Војната помеѓу двете групи во ДУИ, може да заврши и со разрешување на „огнените“ од функциите во партијата. Ова се неофицијалните информации кои денеска доаѓаат од Мала Речица, каде ставовите ќе ги судрат двете страни – огнената група и останатото раководство на партијата на чие чело е Али Ахмети. Во просториите на ДУИ пристигна Изет Меџити, Блерим Беџети, Висар Ганиу кои се предводници на „огнените“. Пред нив, дојде и Бујар Османи.

Изет Меџити прашан за што очекува да се разговара на состанокот во Мала Речица, тој кажа: „За ДУИ“.

Главната тема ќе се внатрепартиските прашања.

„За сите прашања кои останаа неразговарани и ќе бидат отворени од претседателството ќе се разговараат. Секое прашање кое ќе биде покренато ќе се разговара“, вели Бујар Османи.

Ова е втор состанок за една недела. Претходниот се одржа минатиот викенд. Незадоволството на „огнените“ е од кадровската политика на партијата, а прст вперија кон Артан Груби и Бујар Османи. Од Ахмети бараат, Груби и Османи да останат без министерските фотелји. Ахмети минатиот месец, на огнените им посочи дека ДУИ е ураган.

Демократскиот сојуз смета дека одлуката на Уставниот суд, со која се овозможува зголемување на платите на функционерите за 78% е неодговорна, неразумна и неприфатлива.

Од партијата предлагаат да се интервенира во коефициентите, односно да се предложат измени на Законот за платата и другите надоместоци на избрани и именувани лица во Република Македонија, со што, како што велат, зголемувањето на платите на функционерите ќе се усогласи со зголемување на платите во сите сектори, како и со зголемувањето на пензиите.

„ Демократскиот сојуз ќе поддржи и ќе биде дел од законско решение, кое ќе ја спречи ваквата неправедна положба и огромна разлика во примањата на функционерите и останатите вработени.

Зголемувањето на примањата како одговор на растечките животни трошоци треба да го почувствуваат сите граѓани, посебно ранливите категории, додека оние кои се избрани и именувани лица треба да обезбедат услови за поквалитетен и подобар живот за сите, а не само за себе“ наведуваат од Демократскиот сојуз.

Само кукавици и плашливци се закануваат во пораки, порача пратеникот на ВМРО-ДПМНЕ Бране Петрушевски.

„ Еве јавно го повикувам дотичниот Роберт, кој ми се заканува мене, а и на претседателот Мицкоски, дека ќе ни ги ликвидирал нашите семејства, да се сретнеме лично, очи во очи.

Доколку остана некој психички нормален во раководството на СДС, барам осуда и оградување од ваквите закани на нивни членови.

Исто така, барам од Претседателот на државата, г-нот Стево Пендаровски, да ја повлече издадената Благодарница на ваков насилник. Ја повикувам и меѓународната заедница будно да ја следи состојбата со опозициските пратеници и функционери, кои се мета на секојдневни закани, следења и заплашувања со досиеа незаконски водени од функционерите на власта.

Доколку институциите на државата не сакаат да не заштитат, ќе бидеме принудени сами, како знаеме и умееме, да се заштитиме себе си’ и нашите семејствата.

И на крај, да им биде јасно на сите, и по цена на мојот живот, нема да гласам за уставни измени, затоа што немам мандат од граѓаните“ напиша Петрушевски на Фејсбук.