Македонија
Единствена Македонија го исклучи од партијата Стефан Влахов Мицов

Извршниот комитет на Единствена Македонија во средата го исклучи од партијата Стефан Влахов Мицов поради докази и факти дека Влахов-Мицов дејствувал на начин кој не одговара на неговиот политички статус во партијата, соопштија од Единствена Македонија. Како што велат од партијата, Владата на Бранко Црвенковски своевремено го назначила Влахов-Мицов на работа во Македонскиот културен центар во Софија, каде имал задача по линијата на работа – македонски врховизам на македонската тајна служба да ги обработува Македонците во Пиринска Македонија. Подоцна, како што се наведува, Влахов Мицов е префрлен во Скопје каде со потпис на тогашниот премиер Црвенковски добива на користење државен стан и вработување во буџетскта институција, а за возврат ја продолжува соработката со тајната служба.
Во периодот на ребрендирањето на Единствена Македонија, а власта уплашена од ориентацијата на партијата за сојуз со Русија која народот масовно ја прифаќа, државната безбедност го инфилтрира Мицов во партијата со цел минирање на кључните партиски активности, заради што е исклучен поради неколку причини:
„По задача Влахов – Мицов се залагаше да не ги подриме и да не излегуваме на протестите пред Собранието во месец јуни, а протестирачите како на пример, Преродба, Македониум, Македонски манифест, Светскиот македонски конгрес, поединци интелектуалци ги етикетираше со најпогрдни зборови за да биде убедлив дека нема потреба од никаква соработка и активност на партијата, да се чекало до септември кога ќе започнала Третата светска војна, но, дојде и септември и ништо не се случи. Дури, се противеше да нема ниту соопштенија и прес конференции, што значи извршувал задача партијата да биде што помалку активна.
По задача Влахов-Мицов беше жесток противник за формирање на Кризниот штаб „Македонија – Бојкотира„ со голем број партии и здруженија. Кога виде дека обединување е направено и Кризниот штаб е оформен, во последен момент неговите ментори го праќаат изненандно на средбата меѓу претседателот Бачев, Солза Грчева од Глас за Македонија, Љупчо Палевски од Трета партија на Македонците и Филип Петровски од Демократската фракција на ВМРО-ДПМНЕ каде Мицов прави скандал и тоа во јавен локал со неконтролирана кавга со Грчева на лична основа, со цел да спречи по задача семакедонско обединување. И навистина службата успееја преку Мицов со наменската кавга. По ова, Грчева Палевски и Петровски се повлекоа од Кризниот штаб кој за волја на вистината ќе имаше поголема тежина дококу на митинзите на „Македонија-Бојкотира„ во 20-дневната кампања беа со нас Грчева, Палевски и Петровски.
Влахов Мицов бараше Извршниот комитет да донесе одлука за формирање на воено крило во партијата иако знаеше што се е потребно за такво нешто, но, инсистираше барем да имаме одлука и сега станува јасно дека доколку имавме таква формална одлука тајната полиција ќе имаше законска основа да го уапси целото раководство на Единствена Македонија.
Стефан Влахов Мицов на лице место беше фатен како по задача на тајната служба треба оперативно да покрие еден настан на претседателот Бачев во пријателска амбасада иако дури се работеше само за церемонијален настан.
Во текот на референдумската кампања, од Австралија дојде претставник на македонскиот бизнисмен од Австралија Илија Андонов да се запознае со кампањата и во разговорот спомна дека се надева оти парите што ги пуштиле завршија работа во кампањата, на што, зачудено му беше одговорено за какви пари зборува, по што излезе дека парите за референдумот се пуштени на банкарската сметка на Мицов оти истиот рекол наводно така било договорено. Но такви пари никојпат не дојдоа во Кризниот штаб, што значи дека Мицов проневерил и украл пари за референдумската кампања, заради што, се поставува принципеилено прашање – ако Мицов се продал и украл пари кои беа за борба за светото македонско име, односно, да спречиме референдумот да не успее, тогаш што може да се очекува од овој човек кога би бил власт и кога странските центри би му понудиле поткуп во милиони евра?!
Одлуката за исклучување на Мицов ја објавуваме по три дена, од причина што, Мицов беше присутен на Извршниот комитет при исклучувањето каде лично му беа дадени доказите и фактите за неговата дејност против партијата, по што возврати со една реченица дека и тој имал некакви докази, по што претседателот Бачев ја прекина седницата и побара од Мицов на следната седница на Извршниот комитет да покаже се што има, но, Мицов, наместо да донесе некакви докази вчера излезе на еден портал со некакво отворено писмо со лаги, клевети, навреди со цел да го оцрни по задача претседателот Бачев. И толку. Значи излажа, а што може да се очекува од еден кодош на службата која патем му издејстувала и Зоран Заев да ја потпише одлуката Мицов и понатаму да го користи владиниот државен стан доделен своевремено од Црвенковски и да зема плата од буџетска институција.
Како и да е, марионетската влада во Скопје ја отвори и последната карта преку соработници на тајната служба да ја ослабне Единствена Македонија. Тајната служба нема да му помогне на Заев, процесот е тргнат и ништо повеќе не може да ја сопре Единствена Македонија да ја оставри јасно изразената намера на македонскиот народ и поголем дел од граѓаните за историскиот стратешки сојуз со Русија.
Место во Единствена Македонија за оние кои сакаат да имаат двојна улога, да бидат политичари и соработници на тајната служба, повеќе нема да има, Стефан Влахоб Мицов е исклучен, бидејќи ние влегуваме во завршна битка со власта“ се наведува во соопштението од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предложен притвор за таткото што тепаше играчи на фудбалскиот натпревар во Штип

