Daily news
Серија кривични дела на крвавиот четврток во Собранието – Коневски: Бев да видам што се случува
Градоначалникот на општина Аеродром, Ивица Коневски беше еден од државните фунцкионери кои на крвавиот четврток беа во зградата на Собранието . Тој, заедно со пратеничката од СДСМ, Фросина Ташевска-Ременски и адвокатите Сашо Дуковски и Александар Наков гостуваа во Топ Тема-На ваша страна. Откако Коневски, беше запрашан што правел тој ден во Собранието, градоначалникот најпрво го осуди насилството, а потоа кажа дека педесет дена бил дел од протестите на „За заедничка Македонија“
„Јас влегов подоцна, откако завршија немилите настани. Прочитав на интернет дека се случуваат немилите настани, па пробав да видам што се случува, но не успеав од полицијата и големиот број на граѓани да стигнам онаму каде се случуваа тие настани и излегов надвор“, вели Коневски.
Откако Градоначалниот на општина Аеродром, ги обвини пратениците на СДСМ, дека извршиле политичко насилство во Законодавниот дом, Фросина Ташевска-Ременски го запраша, а потоа и го корегираше, што по дефиниција значи тоа.
„Политичкото насилство се дефинира како индиректна или директна закана кон личности и групи како политички опоненти, во различни облици на психо-физичко малтретирање, терор, вооружен бунт, тероризам и сите форми кои што ги гледавме на 27 април во Собранието. Ако веќе зборуваме што барале овие луѓе, а јас слушнав дека оние кои влегоа во пленарната сала заедно со вашите пратеници прогласија народно Собрание, поттикнати од Никола Груевски си презедоа самовластие своите раце. Овие се избрани претставници на народот?! Ако зборуваме за повикот за одбрана на Република Македонија, Никола Груевски, Ѓорге Иванов, Трајко Вељановски, Митко Чавков и другите, испуштија многу важна работа, непочитувањето на институциите кои што се задолжени за гарантирање на безбедноста на граѓание и одбрана на Македонија. Тогаш, се прогласува воена состојба, а не го зема народот она што не му следува, а во овој случај видовме зема многу за право“, вели Ременски во репликата упатена до Коневски.
Адвокатот Дуковски се согласи со Ивица Коневски дека законот треба да важи еднакво за сите.
„Апсилутно не е доволно што некој изразил доволно, тоа што некој изразил жалење. Сега влегле граѓани, блиски до ВМРО бидејќи не биле задоволни поради начинот на кој што била прекршена процедурата и бил избран претседатеот на Собрание. По истиот тој резон, еден ден кога СДСМ повторно ќе биде опозиција и нема да биде задоволна од нешто што го направило ВМРО, ќе викне свој луѓе и ќе се случат убиства. Значи, една модерна правна држава не може така да функционира. Тоа е срам за Македонија. Ниедна работа во светов не е толку света, за вие да влезете и физички да ликвидирате човек, па макар да е чистачка во Собранието, а не пак пратеници. Каков е тој излив на насилство и милион кривични дела? Случајно ја гледав снимката кај што го влечат Зијадин Села, а тоа ме потсети кога го убиваа Гадафи и тоа било учество во толпа. Морам да кажам, ова е најсрамниот ден за македонската полиција. Овде немаше владеење на право, ниту било каква свест“, вели адвокатот Сашо Дуковски.
Адвокатот Александар Наков во Топ Тема, рече дека како македонец, но и како христијанин се згрозил од настаните, кој како што вели, станало јасно дека се претходно испланирани.
„За мене е важно правото и владеењето на правото. Тој ден, внатре имаше анархија. Не влегуваа луѓе, туку орли кои беа спремни да убиваат. Дури, за тоа се води истрага. Ќе дојдат до сознанија и ќе видите дека биле спремни, бидејќи имаше оружје по подот, имаше шипки по подот и други работи кои што укажуваа на спремноста на луѓето за тоа како да реагираат спрема противникот. Таму во целост потфрли полицијата, на чело со Чавков. Јас тој човек не можам да го гледам никако, освен во најскоро време како затвореник во Шутка. Како поранешен јавен обвинител, се срамам од моите колеги, бидејќи тие имаат залутано во обвинителството. Зврлевски и Ѓешковска треба час поскоро да си одат, а тоа ќе биде корисно за државата. Тие се заштитници на криминалот во Македонија“, вели поранешниот јавен обвинител, сега адвокат, Алексадар Наков.
Наков вели дека имало сторено серија на кривични дела, како што се обид за убиство, насилство, тешки телесни повреди итн. Според него, кога работите се гледале од страна, се посочувало кон тоа дека работите можеле да бидат фатални./крај/мф/кл
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.