на РКЕ за стратешките прашања поврзани со обезбедување на сигурна, стабилна и континуирана испорака на енергија.
Daily news
Измамници се претставувале како Бред Пит и навеле обожавателки да веруваат дека почнале романтична врска со него

Во Шпанија уапсени се пет лица кои изнудиле 325.000 евра од две жени претставувајќи се како познатиот американски актер Бред Пит, соопшти денеска МВР на таа земја на својата официјална веб-страница.
Во текот на истрагата се покажа дека криминалците контактирале со своите жртви преку веб-страница за обожаватели на американскиот актер, ја добиле нивната доверба и ги навеле да веруваат дека почнале романтична врска со Бред Пит.
Потоа со лажно претставување ги натерале жртвите да инвестираат во комерцијални проекти.
Daily news
Спаси жена што сакаше да скокне од мост, а со години бесплатно ги хранеше бездомниците: Џон Бон Џови ја враќа вербата во човештвото

Познатиот рокер Џон Бон Џови пред десетина дена беше тема на сите светски медиуми кога убеди непозната жена да не скокне од мост. Овој потег не е единствениот што ја докажува неговата емпатија и хуманост кон луѓето што не ги познава.
Џон Бон Џови, американскиот музичар и фронтмен на познатиот бенд „Бон Џови“, на пешачкиот мост го снимал спотот за песната The People’s House кога од другата страна на оградата забележал жена.
На снимките од надзорните камери што ги сподели локалната полиција може да се види како Џон со член на својата екипа ѝ приоѓа на потресена жена. Потоа се потпрел на оградата и почнал да разговара со неа повикувајќи ја да се врати на безбедно по што ѝ помогнал да се прекачи преку оградата.
Бон Џови потоа ја прегрна и тие стоеја така околу една минута пред заедно да одат по мостот.
Полицискиот оддел Метрополитен во Нешвил го сподели видеото на нивниот канал на „Јутјуб“ и рече дека пејачот ѝ помогнал на очајна жена.
Секоја чест за Џон Бон Џови и неговиот тим што ѝ помогнаа на една жена на пешачкиот мост „Сејгенталер“ во вторникот вечерта.
„Бон Џови успеа да ја убеди да се симне од платформата на мостот на реката Камберленд на безбедно“, објави полицијата на платформата X.
Обожавателите на рокерот не беа изненадени од неговиот потег. Имено, тој во 2011 година основал непрофитна организација, односно синџир ресторани, каде што немало ценовници, а плаќањето на сметката било опционално.