Основното јавно обвинителство Штип денеска поведе итна постапка против едно лице за кривично дело – Насилство.
Осомничениот извршил грубо насилство на 24 август на стадионот „Бело Брдо“ во Штип, за време на фудбалски натпревар меѓу младинските екипи на фудбалските клубови „Брегалница“ и „Шкупи“.
Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на осомничениот, кој играл за „Шкупи“.
Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот.
Јавниот обвинител до судијата на претходна постапка од Основниот суд во Штип поднесе предлог за определување мерка притвор за осомничениот, имајќи го предвид видот и сериозноста на кривичното дело против јавниот ред, опасноста од бегство на осомничениот и можноста за повторување на делото.
Македонија
Седум пожари денеска во Македонија, три изгаснати

На територијата на Македонија имаше вкупно седум пожари на отворен простор, од кои два се активни, два се под контрола и изгаснати се три пожари, информира Центарот за управување со кризи.
Активни се еден пожар во Општина Долнени, во село Долгаец каде гори мешана шума и еден пожар на влезот на Крушево каде гори депонија.
Под контрола е пожарот во Јасен, и еден пожар на планината Кожуф каде гори висока шума.
Изгаснати се пожари во Општина Штип: с. Судик (стрниште); Општина Дебар: с. Елевци (ниска вегетација) и во Општина Куманово: нас. Гоце Делчев (ниска вегетација).
Македонија
ВМРО-ДПМНЕ почнува со кампања за собирање предлози од граѓаните

Од среда, 27 август, ВМРО-ДПМНЕ ќе почне седумдневна теренска кампања за собирање на идеи и предлози за проекти од граѓаните, кои ќе бидат опфатени во програмите на кандидатите за градоначалници.
Од 27 август до 3 септември во временски период од 17 до 21 часот, во сите општини низ државата, на плоштадите или прометните локации во истите ќе бидат поставени штандови дел од акцијата „Предложи! Вистинската идеја за вашата општина!“ каде граѓаните на посебен формулар за оваа акција ќе можат да напишаат своја идеја која сакаат да ја видат реализирана како проект од идните градоначалници на ВМРО-ДПМНЕ.
Во истиот временски интервал ќе бидат отворени и сите штабови низ државата каде членовите на партијата и граѓаните исто така ќе може да ја дадат својата идеја или предлог за проект.
Истовремено во истиот период граѓаните ќе можат да ги достават своите идеи и предлози за проекти по електронски пат, на адресата: [email protected]. Каде ќе бидат разгледани исто како и предлозите и идеите од штандовите и штабовите од тимот експерти кои ќе ги пишуваат програмите.
Од ВМРО-ДПМНЕ велат дека очекуваат масовен одзив на граѓаните, се со цел што е можно подетални и содржајни програми со проекти кои извираат директно од нив и нивните потреби.