Македонија
Антовски: Власта со ново зголемување на цената на струјата од 1 јануари, од 2017 до сега цената е зголемена 50 отсто
Ново зголемување на цената на струјата од 1 јануари поради СДС и ДУИ, вели членот на Комисијата за енергетика на ВМРО-ДПМНЕ, Стевче Антовски.
„Со доаѓањето на власт на СДС и ДУИ, освен покачување на цената на струјата, не добивме ништо друго. Од 2017 година до денес цената на струјата е зголемена 50 %, но по логиката на СДС, важно нема радиодифузна такса. Станавме земја со уништени енергетски капацитети, која најлошо се снајде во енергетската криза, без доволно домашно производство. Енергетските компании опстануваат единствено преку префрлање пари од буџетот директно во нив за потоа во сметките за електрична енергија да има информации колку Владата нè ‘субвенционирала’. Ама, за жал, од нашите пари“, вели тој.
Како што посочува, додека сè уште сме во шок од масовна партизација и предизборниот поткуп на гласачи со полнење на „Електрани на Македонија“ со речиси 500 вработени, следува нов шок, но овој пат од страна на Регулаторната комисија за енергетика.
„Се зголемува цената на електричната енергија за третиот и четвртиот блок! Во оваа група се наоѓаат повеќето од граѓаните на Македонија, кои се греат на струја, поради тоа што немаат пристап до гас или топлинска енергија за греење. Во средината на декември беше најавена новата измислена давачка на Марко Бислимоски т.н. давачка за пристап на мрежа, кој не е ништо друго, освен нов товар за граѓаните на Македонија, кои едвај врзуваат крај со крај. Овој пат оваа давачка ќе ги удри оние што најмногу штедат. Иако се обидуваат покачувањето на цената да го замаскираат преку нови давачки и покачување на цената во блоковите, секое домаќинство знае дека од 2017 година наваму цената на струјата е покачена речиси 50 %. Од тогаш до сега видовме уништување на енергетските капацитети, погрешна стратегија во енергетиката и пораст на цените на сите производи како резултат на порастот на цената на струјата. Прашуваме: Дали РКЕ непромислено избрза со идејата за враќање на евтината тарифа, па сега измисли нов начин како да ги собере парите назад од граѓаните преку давачката наречена пристап на мрежа и преку зголемување на цената на струјата во третиот и четвртиот блок? Затоа народот на изборите во мај 2024 година ќе мора да ја казни оваа власт со цел да се врати енергетиката на вистинскиот пат. Никогаш не било полошо. Важно е да ги поразиме“, завршува Антовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Села: Не е во ред тоа што се потенцира ДУИ, коалицијата е Европски фронт, од 9 партии
Зијадин Села од Алијанса за Албанците во интервју за Трилинг по изборите и изборните резултати и случувања, вели дека се работи за изборен инжинеринг и закрупнување на неколку политички сили. Според Села, не е во ред тоа што се потенцира ДУИ, коалицијата е Европски фронт, од 9 партии.
„Тука се најглавните албански партии. А дали сме подготвени за во опозиција, по демократските правила, тоа не го кажувааат политичките чинители, тоа го кажува народот, кој гласаше на 8 мај за Европскиот фронт да презема одговорности и да биде дел од власта“, вели Села.
Тој смета дека „погрешна е дефиницијата за коалицирање победник со победник, треба да е мандатар со победник. Победникот од македонската страна е дефиниран со Устав. Демографската реалност е за да има стабилност и да одиме напред, треба да се испочитува волјата на втората етничка заедница која е 30%, наспроти 54% кои се Македонците, според последниот попис“.
Додава дека Владата треба „да се изјасни во врска со обидот за изборен инженеринг. Според Пржинскиот договор, на техничкиот премиер е да обезбеди фер и демократски избори. Тие не се надвор од одлуките кои се носат во ДИК и Управен суд. Техничката влада е договор на најголемите политички партии“.
За тоа како Европскиот фронт ќе се однесува како опозиција во Собранието, Села вели „треба да се почитува желбата на граѓаните, не на Мицкоски. Ние ќе се однесуваме сразмерно на тоа како ќе биде решено. Не сакам да коментирам желби. Од ДИК се уште не се објавени мандатите, кој колку има. Се уште Мицкоски не е мандатар“.
Македонија
Денес малку сонце, па облачно, попладне нестабилно со пороен дожд и грмежи
Времето денес ќе биде сончево и топло со мала до умерена облачност. Ќе дува слаб до умерен ветер од јужен правец. Попладне наместа, особено во северните делови ќе биде нестабилно со пороен дожд и грмежи, а ќе има и услови за краткотрајно невреме со силен ветер и изолирана појава на град.
Во Скопје сончево и топло со мала до умерена облачност. Попладне во делови од котлината ќе биде нестабилно со пороен дожд и грмежи, а ќе има и услови за краткотрајно невреме. Минималната температура ќе се спушти до 10, а максималната ќе достигне до 27 степени.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.