Македонија
Во Судскиот совет ништо ново: додека се бараат оставки од сите членови – тие избираат нови, се алармира дека изборот ќе донесе негативни последици
Гласните критики од правната фела, реакциите на невладините организации и странскиот фактор, но и барањата за распуштање – не допреа до Судскиот совет. Највисокото тело, од кое еден член се повлече поради незаконски одлуки, а друг поради превирања, сега избира судии што ќе ги заменат. Во трката се тројца кандидати: врховниот судија Наке Георгиев и кавадаречкиот судија Лазар Нанев, за кои имаше претставки за утврдување одговорност поради нестручно работење, а трета е судијката Антонета Димовска од Граѓанскиот суд, чија сестра е пратеничка, а таа има долгогодишна судиска кариера.
Дарко Аврамовски, извршниот директор на „Коалиција за правично судење“, организација што ја следи работата на Судскиот совет, за „Макфакс“ посочува дека кредибилитетот на ова тело е загубен. Распуштање е излез од состојбата. Изборот на нови членови нема да донесе унапредување на состојбите, додава тој.
„Имајќи ги предвид случувањата во Судскиот совет изминатиот период, ‘Коалицијата за правично судење’, заедно со дваесетина други граѓански организации од Платформата за борба против корупцијата и ‘Блупринт групата за реформи во правосудството’, истакна дека Судскиот совет ги има загубено својот легитимитет и кредибилитет. Во согласност со тоа, сметаме дека најсоодветното решение за излез од оваа состојба е распуштање и промена на составот на Советот, како и промена на законските одредби, кои се однесуваат на начинот на кој се избираат членови на Советот, поради што ги повикавме членовите на Советот да поднесат оставки. Двајца членови на Советот во меѓувреме покажаа достоинство и интегритет и поднесоа оставки, меѓутоа сметаме дека промена на само двајца членови на Советот нема да придонесе за да се зајакне легитимитетот на ова тело, туку, напротив, сметаме дека може само да биде контаминиран интегритетот на новите членови, кои се нафаќаат да бидат дел од тело што не работи во согласност со законот, а кое воедно ја има најголемата одговорност за обезбедување независност и професионалност на судската власт. Во таа насока, сметаме дека изборот на двајца нови членови во Судскиот совет нема да придонесе кон унапредување на состојбите, туку, напротив, може да има само дополнителни несакани последици за репутацијата на судството. Изборите дополнително се проблематични ако се има предвид дека, според анкетата на ОБСЕ, дури три четвртини од судиите немаат доверба во Судскиот совет. Поради ова, остануваме на ставот дека е неопходно да се распушти Советот и да бидат направени законски измени на постапката за избор на членови во него пред да бидат спроведени ваквите избори“, вели Аврамовски за „Макфакс“.
Изборите доаѓаат во време кога највисокото судско тело е цел на критичната јавност. Министерот за правда Кренар Лога предложи негово распуштање. Премиерот Димитар Ковачевски порача дека треба ремонт. Невладините организации, меѓу кои и „Коалицијата за правично судење“, побараа сите членови да поднесат оставки. Холандија стави во мирување проект со Судскиот совет поради скандалите.
Кандидатската листа дополнително влијаеше негативно врз рејтингот на ова тело откога се дозна дека на кандидатот Наке Георгиев му била запрена постапка за утврдување одговорност непосредно пред да бара доверба за да биде член на Судскиот совет. Вториот кандидат, судијата Лазар Нанев, немал комплетна документација, но мнозинството членови гласале тоа да не биде пречка за тој да остане кандидат. Нанев истовремено е судијата што навиваше на трибини со ексминистерот за правда, Никола Тупанчески, и обвинителката Фатиме Фетаи, на сметка на ФФМ. Забелешката кај кандидатката Антонета Димовска е што е сестра на пратеничката од СДСМ, Снежана Калеска-Ванчева, но нема дисциплински и постапки за утврдување одговорност. Димовска важи и за критичар на судството, која потенцира дека му е потребна реформа.
Судскиот совет, кој брои 15 члена, изминатиот период се соочи со голем број критики во јавноста. Сè почна со писмото на Амбасадата на САД, во кое беа изразени загриженоста и разочараноста при постапувањето на судовите. Потоа почнаа караниците на седниците. Потпретседателот Селим Адеми рече дека тогашната претседателка Весна Дамева го криела писмото и за него дознале од медиумите. Таа се правдаше дека била на одмор и тој требало да го презентира писмото.
По ова, следуваше разрешување на Дамева. На јавна седница за нејзина смена гласаа седум члена. Потоа, во четири ѕида, била повлечена одлуката за разрешување на Дамева со седум гласа, па повторно се гласало и со девет гласа ја тргнале од функцијата. Сашко Георгиев, новиот избран претседател, уште неседнат, рече дека свесно била исклучена јавноста.
Жестоки реакции имаше и од правната фела, кои констатираа низа нерегуларности.
Критики упати и холандскиот амбасадор, кој го оцени ова тело како нелегитимно, а набргу потоа, пред речиси еден месец, судиите Зоран Герасимовски и Мирјана Радевска-Стефкова поднесоа оставки од функциите членови на Судскиот совет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

