Македонија
Битола ги третира улиците со калциум ацетат за намалување на загадувањето

Општина Битола почна со третирање на градските сообраќајници со калциум магнезиум ацетат, како една од мерките за намалување на загадувањето на амбиенталниот воздух.
„Денес започнавме со една акција, која е и прво искуство за нас, со ЈКП „Комуналец“ адаптиравме едно возило кое што е оспособено да прави прскање, кое што нанесува емулзија од калциум магнезиум ацетат, која што емулзија хемиски е прилагодена да ги привлекува ПМ10 и ПМ2,5 честичките. За нанесување на таа емулзија треба посебни услови така да денес денот е погоден за тоа и ќе се направи една обиколка со прскање по улиците „Партизанска“, „Васко Каранѓелевски“, „Булевар 1ви Мај“, „Филип Втори Македонски“, „Прилепска““, рече Градоначалникот на Битола, Владимир Талески.
Возачите во градот треба да ја намалат брзината на возење, максималната брзината во градот во овој период треба да биде до 40 километри /час, затоа што емулзијата е лизгава и треба внимателно да се вози.
Во периодот кој следува инспекциите засилено ќе работат. “Минатата година на големите објекти задолжително беа чистени оџаците и сега ќе се проверуваат, ќе се контролираат институциите и правните лица со што загреваат, а ќе бидат изрекувани и казни. Така што заеднички треба да направиме нешто повеќе, додека не стигне големиот проект за Битола, тоа е топлификација, но дотогаш ќе бараме начини како можеме да си го олесниме животот кој што се однесува на делот од загадениот воздух во Општина Битола“, изјави Талески.
Калциум магнезиум ацетат е средство кое се користи за контрола и намалување на ситната прашина (ПМ10 и ПМ2,5 честичките) и за стабилизација на патиштата. Средството е еколошки производ, биоразградлив, не е штетен за растенијата (погоден е за апликација во близина на паркови и зелени површини), а најважно е што не е корозивен (нема да предизвика оштетување на возилата). Производот е лесен за апликација и целосно е стабилен.
„Со количините кои што општината ги набави околу 6 или 7 тона, се надевам дека и во наредни денови кога ќе има погодни временски предуслови за аплицирање со средство ќе продолжиме и понатаму со негово распрскување. Делувањето на средството е еднодневно и се е во зависност од бројот на возила кои што се движат во тој дел од сообраќајницата. Доколку има поголема фреквенција на возила ќе биде потребно да се прска и два пати дневно“, истакна директорот на ЈКП „Комуналец“ Битола, Зоран Соклевски./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јасно и гласно кажав дека не сум се сретнал со Груевски, ВЛЕН манипулира, рече Османи

Бујар Османи, потпретседател на ДУИ и кандидат за градоначалник на Општина Чаир, ги демантираше тврдењата за наводна средба со Никола Груевски за обезбедување пратеници за поддршка на уставни измени.
„Во недостаток на идеи и очекуван пораз на изборите, манипулациите на ВЛЕН продолжуваат во однос за наводна моја средба со Груевски со цел обезбедување на пратеници за подршка на утавни измени. Јасно и гласно кажав дека таква средба немало. Тоа што се служат постојано со лаги и повторување на сите невистини нема да им помогне во кампањата“, рече Османи.
Додаде и дека дговорот на овие оцрнувања ќе стигне на 19 октомоври.
Македонија
Ахмети: Да сакавме да ја поделиме Македонија, тоа ќе го сторевме во 2001 година

Претседателот на ДУИ, Али Ахмети, од партиски собир во Чаир порача дека тврдењата оти Албанците сакаат да ја поделат Македонија се измислени од одредени политичари. Тој нагласи дека ако тоа било вистина, тоа можело да се случи уште во 2001 година со 15.000 вооружени лица.
Ахмети додаде дека ДУИ е за унитарна држава, рамноправна за сите, и дека е потребна правна држава со истраги за приватизацијата и поранешните функционери.
„Но, ние сме за унитарна држава, рамноправна за сите. А не еден да биде аргат, а другиот ага. Ние не сакаме да живееме во сопствената земја како кираџии“, рече Ахмети.
Лидерот на ДУИ посочи дека иднината на земјата е со стабилност, рамноправност и интеграција во Европа, додека актуелната власт, според него, не направила значаен напредок.
На настанот, Ахмети заедно со кандидатите за градоначалници потпиша „акт за Чаир“ како симбол на националното единство од 2001 година, повикувајќи на борба против дискриминацијата и лошото управување пред октомврискиот референдум.
Владејачката ВМРО-ДПМНЕ по обрќањето на Ахмети истакнаа дека ДУИ не само што не може да ја дели државата, туку може и да завршат во затвор за криминал и затоа што ја разјадуваат Македонија
Од ВМРО-ДПМНЕ оценија дека ДУИ се во очај што се враќаат на 2001 година, додавајќи дека за време на 23 години власт учествувале во компромитирање на институциите и злоупотреба на етнички теми за лична корист.
Македонија
Родители протестираат за бесплатен превоз за средношколците наместо поскапо сместување во дом, МОН смета дека решениeто е во интерес на учениците

