Јавното сообраќајно претпријатие (ЈСП) Скопје започнува истрага за можни саботажи на нивните автобуси, откако денеска во населбата Сопиште изгоре еден од украинските автобуси од нивниот возен парк.

На местото на настанот присуствуваше директорот на ЈСП, Драги Кушовски, кој за медиумите изјави дека претпријатието веќе има одредени сознанија во врска со овие инциденти.

„Имаме одредени сознанија. Да видиме дали тие сознанија ќе ни се потврдат или не. Дали можеби некој намерно или ненамерно, од разни нему познати причини, може да придонесува за вакви инциденти кои се случуваат повеќепати“, изјави Кушовски.

Ова е трет случај во последните шест месеци. Во јули минатата година, автобус на ЈСП се запали во скопската населба Бутел, при што како причина беше утврдена дефектна електрична инсталација. Неколку недели претходно, друг автобус настрада во пожар на Железничката станица.

Од ЈСП најавија дека ќе спроведат детална истрага за најновиот инцидент, со цел да утврдат дали постојат елементи на саботажа или проблеми со одржувањето на автобусите.

Еден од украинските автобуси на Јавното Сообраќајно Претпријатие (ЈСП) со број 58 се запалил денеска во Општина Сопиште.

Според сведочењата на очевидци, автобусот, кој се наоѓал во близина на приватни куќи и дрва, започнал да гори од задниот дел. Брзата реакција на патниците овозможила веднаш да го напуштат возилото и нема повредени лица.

Од противпожарната бригада веднаш пристигнале на местото на настанот и го изгасиле пожарот, спречувајќи го понатамошното ширење на огнот.

Сепак, инцидентот предизвика загриженост кај локалното население поради близината на приватните куќи и растителноста. Засега нема информации за причините за пожарот, а истрагата е во тек.

Жителите на Општина Аеродром отсега имаат можност да уживаат во нови, модерни и достапни комунални услуги, што ги воведува Јавното претпријатие за комунални дејности на општината. Со ова, Аеродром станува првата општина во Град Скопје што нуди ваков вид услуга.

Новите комунални услуги опфаќаат:

Транспорт на градежен шут (пакуван во вреќи), кабаст, растителен и комунален отпад од домаќинства, комерцијални и индустриски објекти, како и мешан отпад;

Машинско косење и чистење зелени површини;

Гребење и собирање искосена трева, како и отстранување отпад (камења, гранки и друго);

Поставување и подигање на контејнери за кабаст отпад со транспорт до депонија.

Приватни и правни лица ќе можат да ги закажат овие услуги на телефонскиот број 072/270-886 или преку е-пошта: [email protected], по минимален надомест.

„Собраниот отпад ќе се третира согласно сите законски регулативи и ќе се транспортира до депонијата „Дрисла,“ со која општината веќе има договор. Ваквиот пристап не само што ќе им го олесни секојдневието на жителите туку и ќе придонесе кон почиста и поуредена средина“, велат од Општината.

Со воведувањето на овие услуги, Општина Аеродром планира да стави крај на несоодветното фрлање отпад на несоодветни места. Затоа, инспекциските контроли ќе бидат зајакнати, а несовесното однесување ќе се санкционира со парични казни.

„Целта ни е да обезбедиме чиста и уредна средина за сите граѓани. Воведувањето на овие услуги е чекор напред кон одговорно управување со отпадот“, велат од Општина Аеродром.

Со оваа иницијатива, Аеродром поставува нови стандарди за комуналните услуги, поттикнувајќи одржливо управување со отпадот и подигање на свеста кај граѓаните.