Македонија
„Не престануваме дури и по цена да не земеме плата“, Фондот за здравство спремен да не исплати никого ако се намалат нивните плати
Сите подрачни единици на Фондот за здравствено осигурување во земјата од утрово прекинаа со секаков вид исплата. Штрајкуваат поради препораката на Владата да им се намалат платите 21 отсто. Шалтерите ќе останат затворени и нема да се работи на пресметки за исплата на плати во јавното здравство, капитации за матичните лекари, а нема да се реализираат ниту новите варботувања и преместувања во здравството сѐ додека Владата не донесе нова препорака, со која ќе овозможи платите на вработените во Фондот за здравство да останат на сегашното ниво.
„Доколку не се донесе ваква одлука, да знаете дека вработените се толку револтирани што штрајкот нема да престане, дури и по цена да не земат плата. Во моментот таква е ситуацијата. Во моментот вработените во Фонд за здравство немаат плата и не може да земат сѐ додека не се донесе одлука од Управниот одбор. Прифаќаме само да ни остане платата на ова ниво. Ништо друго, ни цент помалку не прифаќаме. Доколку, пак, се намалат платите, штрајкот продолжува. Мене ми е жал што власта нема слух. Овој штрајк е по вина на власта и најтажно од сѐ е што страдаат граѓаните. Страдаат оние на кои најмногу им треба буџетот од Фондот за здравство. Доколку власта не се вразуми, штрајкот само ќе продолжи и ќе стане поригорозен“, рече претседателот на Синдикатот на УПОЗ, Трпе Деаноски.
Штрајкувачите апелираат Владата на утрешната седница да стави точка на дневен ред и да го разгледа нивното барање за што веќе испратиле допис до техничкиот премиер Талат Џафери. Бараат да донесат нов заклучок со препорака вредноста на бодот од 77,16 денари да остане иста до крајот на оваа година.
Претседателот Деаноски вели дека е лага соопштението од Министерството за финансии дека ако не се намалат платите на вработените во Фондот, ќе нема пари за лекови за граѓаните.
„Апелирам до Министерството за финансии и кој и да го напиша она соопштение дека доколку се исплатат повисоки плати, нема да има лекови за граѓаните, да не се случи уште еднаш такво нешто. Да не се лаже јавноста бидејќи не личи државен орган, министерство, да си игра со емоциите на граѓаните и да ги лаже дека нема пари во Фондот за здравство. Сме кажале многупати, Фондот за здравство е институција со најголем буџет во државата и Фондот за здравство секогаш има пари. Ќе има пари и да останат овие плати на вработените како што тоа го договоривме со менаџментот на Фондот за здравство. Граѓаните да бидат спокојни – ќе има лекови и помагала за сите“, рече претседателот Деаноски.
Претседателот на Синдикатот на Фондот, Бранко Аџигогов, вели дека утрово од почетокот на штрајкот немало никакви инциденти и проблеми со граѓаните и оти граѓаните се свесни за нивната ситуација. Добиле поддршка од сите синдикати во здравството и покрај тоа што токму исплатата на платите на здравствените работници е стопирана поради штрајкот.
„Граѓаните да не се мачат воопшто да доаѓаат за барање за рехабилитација, барање за ортопедски помагала, заверка на ортопедски помагала, барања за надомест на породилно, барања за исплата на надомест за боледувања, барања за осигурување во странство за двојазичните обрасци и така натаму. Во другите служби, со прекинувањето на работата, во моментот не се врши никакви исплата, ниту се обработуваат податоци за цело здравство, за сите што имаат договор со нас. Тоа е јавно здравство и огромен дел од приватното здравство. Прекинати се сите активности за договорите за вработувања во јавното здравство, префрлувањата на договорите за јавно здравство и на оние на кои треба да им се трансформира работниот однос“, вели претседателот на Синдикатот на Фондот, Аџигогов, и нагласува дека иако сега треба да се прават пресметките за исплата на плати во јавното здравство, засега сѐ е стопирано.
Шалтерите на Фондот за здравство се отворени само за пријава на малолетно лице како член на осигурување, за регулирање на осигурување хоспитализирано лице и за лекување во странство на итни случаи, а работат и комисиите за боледувања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска Давкова: Посебно ми беше убаво кога видов дека сме победиле и во Муртино
Гордана Силјановска-Давкова порача од Струмица дека ќе се вивне политичкиот вулкан како отпор на феудалните енклави на замислените европјани.
„Во Струмица се чувствувам особено добро бидејќи знам дека оттука ќе тргне тој политички вулкан што ќе стави крај на последната феудална енклава во Македонија. Таа енклава ја нареков феудот на Заеви што ќе се распадне! Замислете, „заколнати“ самонаречени европјани мислат дека со рефудализација ќе стигнат во ЕУ. Неверојатно нешто! Посебно ми беше убаво кога видов дека сме победиле и во Муртино“, вели Силјановска-Давкова.
