САД повторно го повика Иванов да понуди можност за формирање влада

САД се разочарани поради тоа што претседателот Ѓорге Иванов не успеа да понуди можност за формирање на влада од страна на партиите кои имаат парламентарно мнозинство и смета дека оваа одлука е спротивна на принципите на ОБСЕ, изјавила во четвртокот претставничка на САД во постојаниот совет на ОБСЕ Кејт Барнс во обраќањето кон министерот за надворешни работи Никола Попоски.

„САД остануваат разочарани од одбивањето на претседателот Иванов да понуди можност да формираат Влада пратениците кои имаат јасно мнозинство. Продолжуваме да се надеваме дека оваа акција е спротивна на обврските направени кон ОБСЕ , основните демократски принципи и владеење на правото. Како стратешки партнери и пријатели на Македонија, но и со целосно почитување на суверенитетот на земјата, САД го повикува претседателот Иванов да ја преиспита својата одлука“ порача Барнс.

САД исто така „го повикуваат владата, политичките лидери и политичките партии да се воздржат од напади кон граѓанските организации и  да овозможат услови и поддршка за независните гласови и институции да можат слободно да ја вршат својата работа, и да избегнуваат потпалувачка реторика и тензии“, се вели во изјавата на Барнс.

САД исто така ги повикуваат сите партии да ги стават интересите на Македонија и нејзините граѓани над се останато и „заедно да работат конструктивно и да ги имплементираат своите обврски кои произлегуваат од Пржинскиот договор“./крај/мф/бс