Daily news
Шпигл: Роналдо потпишувал фалсификувани документи
Најдобриот светски фудбалер, Кристијано Роналдо, бi можел да се најде во големи проблеми бидејќи е откриен начинот на кој наводно избегнал да плати данок. Против Португалецот шпанските даночни власти покренаа постапка и тој треба пред судот да даде исказ на 31 јули.
Кристијано Роналдо е обвинет дека избегнал да плати данок во износ од 15 милиони евра, во периодот од 2011 до 2014 година. Наводно, тој во наведениот период приходите од продажбата на правата за користење на неговите фотографии ги скрил на Девствените Oстрови.
Германскиот весник „Шпигл“, во соработка со организацијата „Фудбал ликс“, која се занимава со откривање на разни договори во светот на фудбалот, ја открива шемата по кој Португалецот ги криел парите.
„Фудбал ликс“ дошол до инкриминирачки документи кои откриваат дека Кристијано Роналдо преку „офшор“ компании на Девствените Oстрови ја сокрил споменатата сума.
Во договорот помеѓу Португалецот и компанијата „Толин“, која се занимава со регистрирање приходи, стои дека приходите од огласувањето во периодот помеѓу 2009 и 2014 година ќе пристигнуваат на сметка која е отворена на Девствените Острови. Роналдо, во текот на истрагата, на властите им го открил овој договор.
Меѓутоа „Фудбал ликс“. го открива нацрт договорот во кој пишува дека треба да биде внесено дека сметката „постои од 2008 година“, кога договорот бил потпишан.
Уште една индикација дека „работите не се чисти“ е и преписката од јуни 2009 година, според која приходите на Роналдо и понатаму оделе преку британската компанија за продажба на фотографии, иако во тој момент, според договорот кој лично го потпишал, тие права требало да одат преку компанијата „Толин“.
„Според шпанскиот закон, ваков начин на работење се смета за измама“, истакнал адвокатот, чија специјалност е економија, Рафаел Виљена.
Ова во превод значи дека напаѓачот на Реал потпишувал фалсификувани документи.
„Шпигл“, пак, истакнува дека адвокатите се обиделе да ја изманипулираат јавноста со тврдењето дека во 2004 година не се случила промена во работењето на „Толин“. Адвокатите говореле дури и дека Управата за јавни приходи на Велика Британија, бидејќи Роналдо играл во Манчестер Јунајтед до 2009 година, извршила контрола и заклучила дека сè е чисто.
„Роналдо имал добра совест и немал никаква намера да затаи данок“.
Сепак, документите до кои дошол „Фидбал ликс“ покажуваат поинаква вистина. Неговите придонеси, нешто што Португалецот не спомнал, припаѓаат на „Броктон фондацијата“ од Панама, чиј основач е неговата мајка.
Приходите од реклами во 2004 година се префрлени во „Толин“, но само од остатокот од светот, а не и од Велика Британија. Тековите на парите целосно оделе низ „Толин“ само во декември 2008 година, како што покажуваат документите тој целосно ја сменил корпоративната структура, што е спротивно од она што го тврдат адвокатите.
„Шпигл“ се обидел да добие одговор од Кристијано и неговиот адвокатски тим, но тие не сакале да го коментираат случајот. н.ц.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.