По учеството во Официјалната конкуренција на Канскиот филмски фестивал и на фестивалите во Сараево, Конкорто во Италија, Батуми и Сванети во Грузија, Тирана, Рејкјавик, Монпелје и Солун, филмот „Северен Пол” на Марија Апчевска-Петровска, во продукција на Кино око ќе биде дел од Официјалната конкуренција на уште еден фестивал од А-категорија. Со проекција на 17 ноември, филмот ќе биде прикажан на Black Nights Film Festival (PÖFF) во Талин.

Од 2019 година Black Nights Film Festival (PÖFF Shorts) е член на Европска филмска академија (EFA) и на секое издание фестивалот кандидира еден краток филм во изборот за Европски филмски награди. Исто така, овој фестивал секоја година номинира и филм за наградата на Британската академија за филм и телевизија (BAFTA).

По овој фестивал, во текот на ноември следува учество на фестивалот во Стокхолм и други европски и светски фестивали.

Главните улоги ги толкуваат: Антонија Белазелкоска и Лука Митев. Директор на фотографија Влатко Самоиловски, костимограф Билјана Гргур, сценограф Кирил Спасески, монтажер Драган Вон Петровиќ, шминка Горан Игњатовски, дизајн на тон Игор Поповски и Бојан Паликуќа, кастинг-директор Киријана А. Николоска. Продуцент на филмот е Роберт Насков.

Филмот е во продукција на „Кино око” во копродукција со „Сервиа филм” и „Форгрејд” од Србија и „Тиволи продукција” од Унгарија. Финансиски е подржан од Агенцијата за филм на Северна Македонија и Српскиот филмски центар.

Комисијата за избор на македонски кандидат за наградата “Оскар за најдобар долгометражен интернационален филм” го одбра филмот „Сестри“ во режија на Дина Дума, за оваа награда за 2022 година.

Одлуката ја донесе Друштвото на филмските работници на Македонија во состав: Дејан Димески – кинематографер и претседател на Комисијата, Роберт Јанкуловски – фотограф и кинематографер, Петар Богоевски – дизајнер на светло, Несрин Таир – актерка, Снежана Поњевиќ – Муча – сценографка, Александар Пејовски – композитор и Дритон Вејсели – актер.

Во конкуренција за кандидатурата беше и филмот: „Исчезнатиот“ во режија на Арбен Тачи.

Американската Академија за подвижни слики, уметност и наука објави дека 94-та церемонија за доделување на Оскарите ќе се одржи во недела, 27 март 2022 година, во Лос Анџелес.

„Никогаш не е многу од мостови на Балканот“, вели македонскиот режисер Милчо Манчевски во интервју за еден од најстарите и најчитани италијански весници „Кориере дела сера“. Манчевски е специјален гостин во Рим на Балканскиот филмски фестивал, кој вечерва се отвора со неговиот филм „Врба“.

„На сите ни требаат мостови, бидејќи, Бог знае, секаде има многу немирни води. Само глупави или лоши луѓе можат да палат мостови, но – како што гледаме – има многу глупави и лоши луѓе. Уметноста – по нејзината природа – обично презема да биде мост помеѓу луѓето и народите. Не сум утопист, но убаво е да се знае дека постојат луѓе што создаваат работи што можат да ви го стоплат срцето“, одговара Манчевски на прашањето има ли денес мост, можеби метафоричен, кој го поврзува Балканот.

На прашањето како се смени погледот на балканската кинематографија во последните триесет години и што кажува денес македонската и балканската кинематографија, кој е нивниот фокус, Манчевски вели: „Би било многу дрско од мене да се обидам да зборувам во име на балканската кинематографија. Повеќе ме интересираат индивидуални филмови и индивидуални уметници отколку географските фиоки“.

Манчевски е многу ценет уметник во Италија, а неговото присуство во Рим е проследено со големо медиумско внимание. Освен проекцијата на „Врба“, Манчевски ќе има и разговор со публиката на Балканскиот филмски фестивал.

Во октомври 2019 „Врба“ имаше светска премиера на големиот Римски филмски фестивал, а во изминативе две години освои вкупно 5 трофеи, постигна рекорди во кино и ТВ-прикажувањето дома, доби одлични критики во светските медиуми, се прикажа на над 20 фестивали на четири континенти, беше вброен и во потесниот избор за наградите на Европската филмска академија и е еден од малкуте европски филмови со дистрибуција во САД.

Манчевски е во тек на монтажата на неговиот седми филм „Кајмак“, што тој го нарекува „безобразна комедија“. Продукцијата „Банана филм“ го најавува „Кајмак“ како црна комедија (или среќна трагедија) за две семејства, кои се пристојни на почетокот, а среќни на крајот, безмилосна критика на лицемерието и малограѓанштината.

„Кајмак“ е европска копродукција во која 52 проценти од средствата доаѓаат од филмските фондови на Данска, Холандија, Хрватска и Бугарија, а 48 проценти од Македонија, од Агенцијата за филм на Северна Македонија. Македонската радио-телевизија (МРТВ) е копродуцент. „Кајмак“ доби поддршка и од европскиот фонд Еуримаж. Се снимаше летото во Скопје и околината, а во меѓународната екипа беа вклучени филмски работници од Македонија, Англија, Италија и Србија, Бугарија и Хрватска.