Цела година антикорупциската комисија одбива да отвори предмет против директорот на Агенцијата за разузнавање, Еролд Муслиу, иако до институцијата се доставени три приговори за постоење судир на интереси во работата на Агенцијата, соопшти Левицата.

„Според сомневањата, Муслиу спротивно на Законот за спречување на корупцијата го вработил лицето Васко Шутаров, кој претходно бил ангажиран во невладината организација ‘Нексус’, каде што извршна директорка е токму неговата сопруга – Афродита Муслиу. Ако се разгледаат извештаите на оваа невладина организација, речиси и да нема никаква разлика со владината пропаганда за шиканирање неистомисленици.

Дополнително, против Муслиу е поднесен приговор дека без распишување јавен оглас во Агенцијата го вработил лицето Фуат Стафа, брат на државниот правобранител Фехми Стафа. Ако се има предвид фактот дека Државниот правобранител ја застапува Агенцијата за разузнавање за работни спорови иницирани од вработени во Агенцијата, евидентна е намерата за влијание врз оваа установа и загрозување на правата на вработените.

Уште минатата година од кабинетот на претседателот Пендаровски под плаштот за наводна загриженост за работата на безбедносните служби упатија апел антикорупциската комисија да ги разгледа овие наводи и да утврди дали постои одговорност кај директорот Муслиу. И покрај сериозните обвинувања за незаконско работење и одавање државни тајни со кое се компромитира работата на безбедносните служби, антикорупциската комисија цела година одбива да отвори предмет против Еролд Муслиу и да преземе соодветни дејства преку кои ќе ги потврди или отфли наведените сомнежи.

Токму почетокот на работењето на антикорупциската комисија го бележеше засилено отворање предмети по разни пријави, што резултира со нејзина привидна ефикасност, која во јавноста ги третира помалите корупциски скандали на сметка на покрупните афери. Професионалноста и објективноста на оваа комисија е евидентно нарушена, со оглед на тоа дека комисијата, без речиси никакви административни филтри, експресно поведува иницијативи против функционери што не се дел од оваа власт, а кои често се отфрлени поради нивната недоволна правна поткрепеност. Молкот и непостапувањето за прекршувања на законите од страна на највисок функционер на институција е јасен доказ дека и оваа комисија е узурпирана од интересите на власта и претставува продолжена рака за штитење на нејзините криминали, без никакви санкции за сторителите“, се наведува во реакцијата на партијата.