Исцрпени, удирани и денеска во болки и згрозени од глетките кои долго нема да можат да ги избришат од свеста, а кои не можеа ниту да претпостават дека може да им се случат додека ја извршувале професионалната задача, сведочат за вчерашните настани во Собранието. Сите новинари и сниматели при налетот на хулиганите бегале кој каде ќе стигне, се криеле по канцелариите на Собрание, зборувале тивко, се координирале како да излезат. Сликите наликувале на сериозна заложничка драма, уште повеќе што безумните насилници се однесувале непредвидливо.

На сите страни летале микрофони, камери, мобилни телефони, сталаци за камери па „за оружје“ бил употребуван и дел од ентериерот на Собранието, како столови, маси и друго.

Сите се согласни дека во тоа безредие немало трошка здрав разум, а во апсолутната анархија се спасувал кој како знае и умее. Оние кои ги нападнале, прво прашувале од кој медиум се, за потоа наводно да направат проценка кој е за тепање а кој не“.

Новинарот Кристијан Ландов од редакцијата на Макфакс бил најправо заплашуван со вербални закани и провокации:

Демонстрант кој стоеше покрај мене ми се обрати со Гнасо шиптарско соросоидска, од ТВ21 си, а? Има да те лежам, излегувај одма од овде заашто мртов ќе те носат“, ова е само краток дел од целата трагедија, вели Ландов. „Тешко, болно и налудничаво чувство. Не знаеш како да помогнеш. Доаѓаш до момент да влечеш пратенички затоа што само тоа ти преостанува доколу сакаш не сакаш да гледаш како страдаат. Крвнички напад. Цицање до последна капка. Болно и тоа премногу! Те ставаат во карантин додека не дојде полиција да те спаси. Хорор филм!

Покрај многуте напади, еден ми остана в памет, продолжува Ландов „Меѓу демонстрантите имам пријатели, ги знам. Не е до нив. Над нив е. Не сум никој и ништо да правдам некого. Но, по ваквите напади и физички пресметки, сфаќам на кое дереџе сме. Најниско. Ова што денес го видов, разбуди револт. Огромен. Слика која не се заборава. Она што ни остана додека спасувавме жива глава беше да се надеваме дека сите се живи и здрави. А за криминали, се одговара. Во суд. Истиот оној кој функционира врз основа на законодавниот дом, кој денес го претворивте во кланица.Кое подобро утро?“

Новинарот на агенцијата „Мета“ Димитар Тануров го искуси истото. Откако го прашале за кого работи, почнале да го тепаат со тупаници и клоци.

„Бев нападнат додека фотографирав како тепаат други околу мене. Ме нападнаа кога дознаа дека работам за Мета новинска агенција. Ме легнаа на земја и со клоци и тупаници ме удираа најсилно што може. Ми го одзедоа и телефонот, сведочи Тануров.

Снимателот на „Макфакс“ Никола Ордески, кој моментно е хоспитализиран во Клинички центар, е во стабилна состојба по здобиените удари по глава. Претрпел голема траума и благ потрес на мозокот.

„Иако се обидував да се сокријам, невозможно беше да се побегне. Додека снимав добив удар позади, во нозете и во главата. Се соземав некако и сакав да продолжам да снимам, но ме спречи вртоглавица. Ми помогнаа колегите и заминав на ургентен. Не бев ни свесен колку е сериозно, кога во текот на ноќта имав страшни болки и повраќав. Оваа состојба не се опишува, а потресните сцени уште долго ќе ми бидат во сеќавање“, вели 21-годишниот Ордески кого го водел репортерскиот инстикт да ја пренесе вистината на јавноста.

Новинарките на телевизијата 24 Вести, Душица Мрѓа и Наташа Стојановска, кои со часови се обидувале да се засолнат и, за среќа, поминаа неповредени, сведочат дека насилниците маскирани со црни капи, точно знаеле каде одат и со каква цел.

„Од тоа што можеше да се види, евидентно е дека насилниците беа координирани. Се движеа низ Собранието со јасна цел и намера. Знаеја од каде влегуваат и каде треба да излезат додека сите други, особено новинарите бараа начин како да спасат жива глава“.

До овој момент официјалната бројка на повредени новинари е десетмина од кои двајца со потешки последици. крај/мф/ав