Македонија
Грковска: Неопходна е поголема одговорност на финансиските друштва и поголема контрола врз издавањето на брзите кредити
![](https://makfax.com.mk/wp-content/uploads/2023/09/11092023_ZPVRSM_Grkovska_1.jpg)
Заменичката на претседателот на Владата задолжена за политики за добро владеење, Славица Грковска, денеска одржа координативен состанок со надлежните институции и претставници на Групација на небанкарски финансиски друштва, со цел да се преземат брзи и зајакнати мерки за справување со злоупотребата на личните податоци на граѓаните и нивно незаконско задолжување со таканаречените „брзи кредити“.
На состанокот присуствуваа министерот за внатрешни работи, Оливер Спасовски, заменик министерот за финансии, Филип Николовски, вицегувернерката на Народната банка на Република Северна Македонија, Ана Митреска, заменичката на Народниот правобранител, Соња Трифуновска, директорот на Агенцијата за заштита на лични податоци, Имер Алиу, како и претставници на Групација на небанкарски финансиски друштва.
Грковска нагласи дека е неопходен координиран и ефикасен пристап на сите надлежни институции, но и зголемена одговорност за финансиските друштва со цел да се спречат сите можности за натамошни злоупотреби со брзите кредити кои директно се вршат на грбот на граѓаните.
Како што информираше министерот за внатрешни работи Спасовски, во 2022 година евидентирани се 43 случаи на злоупотреба на лични податоци/измами со брзи кредити, за што до Основното јавно обвинителство поднесени се 16 кривични пријави за 24 сторители. Од почетокот на оваа година заклучно со месец јули пријавени се 65 случаи на вакви злоупотреби, за кои, по преземени мерки и активности поднесени се девет кривични пријави, а во рамки на реализираните случаи кривично се пријавени 15 сторители.
Директорот на Агенцијата за заштита на личните податоци Алиу, информираше дека во Агенцијата во 2023 година, граѓаните имаат поднесено пет барања за утврдување на повреда на правото на заштита на нивните лични податоци при процес на спроведување на брз кредит. Во однос на сите барања спроведени се вонредни супервизии од страна на Секторот за супервизија и во сите случаи утврдени се повреди по правото на заштита на личните податоци. Во претходната 2022 година, имало вкупно 1 пријава, додека пак во 2021 година имало седум пријави.
И покрај преземените чекори и изрекување на казни од страна на АЗЛП и покренати кривични постапки од страна на МВР, неподелено е мислењето дека неопходно е итно зајакнување на механизмите за контрола на идентитетот на барателите на брзи кредити и зголемување на транспарентноста на финансиските друштва од една страна, и брза имплементација на новите законски решенија со кои се зајакнати критериумите за работење на финансиските друштва.
Од тие причини, беше заклучено финансиските друштва во рок од еден месец да спроведат соодветна едукација на вработените за примена на системот на идентификација при воспоставување деловен однос, согласно Законот за спречување на перење пари и финансирање на тероризам. Истовремено, финансиските друштва се должни да утврдат процедура за постапување со која ќе се гарантира дека податоците од личните документи соодветствуваат со лицето кое што е барател на кредитот.
Во однос на онлајн аплицирањето, потребна е идентификација на клиентот и потврдување на неговиот идентитет со користење на документи, податоци и информации од сигурни и независни извори, вклучително и со употреба на средства за електронска идентификација издадени во рамки на регистрирана шема за електронска идентификација на високо ниво на сигурност согласно со Законот за електронски документи, електронска идентификација и доверливи услуги.
Во насока на зајакнување на транспарентноста, во рок од три дена финансиските друштва на своите веб страни треба да ги објават тарифниците за трошоци за брзи кредити усогласени со новото законско решение кое ја лимитира вкупната сума за тарифирање, а по истекот на тој рок Министерството за финансии да изврши контрола. За оние финансиски друштва што нема да ги објават тарифниците, предвидени се казни согласно Закон.
