Daily news
Презентирана училницата за специјална ЕВН-паралелка во средното училиште „Михајло Пупин”
Во средното електротехничко училиште „Михајло Пупин“ денеска беше презентирана новата училница за специјална ЕВН-паралелка, реализирана во рамките на проектот „20/20/20“. На настанот присуствуваа министерката за образование, Рената Дескоска, и претседателот на Управниот одбор на „ЕВН Македонија“, Штефан Петер.
Дескоска истакна дека денешниот настан всушност претставува промоција на програмата за средното стручно образование во кое има директно поврзување на училиштата со општествено одговорните компании.
„Ова е модел што се надевам дека ќе го следат и други компании во Република Македонија, каде што имаме директно поврзување на компаниите со училиштата, при што овие училишта и ученици добија можност практично да ја изучуваат својата следна професија, да им се обезбеди пракса како во училиштата така и во компанијата, а потоа што е исклучително позитивно е што на нив им е загарантирано вработување по завршувањето на училиштето“, потенцира Дескоска.
Таа додаде дека поврзувањето меѓу средните училишта и компаниите е особено значајно заради тоа што целта на средното стручно образование е да едуцира ученици што ќе бидат спремни да влезат на пазарот на трудот по нивното завршување.
Ваквите образовни програми, според Дескоска, овозможуваат полесно идно вработување и треба да бидат мотивација за идните средношколци што се соочуваат со дилемата какво образование тие треба да изберат.
„Мислам дека овие ученици што денеска ги гледате тука како вредно го изучуваат својот занает треба да бидат мотивација за идните средношколци кои имаат дилема какво образование да изберат, да сфатат дека побарувачката на пазарот на трудот ги насочува кон средното стручно образование кое треба да им овозможи полесно идно вработување“, изјави Дескоска.
Министерката Дескоска се заблагодари на ЕВН за нивното учество во проектот и овозможувањето стекнување практични знаења на учениците во текот на средното стручно образование и уште еднаш ги охрабри другите компании од земјата да го следат овој позитивен пример.
Гаранцијата за вработување, квалитетот и стекнувањето практични вештини што оваа програма ги нуди веќе охрабрила голем број ученици да се запишат на оваа програма, па така од првично предвидените 20 места, во специјалната ЕВН-паралелка се запишале повеќе од 30 ученици.
Проектот „20/20/20“ функционира на принципите на таканареченото дуално средно стручно образование и овозможува директно вклучување во работниот процес и вработување на 20-те најдобри ученици, кои по завршувањето на формалното образование во 2020 година ќе бидат веднаш вработени во ЕВН и ќе заработуваат почетна плата од 20 илјади денари месечно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.