Изјавата што денска ја даде владиниот портпарол, а се однесува на стопирање на снимањето на серијата „Македонија“ поради констатирани нерегуларности, предизвика реакција кај продуцетот Винко Грубишиќ од „Јадран филм“. Тој на јавноста ѝ се обрати преку соопштение и го тврди спротивното, најавува дека серијата се снима и ќе биде завршена, а во буџетот на Македонија ќе се вратат 200.000 долари од нејзината дистибуција.

„Во оваа пригода ви се обраќаме во врска со последните информации објавени во јавноста за проектот на играната серија „Македонија“, кои се далеку од вистината, а наша цел е да ја запознаеме македонската јавност со вистинските факти и аргументи. А тоа е следното:

„Јасно е видливо дека некој од свои причини на сосема некоректен начин погрешно ја информирал Владата на РМ. Тоа е отидено толку далеку што дури и портпаролот на Владата на денешната прес-конференција изнесе сосема неточна констатација дека воопшто не сме ја снимале серијата. Тоа е потполна невистина за што јавноста ќе ја увериме во спротивното. Поради оваа објавена невистина, ние многу порано од тоа што планиравме на интернет ќе објавиме делови од снимениот материјал сè со цел да ја докажеме вистината и да покажеме дека некој неточно ја информирал Владата. Сметаме дека после тоа имаме полно право да очекуваме дека оние што свесно и намерно ја измамиле Владата треба да одговараат за предизвиканата штета.

Според Грубишиќ, не е вистина дека средствата се потрошени ненаменски.

„Сите потрошени средства што се доделени од страна на Агенцијата за филм се наменски и не постои никаков доказ кој говори спротивно на ова! Истовремено, информираме дека целосниот финансиски извештај јасно покажува дека доделените средства се трошени во согласност со одредбите од договорот и Законот за филмската дејност – строго наменски за потребите на претпродукција и продукција на првата сезона од серијата.

Од„Јадран филм“ ветуваат дека јавно ќе објават каде и како е потрошен секој денар и тврдат дека во серијата исто така вложиле и вложуваат сопствени средства.

„Бараме пред членовите на Владата на РМ да ги презентираме сите документи и целиот проект, вклучувајќи ги и доказите што јасно потврдуваат кој и зошто ги измамил Владата и целата македонска јавност. Ова што се случува е само кулминација на предизвиците и пречките со кои екипата на серијата е изложена веќе подолго време. За овие пречки набргу ќе ја известиме целата македонска јавност“.

Од продуцијата жалат што проектот за серијата „Македонија“ е изложен на негативна кампања.

„Поради сето ова, изминатиов период веќе презедовме низа правни и други заштитни мерки и поведовме постапки пред надлежни органи и институции. Серијата ја подготвуваме веќе една и пол година. Во нејзината реализација работеа и работат голем број соработници од Република Македонија и од целиот свет. Концептот на серијата континуирано добива неподелени позитивни критики во Македонија и светот за што говори и фактот за веќе договорената дистрибуција во 9 земји во светот“.

Меѓу другото, во соопштението од „Јадран филм“ се вели дека серијата од нејзината дистрибуција ќе врати повеќе од 200.000 долари.

„Исто така, се гордееме на фактот дека серијата ‘Македонија’ ќе биде прикажана во целиот свет, што е една од стратешките цели на овој проект. Во договор и согласност со соработниците ние јавно ќе ги објавиме и сите елементи на буџетот и тоа ќе го побараме од сите копродуценти. Немаме што да криеме. Тоа ќе го направиме и за динамиката на снимање, која спротивно од изнесените информации е поинаку договорена – за што исто така имаме докази што ќе ги објавиме“, стои во соопштението.

Наводно, деновиве ќе бидат објавени и трејлерот и крајот на снимањето, па сите ќе се увериме за каква и колкава продукција станува збор.

„Тие што на ваков начин се обидуваат да ги измамат Владата на РМ и македонската јавност добро знаат дека со закочување на продукцијата може само да се изгуби огромна сума финансиски средства и со намерно предизвикан скандал да се нанесе штета од несогледливи размери со огромен број судски спорови. Но, ние сме тука и гарантираме дека серијата се снима и ќе биде завршена“.

„Македонија“, вели Грубишиќ, е навистина посебна љубовна приказна. „Серијата е исто како и македонското општество, инклузивна и отворена и во неа на секој начин учествуваат сите што творат во македонското општество. Драматуршката структура на серија во серија потсетува на рашомонијада и во никој случај нема никаква врска со тензичната интерпретација за која се шпекулира во јавноста. Во тоа сами ќе се уверат гледачите во Македонија и светот“, тврди тој.