Жителите на Ново Лисиче добија нов спортскиот центар кој ќе го носи името Спортски центар – Марко Божиновски.

Марко Божиновски беше младо момче пример за спортист, добар другар и пријател, кој што пред шест месеци трагично почина.

“Заедничка одлука на моја иницијатива, но заедничка одлука на сите советници во Советот на Општина Аеродром, и од ВМРО-ДПМНЕ, и од СДСМ, и од Левица, е овој Спортски центар да го носи токму неговото име.
Одлучивме да инвестираме во реновирање на спортската инфраструктура која што ја гледате позади вас. Дел од таа инвестиција е на општина Аеродром, но и самото семејство на Марко Божиновски, пријатели нивни, се активно вклучени во подобрување на условите кои што ќе ги има овој Спортски центар.” изјави Муцунски

Градоначалникот на Аеродром истакна дека во чест на Марко Божиновски, кој што треба да биде пример на сите исти млади генерации, успешен млад ракометар, добар другар и искрен, верен пријател, сакаме да функционираме и таков однос да воспоставиме спрема сите други млади луѓе во општина Аеродром, да бидат како Марко Божиновски.

Муцунски додаде дека и следната година ќе продолжат да инвестираат во спортската инфраструктура и во младите спортски таленти.

Градоначалникот на Општина Центар, Горан Герасимовски, исполни уште едно предизборно ветување за пензионерите во Капиштец, отворен е нов пензионерски клуб во т.ц Беверли Хилс.

Градоначалникот Герасимовски беше во посета на пензионерите, пред кои најави зголемени активности, преку организирање турнири во шах, пикадо и стрелаштво. Во оваа пригода Герасимовски на пензионерите им однесе шах, домино, карти и дама, како дополнителни активности за дружење и релаксација на пензионерите во Капиштец.

„Здружението на пензионери во Општина Центар со над 10.000 членови е едно од најбројните и најактивните здруженија на пензионери на ниво на државата. Токму затоа е важно постојано да воведуваме нови активности и поинтензивни соработки. Со пензионерите овде во Капиштец имав одлично дружење, разговаравме за потребите и новите активности кои ја зацврстуваат социјализацијата меѓу нив. Важно е да се грижиме за нашите највозрасни граѓани, затоа што им го должиме тоа“, истакна Герасимовски.

Пензионерскиот клуб во Капиштец е првиот отворен од трите најавени во предизборната кампања. Следната година ќе бидат отворени нови два пензионерски клуба, едниот во Крњево, а другиот близу Универзална сала.

Во Општина Центар веќе функционираат 5 пензионерски клубови и тоа во урбаната заедница Мирче Ацев во Дебар Маало, друг во близина на Зеленото пазарче, уште еден во населбата Пролет кај Веро Џамбо, на улицата „Водњанска“ и во урбаната заедница „Мирче Ацев“, каде повозрасните можат да одмараат, да се дружат и рекреираат.

Дополнително, Општина Центар во соработка со здружението „Хуманост“, за највозрасните граѓани обезбедува бесплатна медицинска нега и административна помош преку проектот „Нега за стари лица во домашни услови“, проект кој пензионерите го оценуваат како најпотребен и најуспешен за нив.

Од Град Скопје соопштија дека новогодишното украсување на Скопје ќе почне на 10 декември.

„На повикот на градоначалничката на Скопје, Данела Арсовска, до компаниите да покажат општествена одговорност за време на здравствено-економска и енергетска криза, се јавија компании заинтересирани да помогнат“, истакнуваат градските власти.

Ова е време кога, како што додаваат од таму, работите треба да се менуваат.

„Ова е време кога треба да покажеме дека заедно можеме повеќе за нашиот град. На мојот повик се јавија компании кои ја покажаа својата општествена одговорност, а една од нив најави дека ќе го украси градот Скопје за Нова година без финансиски импликации по градот“, изјави градоначалничката Арсовска по средбата со компанијата „Линк медиа“.

Од компанијата најавиле дека со украсување ќе почнат на 10 декември.

„Град Скопје и ‘Линк медиа’ спогодбено го раскинаа договорот за новогодишно украсување на Скопје, што беше склучен во месец октомври оваа година“, потенцираат во соопштението од Град Скопје.