Како што цели, во дебата, квази дебата на давеник што се фаќа за сламка, била прашана како може да не го употребува името „северна“, и дека го кршела Уставот.
„ Му објаснив дека правото на самоопределување е колективно право и дека Македонија истото го искористи уште на АСНОМ. Но и дека секој од нас има право на индивидуално самоопределување и дека никој, никогаш ниту мене, ниту вам не може да ни забрани да го употребуваме името Македонија. Замислете, во една емисија, во еден изборен циклус, не знаете кој е кој, не знаете со кого разговарате, бидејќи господинот Пендаровски неколку пати го негира она што го кажал. Во една изјава сум одличен професор, меѓународно признат експерт, дека сум имала висока морална вертикала. Па после вика не, јас мислев на висока морална вертикала во однос на Уставниот суд. Пазете, луѓево имаат по десет морални вертикали. Еднаш за Уставниот суд, еднаш за Собрание, еднаш за претседател… Неверојатен конгломерат. Како тогаш очекувате став од ваквите луѓе? Како очекувате да опстојат?“, додава Силјановска-Давкова.
Македонија
Милионерот Каевски ја злоупотребил позицијата како директор на АМС, со распределбата на ваучерите направен милионски криминал, велат од ВМРО-ДПМНЕ
Милионерот Дарко Каевски ја злоупотребил позицијата како директор на Агенциојата за млади и спорт, АМС, со распределбата на ваучерите направен е милионски криминал, велат од ВМРО-ДПМНЕ.
„Каевски како директор на АМС, неговиот наследник Наумче Мојсовски и Даниел Димевски од МОК се гонат заради сомнежи дека како директори на Агенцијата, но и членовите на Централната комисија во 2020, 2021 и 2022 година, по пат на искористување на службената положба и несовесно работење, заобиколувајќи ги законските процедури, извршиле распределба на пари, со што го оштетиле Буџетот на државата, но и луѓето што имале законско право на тие пари, а не им биле доделени“, дополнуваат од ВМРО-ДПМНЕ.
Според нив, во предметот на Државната комисија за спречување на корупцијата, врз основа на кој, како што известија медиумите, е поднесена пријавата и отпочната постапката се присутни сомневања дека спортските федерации, клубовите и спортистите добиваа ваучери, а одредена фирма ги реализирала под услов дел од парите да ги добие назад преку даночно ослободување.
„Сега е повеќе од јасно зошти Каевски беше најжесток гласноговорник на СДС, повеќе од очигледно е дека интересот му бил голем. По оваа афера станува јасно зошто спортот во Македонија во последните 7 години е на историско најниско ниво. Наместо за развој на спортот, парите наменети за истиот се пренасочувани во криминални шеми, додаваат од партијата.
Македонија
Битиќи и кандидатите од ИЕ2: Со повисоки плати правично го вреднуваме трудот на работниците
„На овој Ден на трудот, но и во останатите 364 дена во годината ние сме рамо до рамо со вас. Вреднувањето на работникот е главен постулат на социјалдемократските вредности за кои и се боревме овие седум години. Достоинствен живот за секој работник и работничка во нашата Македонија“, вели во видео обраќањето Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2, по повод 1-ви мај – Денот на трудот.
Во празничното обраќање Битиќи заедно со дел од кандидатите и кандидатки за пратеници на Коалицијата за европска иднина во ИЕ2 (Марко Михаиловски, Анета Здравковска, Билјана Муиќ) кажуваат дека обезбедено е трудот не само да се цени, туку и правично да биде награден.
„Заеднички ја браневме нашата заедничка социјална кауза. Како Влада дадовме приоритет на растот на платите во сите сектори подеднакво, затоа што тоа е најважно за поттикнување на правичен социо-економски развој. Успеавме просечната плата двојно да ја зголемиме од 2016 година на речиси 40.000 денари“, кажуваат кандидатите, притоа потсетувајќи дека минималната плата од 10.000 денари во 2016 година, во март 2024 година изнесува 22.500 денари, што е зголемување од 125 проценти.
„Ние се погриживме животниот стандард да остане не само недопрен, туку и подобрен во услови на инфлација“, велат кандидатите и кандидатките и нагласуваат дека овој раст не е случаен, туку дека тоа е резултат на намерна политика насочена кон подигнување и заштита на животниот стандард на работниците и работничките, политика на системски решенија.
„Нашата посветеност на социјалдемократијата обезбеди растот на платите да е изолиран од партиски интереси. Трудот никогаш повеќе нема да биде пион во политичките игри, а ние цврсто стоиме да ги заштитиме правата на сите работници и работнички без оглед на етничка, религиска или партиска определба. Честит нека е денот на трудот“, вели Битиќи заедно со дел од кандидатите и кандидатки за пратеници на Коалицијата за европска иднина во ИЕ2.