Скопје
Општината Аеродром: И покрај сите опструкции од централната власт, Општината две години активно работи на реализација на нови проекти
„Доколку енергијата која СДСМ ја троши за прес-конференции полни со лаги и дезинформации ја потрошеа за реализација на проекти и инвестиции за граѓаните, денес немаше да биде политичката партија со најнизок рејтинг помеѓу граѓаните во Македонија. Четири години власт без никакви резултати и двегодишна работа како безгласна опозиција во советот на Општина Аеродром, беа доволни за СДСМ конечно да го покаже своето вистинско лице пред граѓаните и да покаже дека е политичка партија која ја интересираат само личните интереси, фамилијарните бизниси и тендер зделките“, вели општина Аеродром.
„Смешно е за проекти и развој да говори политичката партија која 4 години не реализираше ниту еден капитален проект за Аеродром, а воедно претставува пример за корумпирано и криминално владеење кое донесе сиромаштија и економска криза во државата.
Наместо да држат прес-конференции полни со дезинформации, СДСМ треба да даде одговор за тоа зошто нивната влада свесно го кочи почетокот на изградба на две детски градинки, доградба и надградба на две основни училишта, како и изградбата на новиот плоштад зад ТЦ „Капитол“. Ќе беше зачудувачки доколку СДСМ, наместо да ја лаже јавноста, дадеше одговор зошто ги намали дотациите за основното образование, а министерката за труд и социјална политика од редовите на таа партија одговореше зошто владата не презема ништо за решавање на проблемот со капацитетите во детските градинки во Аеродром“, соопшти Општината.
„Граѓаните на Општина Аеродром се свесни и знаат дека доколку има политички субјект на кој му пречат новите проекти во Аеродром, тоа дефинитивно е СДСМ и доколку постојат политичари кои направиле се за да стагнира развојот на општината, тоа дефинитивно се премиерот, министрите и пратениците од најдеструктивната политичката партија во историјата на Македонија.
На крајот дозволете да напоменеме дека и покрај сите опструкции од централна власт, општината две години континуирано и активно работи на реализација на нови проекти и инвестиции. Аеродром и во услови на економска криза предизвикана од неспособноста на централната власт, се менува, раззеленува и разубавува. Граѓаните од секоја населба добиваат нови улици, сообраќајници, паркови и игралишта, а дечињата учат во нови и модерни училишта. Опструкциите и пречките го покажуваат вистинското лице и деструктивниот карактер на оваа политичка партија, но нема да дозволиме тие да го спречат понатамошниот развој на општината и реализацијата на проекти од интерес за граѓаните“, се додава во соопштението на општина Аеродром.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Општина Центар ги награди најдобрите наставници и ученици, првенци на генерацијата
Општина Центар додели награди и пофалници на 8 првенци на генерацијата и на најдобрите 13 наставници и стручни соработници во образовниот процес во општинските основни училишта за тековната учебна година.
„Како и секоја година досега, Општината ги мотивира учениците и наставниците да останат посветени и креативни, да создаваат нов квалитет и постигнуваат резултати со кои ќе се гордееме. Со овие награди сакаме да ги охрабриме нашите првенци да продолжат да бидат успешни средношколци и дополнително да го мотивираме наставниот и стручен кадар во нашите општински училишта. Воспитувањето и образованието на нашите деца е одговорна и важна работа од која зависи напредокот и развојот на целата држава, а за тоа ни е потребен кадар што максимално ќе се вложува во тој процес“, порача градоначалникот на општина Центар, Горан Герасимовски, честитајќи им на наградените првенции наставници во рамките на манифестација „Академско пладне“, што се одржа во ООУ „Јохан Хајнрих Песталоци“.
Најдобрите ученици полуматуранти се наградени со паричен износ од 15.000,00 денари, а најдобрите одделенски и предметни наставници и стручни соработници со износ од 30.000,00 денари во согласност со програмата за образование за 2024 година.
Годишните награди се доделуваат по повод обележување на Денот на словенските просветители, свети Кирил и Методиј, врз основа на претходно утврдени критериуми за вреднување на работата на вработените во основните училишта во општина Центар, а првенците на генерација ги избира самото општинско училиште.
Финансиските средства ќе бидат исплатени по завршување на изборниот процес, односно до изборот на владата, соопшти Општината.
Скопје
Одбележан патрониот празник на ООУ „Браќа Миладиновци“ во општина Илинден
Со положување свежо цвеќе пред бистата на браќата Миладиновци беше одбележан патрониот празник на ООУ „Браќа Миладиновци“ во Миладиновци. Цвеќе положија градоначалникот на општина Илинден, Александар Георгиевски, дирекротот на ООУ „Браќа Миладиновци“, Дарко Петковски, директори на училишта, јавните претпријатија, здруженија, известува Општината.
Од страна на децата од детската градинка во Миладиновци по повод патрониот празник беше подготвена приредба во чест на празникот.
Во рамките на одбележувањето на патрониот празник беше разгледан летниковецот, кој ќе служи како едукативно катче во дворот на училиштето. Во иднина се очекува да се користи како катче за дружење, настава на отворено и место, каде што ќе може да се разговара и дебатира за теми што ги засегаат учениците, се додава во соопштението на Општина Илинден.
Скопје
Ѓорѓиевски додели ваучери за летување за победниците на општинската лига во футсал од Основното училиште „Круме Кепески”
Екипата од ООУ „Круме Кепески“, која е победник на општинската лига во футсал бесплатно ќе летува во Охрид, како награда од општина Кисела Вода. Градоначалникот Орца Ѓорѓиевски денес им честиташе на младите спортисти, им го врачи ваучерот и им посака уште многу понатамошни успеси.
„Сакам да ви честитам, пред се’, за покажаната одлична игра, за цврстиот карактер и посветеноста без кои ваквиот успех немаше да биде можен. Наградата која ви ја обезбедува Општина Кисела Вода е само поттик за нови добри резултати за кои сум сигурен дека ќе ги постигнете. Вистинската награда е она што вие веќе сте го избрале како патека, вложувајќи во себе, градејќи се во силни личности кои во иднина ќе ја градат нашата држава. Од Кисела Вода имало и има многу спортски легенди и ваша задача е да го дадете својот максимум и да ни обезбедите тим за кој во иднина ќе навиваме и на кој ќе бидеме горди како нација“, истакна градоначалникот Орце Ѓорѓиевски.
Тој разговараше и со тренерот на тимот, наставникот по физичко воспитување Игор Зафировски кој го информираше дека оваа екипа сочинета од осмо и деветтоодделенци веќе им помага на новите таленти од училиштето од пониските одделенија. Го искажа своето задоволство од начинот на кој се однесуваат на теренот и надвор од него и потенцираше дека во нив гледа многу идни успешни спортисти. Благодарност за поддршката од општина Кисела Вода и од покажаните резултати изрази и помошник тренерот, наставникот Горан Андоноски.
На настанот, присуствуваше и претседателот на Општинскиот сојуз за училишен спорт на општина Кисела Вода, м-р Дејан Стоимановски, како и членот на управниот одбор д-р Благоја Кечовски. Со градоначалникот разговараше и капитенот на тимот Матеј Ивановски кој во име на тимот му се заблагодари за наградата и кажа дека успехот се должи на сплотеноста на играчите и дека се надева дека и наредната година ќе имаат одлични резултати, извести општината.