Трговијата со луѓе звучи како нешто од средниот век, од времето кога цивилизациите се криеле зад превезот на незнаењето, кога човекот на човек бил волк и се искористувале сите можни карактеристики на секое лице и секој дел од човечкото тело како ресурси, како производ. Кога некој денес ќе слушне за постоењето на трговија со луѓе го прифаќа тоа со доза на скептичност, со убедување дека општеството е толку напреднато и дека тоа не може да се случува во модерно време.

Последните испитувања покажуваат дека бројката на лица со кои се тргува е 10 пати поголема од официјалната. Минатата година во Македонија 6 лица беа жртви на трговијата луѓе, додека во соседните држави се идентификувани 100 – 150 лица. Најголемиот број, 99% од жртвите на трговија со луѓе се деца. Колку и да звучи неверојатно, трговијата со луѓе е нешто се случува во нашето општество и во нашата заедница. Скоро секој си помислува дека заедницата дава се од себе да ја искорени трговијата со луѓе, но најважно е секој да биде вклучен и да ги препознае знаците на искористување кај другите. Жртвите седат во темнината на вистината и ретко кој ја има храброста да им ја отвори вратата и да ги изведе на правиот пат. Затоа ја споделуваме приказната за ………. преку призмата на Отворена Порта (Ла Страда).

Мајката на 15 годишното девојче ………. се јави на СОС линијата на Отворена Порта пред некое време и со забележлив очај во нејзиниот глас побара да се помогне на нејзината ќерка. Семејството на ………. е во тешка состојба. Нејзината мајка не работи, а нејзиниот татко е алкохоличар. Тие долго време се разведени и живеат одвоено. Одреден период живееле од производство на тутун, но тоа сега не е опција. Тешката работа и сиромаштијата ја натерале ………. да се вработи како келнерка. Со помош на една жена од родниот град (која има испратено 10ина девојчиња на слична работа) таа успеала да се вработи и со надеж сега ќе добива солидна плата. ………. во текот на овие случувања не ја информирала мајка си за тоа што го прави.
………. првиот пат исчезнала во Октомври. Нејзината мајка го пријавила нејзиното исчезнување во полиција и во центарот за социјална работа. ………. по некое време се јавила на мајка си и кажала дека е во друг град и дека работи во некој ноќен бар. Мајката веднаш пријавила во полиција. По некое време ………. се вратила сама дома.
………. исчезнала по втор пат на почетокот на Јануари и ја немало 5 недели по што нејзината мајка повторно пријавила во полицијата и во центарот за социјална работа. После 5 недели ………. се вратила дома. Сопственикот на барот ја оставил на автобуската станица и ја испратил да се врати дома. Веднаш по нејзиното враќање ………. била сместена во медицинска установа и таму била задржана два и пол месеци. Таму ………. добила здравствена нега и е утврдено дека има сексуално преносливи болести, а дека е психолошки здрава и дека има натпросечно ниво на интелигенција. Сопственикот на ноќниот бар дознал каде е и заедно со едно друго девојче сакал да ја посети ама не успеал.
По некое време ………. се вратила дома и повторно бил остварен контакт со сопственикот на барот по што таа пак исчезнала. Повторно, мајката со истиот страв и очај ја пријавила ………. како исчезната во полицијата, центарот за социјална работа и во Отворена Порта (Ла Страда). Со заеднички сили институциите и организацијата успеаја да ја вратат дома.
Тимот од Отворена Порта бил кај 15 годишното девојче и таа им рекла дека не постои никаков проблем и дека нејзината работа е нормална и дека не е присилена да прави нешто што не сака. На крајот од разговорот ………. прифатила редовно да се среќава со Отворена Порта. На тимот нешто му било сомнително имајќи во предвид дека таа истата приказна, со истите реченици и зборови, им ја кажала на полицијата и на социјалниот работник.
На втората средба ………. полека почнала отворено да зборува со тимот на Отворена Порта, но се што кажувала било во кратки реченици и било очигледно дека била преплашена и под притисок. Подоцна ………. раскажала што точно се случило во барот.
Приказната на ……….
По нејзиното пристигнување во барот жената која и ја нашла работата исчезнала. По една недела работа во барот сопственикот и рекол да забавува некои од гостите. Се било во ред се додека еден од нив не почнал да ја допира, а останатите да ја навредуваат со вулгарни зборови. ………. се пожалила на сопственикот и тој и рекол дека тоа и е работа и дека ако сака да зима пари од време на време мора да се навикне на „работната средина“. Таа никогаш не добила пари. Наместо пари сопственикот на барот и купувал провокативна облека, кратки здолништа и слично. На почетокот ………. одбивала да ја носи облеката и да ги забавува гостите и поради тоа била казнувана. Првото одбивање на „работните обврски“ завршило со едночасовно мачење, при што ………. била тепана со палка. Поради повредите таа морала да остане во кревет две недели.
Во барот со неа работеле и други малолетни девојчиња. Тие биле присилени да работат како проститутки, биле злоставувани, тепани и омаловажувани.
Еден ден сопственикот и рекол на ………. дека прави многу проблеми и ја прашувал дали се јавила на мајка си. Тој и дал мобилен телефон и ѝ рекол дека може да се врати дома, но дека мора да му се јавува на секој час за да ја проверува дали се однесува како што треба. Тој и кажал што да каже на полицијата и на другите. Тој се заканил на ………. дека ако не се однесува така како што тој сака дека ќе ја најде и дека ќе ја убие неа и нејзината мајка. Ова се повторувало секојпат кога ………. ќе се вратела дома.
………. додека била во барот спиела преку ден и работела навечер. Силувањата се повторувале постојано. Една вечер еден од гостите и дал мобилен телефон и таа се јавила на мајка си и ја молела да направи нешто и да ја спаси. Тоа бил последниот повик и ………. беше спасена.
По 4 средби и советувања со тимот на Отворена Порта ………. се чувствувала похрабро и почнала да соработува. ………. сака да продолжи со образованието, но не во сопствениот град. Таа се запиша во училиште во друг град и продолжи да доаѓа на советувања.
………. може да е Вашата ќерка или син, децата на соседите и познаниците чии насмевки никако да се појават на нивните лица. Таа може да е дел од Вашиот град и заедница и Вие да не го забележувате огнот кој се гаси во тие што се уништени од трговијата со луѓе. Отворете ги очите и пуштете ја светлината кај лицата кои страдаат. Урнете ја призмата на оправдување, откријте ги симптомите на трговијата со луѓе и помогнете им на тие кои им е најпотребно.
Запознајте се повеќе со трговијата со луѓе и на начинот на кој може да им помогнете на жртвите на официјалната веб страна и официјалниот Фејсбук профил на Отворена Порта (Ла Страда):

https://www.facebook.com/OpenGateMacedonia/
http://www.lastrada.org.mk/index.php