Законското решение кое го регулира превозот на учениците е ново, заеднички изработено со сите засегнати чинители и претставува одговор на детектираните предизвици во минатото, велат од Министерството за образование и наука, по протестот на родителите од Демир Хисар, кои бараат бесплатен превоз за учениците од стручните училишта во Битола, и се чувствуваат уценети со престојот во ученичкиот дом.
„До лани реакциите беа дека учениците кои се запишани во средните училишта надвор од нивното место на живеење, губат многу време во патување, а со тоа и губат време за настава и учење. Поради превозот, односно утврдени термини за тргнување и заминување од училиште го пропуштаа почетокот на наставата или последните часови. Сега со новиот закон се надминува овој проблем, им се овозможува на учениците да бидат сместени во ученички домови и да имаат доволно време за тоа што им е основна обврска – учењето и совладувањето на наставната материја“, велат од Министерството во одговор за „Макфакс“, уверувајќи дека основа на решението се најдобрите интереси на учениците.
„Макфакс“ го праша МОН и дали има проценка колку семејства со повеќе деца ќе бидат директно погодени од оваа измена и дали е предвидена финансиска поддршка за нив, како и кои алтернативи им се нудат на учениците кои не сакаат да престојуваат во дом, а мораат да патуваат до училиште во друг град. Засега не се знае дали Министерството ќе ја преиспита оваа одлука, со оглед на тоа што, како што раскажуваат родителите, при уписот поднеле и изјава дека детето е со превоз, без да бидат запознаени со измените на Законот.
За семејствата во овој крај од Македонија почетокот на школската година почна со протести. Порачаа дека со измените се ускратува правото на нивните деца на избор и бесплатен превоз.
Реагираат и на критериумите за прием во ученичкиот дом. Велат дека првично не биле примени ученици од пооддалечени општини, како Росоман, Демир Капија и Неготино, иако токму оддалеченоста би требало да биде најважен услов. „Подоцна, кога некои од нашите деца ќе се откажат од престој, тие по дифолт ги примаат оние што претходно биле одбиени. А нам, кои не сакаме децата да седат во дом, ни го укинуваат правото на бесплатен превоз,“ се пожалија родителите пред почетокот на школкската година во дописот до медиумите.
Според нив, со оваа одлука државата наместо да обезбеди еднаков пристап, наметнува дополнителни трошоци.
На вчерашниот протест најавија дека и во наредните денови ќе продолжат со протести и блокади на патот кон Битола, а ги охрабруваат и родителите од другите градови да им се приклучат за заедно да го изразат револтот и да се изборат за правата на децата.
Според оваа измена, учениците кои се запишани во средните училишта во Битола мора најпрвин да аплицираат за место во ученички дом. Во моментов, околу 100 ученици од Демир Хисар учат во Битола, а родителите предупредуваат дека со измените на Законот им се скратува правото на децата да изберат струка која ја нема во нивниот град – како медицинска, економска или техничка. Во Демир Хисар има само едно средно училиште, и тоа со два смерови општа гимназија и компјутерска автоматика. Измените ги засегаат и учениците од селата и градовите од регионот, меѓу кои Ресен, Крушево, Могила, Новаци и други.
„Макфакс“ претходно денес испрати прашања и до Општина Демир Хисар, меѓу кои и тоа дали дали Општината може да обезбеди привремена поддршка за учениците (субвенција за превоз, посебна линија) додека не се најде трајно решение. Прашања беа испратени и до Општина Битола, но до моментот на објавувањето на овој текст, не е пристигнат одговор.