На состанокот меѓудругото беше заклучено дека Министерството за финансии во рок од 30 дена треба да подготви подзаконски акти за подобра операционализација на новото законско решение, кои ќе овозможат надминување на детектираните слабости.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
(Видео) Ограда од надвозник падна во Автокоманда, откорнати се дрвја, поплавени улици, делови од Скопје останаа без струја
![](https://makfax.com.mk/wp-content/uploads/2024/06/ograda-avtokomanda1.jpg)
Ограда од мост падна кај Автокоманда, колони возила останаа заглавени. Ваква е сликата по невремето што попладнево го зафати Скопје.
Граѓаните апелираат да не се користи влезот во Скопје преку Автокоманда бидејќи патот е целосно блoкиран, а градските служби во моментот се на терен.
Истовремено блокирани се надвозници кај Бутел и паднати се дрвја на повеќе места. Поплавени се улици во Чаир, Ченто, кај Пластичарска.
Според првичните информации во повеќе делови од градот дошло до прекин на електричната енергија, а собраниската седница, на која треба да биде избрана новата влада, е прекината откако снема струја во зградата на Парламентот. Во моментов е дадена пауза.
Невреме проследено со силен дожд, град и електрични празнења попладнево ги зафати Скопје и Тетово.
Македонија
(Видео) Мисајловски: Ќе го вратиме достоинството на Армијата – ветувам инвестиции во објектите, нова опрема, поголеми плати и подобри услови за работа
![](https://makfax.com.mk/wp-content/uploads/2024/06/misajlovski.jpg)
Од секогаш се борев за Македонија, државата ми е водилка и чест ми е кога народот ме бира, но сега честа е неизмерна, затоа што ќе раководам со министерството во кое секој еден припадник е спремен да даде се за Македонија. Ова го истакна Владо Мисајловски, потпретседател на ВМРО-ДПМНЕ и предлог министер за одбрана.
„Гордост е да се биде на чело на Министерството за одбрана. Уште поголема е обврската.
Со години Армијата беше оставена на маргините. Време е тоа да се промени.
Ветувам враќање на достоинството на Армијата. Ветувам инвестиции во објектите на АРМ, нова опрема, подобри услови за работа, поголеми плати. Ветувам дека ќе се грижам за луѓето кои се грижат за нас целиот свој живот.
Ќе се ангажирам посветено. Армијата ќе биде огледало за државата. Како НАТО членка треба да знаеме дека Армијата е најголем амбасадор на државата, од семинари, до обуки, тренинзи и вежби со сојузничките армии.
Македонија ќе биде горда на својата Армија. Македонија за тебе. За сите нас. Почнуваме“, рече Мисајловски.
Македонија
(Видео) Перински: Ќе работиме на проекти кои ќе значат решенија на долгогодишните проблеми
![](https://makfax.com.mk/wp-content/uploads/2024/06/perinski.jpg)
Во животот секогаш сум се борел за успех. Ова се ретките прилики кога може да се создава за народот и државата, истакна Златко Перински, предлог министер за локална самоуправа во новата Влада.
„Долги години секој од вас даваше за државата, време е таа да ви врати. Како министер за локална самоуправа заедно со општините ќе работиме на создавање на проекти и вредности кои ќе значат решенија на долгогодишните проблеми.
Ќе се борам за секој еден проект и секој еден од вас ќе има пристап до мене и ќе има отвореност од моја страна за секој ваш предлог или проблем.
Следуваат многу убави работиз нови проекти за локалниот развој. Мора да ја смениме сликата за почитиката затоа што институциите ви перпаѓаат вам.
Апатијата, разочараноста ја чувствуваме сите, во хаосот кој го наследуваме од претходниците за жал живееме сите. Ние сме дел од вас, јас сум дел од вас, и секој мој чекор ќе биде за вас. за тебе! Затоа што заслужуватеш повеќе затоа што мораме повеќе! Македонија ќе биде повторно твоја!“, вели Перински.