Daily news
Чипсот содржи канцерогени состојки
Спротивно на широко признатото мислење, секој чипс не е направен од компири. Така, на пример, некои видови чипс се всушност мешавина од пченица, ориз, пченка и компиров скроб.
Како што објаснува доктор Џозеф Меркола, професор на Универзитетот во Илиноис, смесата од наведените состојки се меси, потоа се сечат парчиња што се обликуваат во форма на чипс, се пржат во зејтин, се сушат и на крај се попрскуваат со различни вкусови во прав.
Доктор Меркола предупредува дека постапката на пржење на чипсот на висока температура всушност создава штетен канцероген нуспродукт кој се вика акриламид.
Акриламидот е штетен и потенцијално токсичен спој кој настанува кога храната богата со јаглехидрати се пржи на висока температура, над 100 степени. По пржењето, површината на храната добива жолта или смеѓа боја, а токму тоа е знак дека се формирале акриламиди, пишува drmercola.com.
Чипсот содржи големи количини маснотии и калории што може да го зголемат ризикот од дебелеење. Околу 30 грама чипс, што е отприлика е 15 до 20 парчиња чипс, содржат околу 10 грама масти и 154 калории.
Студија од 2011 година објавена во магазинот „The New England Journal of Medicine” откри дека секојдневното конзумирање на 30 грама чипс доведува до просечно зголемување на телесната тежина од еден килограм во текот на четири години.
Врската меѓу дебелеењето и чипсот е посилна отколку врската меѓу дебелеењето и било кој друг прехранбен производ. Освен тоа, прекумерната тежина се поврзува со зголемен ризик од дијабетес, срцеви болести и некои видови карцином, пишува healthyeating.sfgate.com.
Натриумот во чипсот може негативно да влијае на кардиоваскуларниот систем што може да предизвика зголемување на крвниот притисок, мозочен удар, коронарни срцеви болести и болести на бубрезите. 30 грама чипс содржи меѓу 120 и 180 милиграми натриум. Една вреќичка чипс има повеќе од 30 грама, така што многумина кога јадат чипс внесуваат повеќе натриум отколку што се свесни. Според едно истражување од 2010 година, дневниот внес на сол треба да се ограничи на 2.3000 милиграми, а оние над 50 годишна возраст и кои имаат проблеми со бубрезите, крвниот притисок или дијабет дневниот внес на сол треба да го ограничат на 1.500 милиграми.
Честата конзумација на чипс може да доведе и до холестерол, поради количината и видовите на масти што ги содржи.
Здрава варијанта на чипсот се пуканките и чипс од зеленчук или јаболки кои имаат помалку маснотии и натриум.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.