Македонија
Организациската директорка, која не ги потпиша платите во Заводот за физикална, на друго место ќе ја врши истата функција, Меџити испитува за злоупотребите

Миранда Шабани, досегашната директорка на Заводот за физикална медицина и рехабилитација во Скопје, која не ги потпиша платите на вработените оти на списокот имало лица што не се појавиле на работа, повторно ќе биде организациска директорка, но во друга институција. Шабани целокупната документација за злоупотреби во Заводот ја испратила до Министерството за здравство, кое вчера во кусо соопштение извести и за пристигнатите наводи за злоупотреби, но и за тоа дека Шабани повеќе не е директорка оти ѝ истекол мандатот.
Денес, министерот Меџити објасни дека мандатот на Шабани ѝ истекол пред неколку дена, но и дека веќе има нова директорска позиција.
„Мандатот на организациската директорка ѝ беше истечен пред неколку дена и, нормално, со сите консултации, па и со самата директорка, одлучивме да ја назначиме на друго место да продолжи како директор, како организациски директор. Информиран сум за случајот за наводните злоупотреби што ги кажала директорката. Тоа ќе го испитаме, веќе го правиме и ќе имаме конкретен одговор. Дали имало злоупотреби или не, ќе докажат нашите контроли“, рече министерот Меџити, но не кажа каде е распределена Шабани.
Директорката Шабани им се извини на сите вработени во Заводот за доцнењето на платата и објасни дека откога ги забележала на платен список лицата што никогаш не се појавиле на работа, не смеела да дозволи да се оштети буџетот на институцијата. Таа не кажа зошто токму сега, на истек на мандатот, јавила за злоупотребите, но рече дека на функцијата била шест месеци, кои ѝ биле доволни да ги увиди злоупотребите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Времето денеска ќе биде сончево и многу топло, од утре засилен северен ветер, пороен дожд и грмежи

Времето денеска ќе биде сончево и многу топло со мала до умерена локална облачност. Ќе дува слаб до умерен ветер од јужен правец. Минималните температури ќе се движат од 11 до 19, а максималните од 26 до 38 степени.
Во Скопје, сончево и многу топло со мала до умерена облачност. Ќе дува слаб со умерен ветер од јужен правец. Минималната температура ќе биде 17, а максималната ќе достигне 38 степени.
УХМР информира дека од утре времето ќе биде сончево со мала до умерена облачност. Ќе дува умерен до засилен северен ветер, а дневната температура ќе опадне за 3 до 5 степени. Во попладневните часови ќе има услови за локална појава на нестабилност со пороен дожд и грмежи.
Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.