Daily news
Недела на современиот израелски филм во Кинотеката на Македонија

Во Кинотеката на Македонија, во соработка со израелскиот амбасадор во Македонија и Еврејската заедница во Република Македонија, од 2 до 6 декември ќе се одржи филмскиот циклус посветен на современиот израелски филм.
Ќе бидат прикажани 6 филма со превод на македонски јазик. Филмската ревија в сабота ќе биде отворена со филмот „Хармонија“ со две проекции од 19 и 21 часот во режија на Ори Сиван, филм што ја задржува посебната суштина на библиската приказна и додава интимна и човечка перспектива.
В недела ќе се прикажува документарниот филм „Посебна посета во Македонија“ во режија на Пјер Лави, кој ја документира посетата на делегација на лица со посебни потреби од Ерусалим во Македонија во септември 2016. Истиот режисер ќе се претстави со уште еден документарен филм в недела, а тоа е филмот „Кармелим во Македонија“, кој ја документира концертната тура во Македонија на трупата „Кармелим“ од школата „Лео Бак“ во Хаифа во јули 2016 година. В понеделник публиката ќе има можност да го гледа филмот „Татако“ во режија на Мени Јаеш, а филмот „Витлеем“ ќе биде прикажан во вторник. Филмскиот циклус ќе биде затворен в среда со документарниот филм „Најдобрите за мечување“ во режија на Лијат Мер.
Филмската критичарка Гена Теодосиевска вели: „Последниве 20-ина години израелскиот филм го привлече вниманието не само на критиката туку и на филмофилите и на публиката. Би рекла дека својата најголема меѓународна сатисфакција израелскиот филм ја доживува на најпознатите и најголеми филмски фестивали од највисока категорија во светот, на кои во која било програма е особено тешко да се влезе, а особено кога на нив ги добиваат и најпрестижните награди. Венеција, Берлин, Кан, Карлови Вари, Торонто, Монтреал, Шангај, Минхен, Локарно, Ротердам, Варшава, Битола… сè до Холивуд, со кој е несомнено поврзан првенствено преку големите американски продуценти, кои се во голем процент од еврејско потекло, а многумина од нив и им се враќаат на своите корени во Израел“. Додава дека фактот што сите шест филма се од понова продукција уште повеќе ја потврдува грижата на идејните творци на оваа селекција да нè угостат со визуелни доживувања, кои се привилегија за другите киноприкажувачи.
Амбасадорот Дан Оријан, пак, вели дека ќе продолжи да вложува посебни напори и да носи инспирација од Израел и истакнува дека инспирацијата од Македонија, каде што се чувствува како дома, и од Македонците е неговата главна задача тука.
Билетите за проекциите се бесплатни и може да ги резервирате од 16 до 19 часот на билетарницата на Кинотеката на Македонија на 02 3065 968. Резервираните билети може да се подигнат 30 минути пред почетокот на проекцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Бислимовски – Лорковски: Реформите во енергетиката мора да продолжат

Претседателот Марко Бислимовски, заедно со членовите и раководителите на секторите на Регулаторната комисија за енергетика, водни услуги и услуги за управување со комунален отпад (РКЕ) остварија средба со Артур Лорковски, директорот на Енергетската заедница.
Реформите во енергетиката мора да продолжат, континуитетот е клучен – фокусот да се задржи на активностите поврзани со интегрирање на пазарите за електрична енергија, нивна транспарентност и интегритет, како и неопходните реформи на пазарот со природен гас, што ќе обезбедат фер пристап за сите учесници, согласно новите европски мрежни правила – се сложија соговорниците.
Претседателот Бислимоски му се заблагодари на директорот Лорковски за позитивниот наратив за работата на РКЕ при презентацијата на Извештајот за имплементација на законодавството на Енергетската Заедница за 2024 година за државава во Собранието.
„Во очекување на новиот Закон за енергетика, РКЕ во соработка со Министерството за енергетика континуирано работи на подготовка за имплементација на новиот енергетски пакет. Интегрираниот пристап помеѓу сите чинители досега покажа дека е клучен за квалитетна и успешна регулатива, која ќе биде основа за развој на енергетските пазари . Капацитетите со кои располагаме, професионалниот тим кој се гради со години наназад и овој пат може да одговори на сите предизвици кои претстојат. “ изјава Марко Бислимоски, претседател на РКЕ
Лорковски посочи дека Енергетска Заедница ќе остане партнер во понатамошните процеси и дека стојат на располагање за поддршка во делот на креирање на подзаконските акти, откако ќе се донесе новиот закон за енергетика. Процесот на транспонирање на ЕУ правилата е клучно за да осигура работата на РКЕ за стратешките прашања поврзани со обезбедување на сигурна, стабилна и континуирана испорака на енергија.
Daily news
Измамници се претставувале како Бред Пит и навеле обожавателки да веруваат дека почнале романтична врска со него

Во Шпанија уапсени се пет лица кои изнудиле 325.000 евра од две жени претставувајќи се како познатиот американски актер Бред Пит, соопшти денеска МВР на таа земја на својата официјална веб-страница.
Во текот на истрагата се покажа дека криминалците контактирале со своите жртви преку веб-страница за обожаватели на американскиот актер, ја добиле нивната доверба и ги навеле да веруваат дека почнале романтична врска со Бред Пит.
Потоа со лажно претставување ги натерале жртвите да инвестираат во комерцијални проекти.
Daily news
Спаси жена што сакаше да скокне од мост, а со години бесплатно ги хранеше бездомниците: Џон Бон Џови ја враќа вербата во човештвото

Познатиот рокер Џон Бон Џови пред десетина дена беше тема на сите светски медиуми кога убеди непозната жена да не скокне од мост. Овој потег не е единствениот што ја докажува неговата емпатија и хуманост кон луѓето што не ги познава.
Џон Бон Џови, американскиот музичар и фронтмен на познатиот бенд „Бон Џови“, на пешачкиот мост го снимал спотот за песната The People’s House кога од другата страна на оградата забележал жена.
На снимките од надзорните камери што ги сподели локалната полиција може да се види како Џон со член на својата екипа ѝ приоѓа на потресена жена. Потоа се потпрел на оградата и почнал да разговара со неа повикувајќи ја да се врати на безбедно по што ѝ помогнал да се прекачи преку оградата.
Бон Џови потоа ја прегрна и тие стоеја така околу една минута пред заедно да одат по мостот.
Полицискиот оддел Метрополитен во Нешвил го сподели видеото на нивниот канал на „Јутјуб“ и рече дека пејачот ѝ помогнал на очајна жена.
Секоја чест за Џон Бон Џови и неговиот тим што ѝ помогнаа на една жена на пешачкиот мост „Сејгенталер“ во вторникот вечерта.
„Бон Џови успеа да ја убеди да се симне од платформата на мостот на реката Камберленд на безбедно“, објави полицијата на платформата X.
Обожавателите на рокерот не беа изненадени од неговиот потег. Имено, тој во 2011 година основал непрофитна организација, односно синџир ресторани, каде што немало ценовници, а плаќањето на сметката било опционално.