Daily news
Лекувањето на деца епилептичари со канабиноид покажало одлични резултати
Програмата за едногодишно лекување на 23 деца заболени од епилепсија со редовни дози синтетички канабиноид, која ја спроведувале во Педијатриската клиника во Љубана, покажало одлични резултати, па е одлучено таа и натаму да се спроведува, а се размислува и за можноста да биде достапна и за другите, пишува во петокот еден од водечките словенечки дневни весници Delo.
Во Словенија епилепсија е дијагностицирана кај околу 2.500 деца и малолетни лица, а кај некои, како епилептичарите кои биле вклучени во експерименталната програма, вообичаените антиепилептички лекови не биле делотворни.
„Со примената на доза синтетичкиот канабидиол (CBD), кој е присутен и во природниот коноп, епилептичните напади кај седум деца вклучени во програмата потполно исчезнале, кај четири подобрувањето на здравствената состојба е 90-процентна, а кај четири е 50-отстотна. За другите четири мали пациенти сé уште нема дефинитивни резултати, додека само три не реагирале на третманот и немало подобрувања“, изјавил за Delo, др Давид Ноебауер, од клиничкиот оддел за неврологија кај млади на споменатата љубљанска клиника.
Студијата направена врз основа на програмата покажала дека негативни споредни ефекти во таквото лекување воопшто немало. Затоа националниот здравствен завод се согласил периодот во кој малите пациенти ќе добиваат дози канабоиди да се продолжи на уште две години и ги признава трошоците за таквото лекување. Врз основа на истражувањето таквото лекување ќе се признава и за другите епилептичари меѓу младата популација, кај коишто вообичаените фармацевтски лекови не делуваат.
Напоредно со оваа програма, се спроведувала и програма за други млади пациенти, на којашто инсистирале нивните родители, и во која било применето лекување со природни лекови и медицински коноп. Во оваа програма биле вклучени 14 деца, а епилептичните напади престанале кај повеќе од половината, пишува весникот, но се додава дека за популаризација и поширока примена на ваквата метода постојат проблеми кои не се решени.
Едномесечната терапија со канабоноиди во Словенија чини меѓу 600 и 800 евра, а големи отпори во однос на примената на канабоноидите во лекувањето на епилепсијата и некои други болести постои токму во медицинската струка, односно кај специјалистите невролози, наведува Delo.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.