Општина Охрид почнува со реализација на проектот „Ваш реонски општинар“. Со проектот локалната власт се доближува до граѓаните со цел да се овозможи на лице место да се примаат забелешки за комуналните проблеми со кои тие се соочуваат, да се увиди состојбата на самото место, односно самата улица и да се постапи по сите забелешки кои се во надлежност на Општина Охрид.

Со овој проект градот Охрид е поделен на 5 реони при што точно се дефинирани границите на секој реон. За секој реон ќе бидат одговорни по двајца вработени во локалната самоуправа кои преку теренски активности и средби со граѓаните ќе прибираат информации за сите нивни проблеми и потреби. Преку веб-страницата на Општина Охрид и на телефонски број 072 800 705 охриѓани ќе можат да воспостават непосреден контакт со реонскиот општинар и ќе можат да договараат средби на местото каде што е посочен комуналниот проблем.

Реката Брегалница пред Штип попладнево целосно побеле и од неа започна да се шири непријатна миризба.Во текот на денот, на лице место излезе екипата на крим техника од Полициската станица-Штип и членовите на Здружението на спортски риболвци „Брегалница 2011“- Штип за да земат мостри од реката. Тие бараат на терен да излезат и инспекторите од Државниот инспекторат за животна средина за да откријат кој стопански субјект ја направил хаваријата.

Градоначалникот на Штип, Благој Бочварски, на Фејсбук вечерва соопшти дека е пронајден изворот на загадување.

„Би сакал да ги информирам граѓаните дека заедно со претставници на риболовното друштво и неколку загрижени граѓани лично бев на терен и го пронајдовме изворот на загадувањето во реката Брегалница, во еден од превозниците во Дирекцијата за Технолошки индустриски развојни зони – ТИРЗ. Повикав надлежен инспектор и крим полиција кои веќе се на лице место. Калкулации не смее да има! Секој мора да ја сноси одговорност за своите постапки!“, напиша тој.

Според него, денешната слика од коритото на река Брегалница е крајно вознемирувачка и побара да бидат изречени најстроги казни за сторителите.

На социјалните мрежи попладнево се споделуваа фотографии од вознемирени граѓани, кои коментираат дека не е првпат реката Брегалница да биде загадена од отпадни хемикалии, но првпат се случило да добие бела боја.

Во присуство на министерот за земјоделство Трајан Димковски, градоначалничката на Општина Битола Наташа Петровска, директорот на ЈП „Стрежево“ Методија Граматковски и претставници од релевантни институции од областа на земјоделието, денес се изврши порибување на Стрежевското Езеро со прастрмка и крап.

Министерот Димковски посочи дека значењето на хидросистемот Стрежево е огромно за пелагонискиот регион, бидејќи покрај наводнувањето на околу 5.000 хектари земјоделско земјиште, се изведуваат и други дејности, меѓу кои и производство на сопствена риба.
„Од овој систем се снабдува со сирова вода системот за водоснабдување на градот Битола, а се произведува електрична енергија во четири мали хидроцентрали. Акумулацијата Стрежево како дел од овој систем, претставува рекреативна зона каде во убавата природа уживаат жителите на околните места, но и спортските риболовци. Концесијата за управување со водите на езерото од минатата година е во надлежност на ЈП Стрежево. Тие ја оправдуваат довербата и се грижат за рибниот фонд, управување и стопанисување со акумулацијата. Јавното претпријатие со сопствени средства обезбеди подмладок од 6000 единки, кои денеска заедно го пуштивме во овие води“, рече Димковски.

Градоначалничката Петровска истакна дека денешната активност потврдува дека не само што користиме од природата, туку умееме и да враќаме назад кон неа.

„Во оваа прилика сакам да упатам честитки до раководството на ЈП „Стрежево“ и директорот Граматковски за исклучителната успешност во изминатиот период. Соработката со Општина Битола е одлична и она на кое што заедно работиме е разгледување на можностите за користење на технолошка вода во рамките на самиот град“, посочи Петровска.

Порибувањето се реализираше во близина на браната „Стрежево” и Шахтниот преливник на акумулацијата “Стрежево”, со сопствени финансиски средства со подмладок од крап (1000 единки, со единечна маса од 50-800 грама) и пастрмка (5000 единки, со единечна маса од 10-70 грама).

„Денес го реализиравме порибувањето на места кои се најпогодни според стручните лица, за опстанок на младата риба.Чинот на порибување подразбира набавка на специфициран порибителен материјал, негов транспорт во адекватни контролирани услови од репроцентарот до предвидената локација и безбедно испуштање во риболовната вода”, рече директорот на ЈП „Стрежево“, Методија Граматковски.