Македонија
(Видео) Хан: Македонија се врати на европскиот пат, но има уште многу да се работи
Македонија се врати на европскиот пат, но има уште многу да се работи, изјави еврокомесарот Јоханес Хан на заедничката прес-конференција со премиерот Зоран Заев на која му го предаде извештајот на Европската Комисија за напредокот на Македонија во кој се содржи чиста препорака за почеток на преговори. Тој рече дека реформите мора да продолжат, особено во независноста на судството, и истакна дека промената не значи само да се подобри легислативата, туку е потребна и нејзина имплементација.
„Не можам да ја скријам мојата лична среќа за овој успех постигнат по многуте посети. Ова е еден пат кон Европа и останува уште многу да се направи, но уште еднаш искрено им честитам на Владата и на опозицијата, која конечно беше сериозна во поддржувањето на оваа национална цел. Сите овие страни придонесоа до овој момент кој е важен за патот кон ЕУ на Македонија“, рече Хан.
Тој рече дека и граѓаните ја заслужија оваа неусловена препорака со која сите земји членки на ЕУ го признаа фокусирањето на земјата кон постигнувањето на целите.
„Земјата помина долг пат и покрај тешките околности за да ја надмине длабоката политичка криза и сега сте цврсто назад на европскиот пат. Гледаме дека има позитивна промена, обновено чувство на отвореност и надеж во земјата. Ги чувствувам атмосферата и добрите вибрации во земјата. Македонија стана ветување за демократска промена во целиот регион. Со имплементирање на договорот од Пржино реформите се спроведуваат, имаме отворени и транспарентни реформи. Но, за да се задржи ова, нема простор за задоволство, реформите мора да продолжат, особено во независноста на судството, промената не е само да се подобри легислативата, туку и нејзина имплементација“, рече Хан.
Според него, Владата со планот 3-6-9 постигнала многу за усвојување на неопходното законодавство и сега треба да се имплементира.
„Вие може да бидете модел за регионот. Доколку имате конкретна имплементација, постои можност за што побргу влегување во новата фаза. Мислам дека добро почнавте и важно е да се одржи ова во смисла на транспарентност и независност“, рече Хан, кој му го предаде извештајот на Заев.
Тој го поздрави враќањето на ВМРО-ДПМНЕ во парламентот и рече дека очекува нејзино учество во дебати и поддршка во реформите.
Во однос на преговорите со Грција, Хан оценува дека е важно да се најде решение. „Ова е важно не затоа што би почнале преговорите за членство во ЕУ, туку за да се одржуваат добри односи со соседите“, рече Хан. Тој го посочи договорот со Бугарија како позитивен пример и во таа насока порача дека треба да се искористи моментот за да се постигне решение.
„Секогаш секој ќе треба да се откаже од нешто, тоа е компромис. Но, информиран сум дека двете страни се одлучни за постигнување фер и достинствено решение. Им честитам на министрите за надворешни работи за посветеноста да се надминат проблемите од минатото“, одговори Хан на новинарско прашање дали ЕУ има план Б ако не се реши спорот за името со Грција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Над 180.000 гласови предност се обврска за ВМРО-ДПМНЕ Македонија повторно да ја врати на народот
180.000 гласа разлика во корист на Силјановска Давкова и ВМРО-ДПМНЕ пред Пендаровски и СДС е порака дека народот сака промени и крај на понижувањата, соопштија од ВМРО-ДПМНЕ.
„Народот не поддржува политика на понижување на Македонија. Граѓаните јасно кажаа дека се против криминалот на СДС и ДУИ. 7 години Македонија тоне на секое поле. На почеток на секоја учебна година немаше учебници за учениците, за болните немаше лекарства, за земјоделците немаше откуп. Народот не се чувствуваше безбеден, криминалот царуваше по улиците“, велат од ВМРО-ДПМНЕ.
Како што истакнуваат, народот не сака да живее повеќе во несигурност.
„Над 180.000 гласови предност се обврска за ВМРО-ДПМНЕ Македонија повторно да ја врати на народот. Победата во вториот круг ќе биде уште поголема, а СДС и Пендаровски, заедно со нивните газди од ДУИ никогаш повеќе нема да бидат во позиција да го понижуваат народот. Македонија повторно твоја“, завршуваат од ВМРО-ДПМНЕ.
Македонија
ЦУК: Коловозите во државата на многу места се влажни и имало ситни одрони на сите патни правци
Во Центарот за управување со кризи, имало вкупно 1 694 повици на единствениот повикувачки број за итни случаи 112.
Од нив „реални“ повици биле 49,82 отсто, а 50,18 отсто биле за други потреби на граѓаните што не биле итни. Кон полиција биле упатени 69,92 отсто и кон итната медицинска помош 28,91 отсто од реалните повици кон 112 во ЦУК.
Во последното деноноќие немало евидентирани пожари на отворено.
Од ЦУК потсетуваат дека коловозите во државата на многу места се влажни и имало ситни одрони на сите патни правци во последното деноноќие.
Екипите ги отстранувале одроните на патот и нема прекин на сообраќајот.
Сервисни информации
Преку денот сончево со мала до умерена облачност, утрото претежно ведро и наместа постудено
Времето денеска со претежно ведро и наместа постудено утро. Преку денот ќе биде сончево со мала до умерена облачност. Попладне во планинските региони ќе има услови за краткотраен локален дожд. Ќе дува слаб до умерен ветер претежно од западен правец. Минималната температура ќе биде во интервал од -1 до 7, а максималната ќе достигне од 16 до 23 степени.
Во Скопје ќе биде сончево со мала до умерена облачност и со слаб ветер од северозападен правец. Минималната температура ќе се спушти до 3, а максималната ќе достигне до 21 степен.
Во сабота попладне ќе има услови за локална нестабилност со краткотраен пороен дожд и грмежи. Потоа следува период на стабилно и топло време.