Култура
Изложба на Мирјана Крстева Массетти во Куманово
Изложба на цртежи и слики на авторката Мирјана Крстева Массетти, ќе биде отворена во четврток, 27 мај, во изложбениот салон на Националната установа Центар за култура “Трајко Прокопиев“ во Куманово
„Клепсидра со ѕвезден песок“ на Мирјана Крстева Массетти донесува на показ еден нов свет кој вечно истечува низ клепсидрата на времето. Одминува, но постојано е овде како вечна сегашност, како миг во бескрајот“, пишува критиката за нејзините дела.„Детска искреност низ сликарството на жена“ , ќе забележи Мирјана.
Таа потрага по апсолутот извира од длабоко запретаните архетипи. Таа потрага по хармонијата на боите виолетови, небесно сини и чудесно зелени претставува борба меѓу свечената светлина и темното. Сликите се креации на духот и таму кајшто постои тој не повторува,туку ја возобновува уметноста.„Ги цртам нештата за кои на јаве не се зборува.Можеби тоа ги прави моите слики езотерични, но верувајте, тие зрачат со искреност“, вели Крстева-Массетти.Овие сознајби на Мирјана Крстева Массетти укажуваат дека секоја нејзина слика е прашање, но истовремено и одговор на суштинските филозофски теми за човековите Тајни, неоткриени светови, космички вистини, бескрајот на убавината, и за морската тишина на душата.Патувањето на сликарката низ необјатните станици на Универзумот значат потрага по неостварените мечти, мимикрија во бело, љубов, млечната светлина и надежта. Свети се сликите, света е Тајната, ѕвездените мигови, свето е детството,невестинскиот фустан, света е авторовата приказна за вистината, убавината, за девствениот Извор и нестварното Море, света е вербата, затоа што само она што е свето, вечно трае…“Изложбата во Куманово ќе биде поставена до 10 јуни 2010 година.Мирјана Крстева Массети живее и работи во Гевгелија. Родена е 1979 во Скопје. Дипломирала на Академијата за ликовна уметност во Благоевград – Бугарија, на отсекот за графика во класата на проф. Борислав Стоев.
Член е на Мултимедијален центар – невладина организација за развој и унапредување на културата, организирање на културни случувања и едукација за уметноста. Во моментот е претседател на Друштвото на ликовни уметници во Гевгелија. Има учествувано на повеќе групни изложби, проекти и колонии, а има реализирано и неколку самостојни изложби – 2003 Македонија (Гевгелија); 2004 Романија (Тимисуара) и 2006 Македонија (Гевгелија).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Кинотека ќе биде прикажан грчкиот филм „Што ако“
Грчкиот филм „Што ако“ (What If) во режија на Христофорос Папакаљатис, ќе биде прикажан вечер во 20 часот во Кинотека.
Прикажувањето на филмот е дел од тековната серија проекции на грчки филмови на Амбасадата на Грција, со наслов „Ајде да се запознаеме“, иницијатива која има цел да ја приближи публиката до современата грчка кинематографија.
Филмот „Што ако“ е трогателна романтична драма од креаторот на светски признатата серија на „Нетфликс“ – Маестро во сина. Дејството на филмот се одвива во Атина во периодот на економската криза и ја следува приказната на Димитрис, 33-годишен ерген, кој живее навидум обичен живот. Една вечер, кога неговото куче, женка германски овчар со име Лоунсом, го поттикнува да излезе, Димитрис се соочува со клучна одлука: да излезе или да остане дома. Ако излезе, ќе ја запознае Христина, љубовта на својот живот; ако остане дома, ќе ја пропушти шансата да ја сретне. Филмот ги истражува вечните прашања за судбината, вистинската љубов и изборот прикажувајќи го истовремено и влијанието на сериозната економска криза врз луѓето и личните односи. Истата приказна е раскажана од две перспективи.
Влезот за проекцијата во Кинотека е бесплатен по принципот прв дојден – прв услужен. Филмот е наменет за лица над 16 години, информираат од амбасадата.
Култура
Почина Кетрин О’Хара
Почина Кетрин О’Хара, легендарна актерка и ѕвезда на серијата Schitt’s Creek и култните филмови Бубимир и Сам дома. Имала 71 година, а веста ја потврдила нејзината менаџерка, пренесе „Пипл“. Засега не се соопштени дополнителни детали.
О’Хара е родена во Торонто во 1954 година и кариерата ја започнала во легендарниот комичарски театар Second City, а потоа стекнала голема популарност со телевизиската емисија SCTV, за која освоила и награда „Еми“.
Филмската публика ја памети по улогите во Бубимир, Сам дома и Сам дома 2, како и по бројни филмови на режисерот Кристофер Гест. Глобална популарност доживеа со улогата на Моура Роуз во Schitt’s Creek, за која во 2020 година освои „Еми“, „Златен глобус“ и награда SAG.
Последните години гостуваше во серии и филмови, меѓу кои The Last of Us и Argylle.
Зад себе ги остави сопругот Бо Велч и нивните два сина.
Фото: скриншот од филмот „Сам дома“
Култура
Почина поетот и преведувач Тихомир Јанчовски
На 58-годишна возраст денеска во Скопје почина поетот и преведувач Тихомир Јанчовски.
Веста за неговото прерано заминување ја соопшти Друштво на писателите на Македонија, изразувајќи длабоко жалење за загубата на еден од најзначајните современи македонски автори и педагози.
Од Друштвото информираат дека за точниот датум и час за испраќање последен поздрав ќе следи дополнително известување.
Јанчовски беше поет, писател, преведувач, професор, музичар, издавач, автор на над триесет книги, пред сè поезија, преводи и (поетски) романи, како и една книга историја („Историја на православното монаштво на територијата на денешна Република Македонија“, Сигмапрес, Скопје, 2010).
Избори од неговата поезија се преведувани и објавувани во различни литературни списанија, застапен е во голем број антологии, а четири од неговите книги се преведени на други јазици. Преведуван е на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик. Тихомир Јанчовски, со својата автентичност и креативност останува еден од најомилените наставници на повеќе генерации средношколци во гимназијата „Орце Николов“, во меѓународното училиште „Нова“ и во Американската гимназија во Скопје.

