Daily news
НСДП: Последната битка на очајниците од ВМРО-ДПМНЕ
НСДП посочува дека во зенитот на своето политичко пустошење на државата Никола Груевски очајнички се обидува не само да се затскрива зад „народ“ туку истиот тој „народ“ да го жртвува, и по цена на човечки животи, ако тоа му носи бегство од судбината на криминалците во држава во која правото и правдата стануваат приоритети на новата власт.
„Токму тоа, владеењето на правото и возобновувањето на демократските принципи го туркаат да се затскрива по канцеларии, како Хитлер во бункерот во последните денови од падот на нацистичкиот режим.
Својот политички кукавичлак лидерот на ВМРО-ДПМЕН го демонстрира и во овие свои последни денови. Од Виена координираше со упадот на криминалците и убијците во Собранието, се врати од таму, почна да се затвора и да кова некакви наводни стратегии за спас на државата од канцеларии и да се повикува на ставови на граѓаните, во ситуација кога 67 пратеници ја артикулираат јасно изразената волја за промени на мнозинството граѓани на изборите од 11 декември. Точно е дека граѓаните се носители на суверенитетот, но точно е дека власта граѓаните ја остваруваат преку демократски избрани претставници (Член 2 од Уставот) – Груевски деновиве очајнички врши атак токму на оваа уставна одредба, како преку своите послушници во Собранието така и преку криминалци и убијци, грчевито обидувајќи се да ја оневозможи политичката реализација на оваа уставна обврска и демократска придобивка.
Познавајќи го неговиот политички табиет, нема да биде за изненадување доколку во очајничката игра продолжи со своите политички егзибиции, но тоа не е и не може да биде пречка за продолжување на отпочнатите процеси на демонтажа на режимот во Македонија.
НСДП смета дека новиот претседател на Собранието има целосен легалитет и легитимитет формално да го извести претседателот на државата, Ѓорге Иванов, дека во Собранието има парламентарно мнозинство за формирање Влада и веднаш да пристапи кон конституирање на извршната власт, независно од неговата одлука дали ќе го додели или не мандатот на Зоран Заев. Иванов се покажа и докажа како верен слуга на злосторничкото здружение, а не како претседател на сите граѓани кој своето политичко поведение го моделира според уставно дефинираните надлежности. Затоа нема да биде изненадување доколку Груевски сега повторно го искористи за да спречи граѓаните да ја остварат власта преку демократски избраните 67 пратеници. Поради тоа, исклучувањето на Иванов од процесите на формирање на извршната власт не го загрозува уставниот поредок туку напротив, тоа е во духот на демократијата и уставното дефинирање на државата како парламентарна демократија во која Собранието е централна институција. Легитимитетот на новата власт не може да биде загрозен од самоволието на криминалците и нивните слуги инсталирани во институциите на системот, процесите се отпочнати и во најбрз можен рок треба да финализираат со избор на нова, реформска Влада“, се наведува во соопштението на НСДП….крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.