Демократската унија за интеграција (ДУИ) остро реагираше на последното јавно обраќање на премиерот Христијан Мицкоски, обвинувајќи го за, како што велат, опасна и дискриминаторна реторика насочена кон албанската заедница.

„Премиерот Мицкоски повторно се впушта во реторика која го дели општеството и ги понижува Албанците, определувајќи кој е ‘прифатлив’, а кој не. Ова потсетува на мрачната политика на Милошевиќ од деведесеттите“, се вели во реакцијата на ДУИ.

Според партијата, наместо да се фокусира на реформите, економијата и евроинтеграциите, Мицкоски продолжува со националистичка агенда „која создава подредени, послушни и неми Албанци“.

ДУИ предупредува дека ваквиот пристап не само што е штетен, туку веќе произведува обратен ефект – политичко обединување на Албанците, без разлика на нивните партиски разлики, со цел да го одбранат достоинството и политичката автономија на својата заедница.

„Остатоците од Вреди кои сè уште се на функции благодарение на Мицкоски треба да се запрашаат – дали сакаат да бидат соучесници во оваа политика на поделби?“, прашуваат од ДУИ.

Партијата завршува со порака до власта дека граѓаните се будат и се подготвени да го кажат својот став на претстојните избори, какви и да бидат тие.

Во денешниот говор на годишната конференција на Унијата на жени на ВМРО-ДПМНЕ во Скопје, претседателот на партијата, Христијан Мицкоски, јасно порача дека трагедијата во Кочани не смее да се злоупотребува за политички цели. Тој истакна дека има редовна комуникација со роднините на настраданите и најави дека ќе продолжи да се среќава со нив за поддршка и заедничка работа на решенијата.

„Сакам да предупредам дека многу нечовечки и некрофилски се злоупотребува оваа огромна трагедија во Кочани. Сето тоа го слушнав и од роднините на настраданите, кои минатата недела ги сретнав во Владата. Со голема почит и отворен разговор дискутиравме за болката која ја делиме, како и за чекорите што можат да помогнат во расчистувањето на случајот и поддршката за семејствата“, рече Мицкоски.

Тој додаде дека тие кои имаат вина за слученото мора да одговараат, а системот треба да се менува за да се обезбеди правда. „Во ова сме заедно одлучни, и ние како партија сме подготвени да продолжиме да работиме и да комуницираме со семејствата на настраданите. Нашата одговорност е да бидеме рамо до рамо со граѓаните во најтешките моменти“, потенцираше претседателот.

Мицкоски најави редовни состаноци со роднините, и нагласи дека ќе посетува и оние кои од оправдани причини не можат да дојдат на средбите.

„Периодов јас и Владата сме на располагање за сè што е потребно. Нема да дозволиме политички глодари и некрофили да ја злоупотребуваат оваа трагедија. Сите сме Кочани и мораме сите заедно да направиме нешто за Кочани“, рече Мицкоски.

По одржувањето на редовниот партиски конгрес на крајот на годинава, или најдоцна на почетокот на 2026 година, ќе следува голема промена во ВМРО-ДПМНЕ и во Владата, најави денеска премиерот Христијан Мицкоски и претседател на ВМРО-ДПМНЕ на 20-тата годишна Конференција на Унијата на жени на партијата.

„Кој ќе се покаже со својата работа ќе остане, но тие што нема да ги исполнат очекувањата на граѓаните ќе ги поздравам и ќе им се заблагодарам“, истакна Мицкоски во своето обраќање.

Тој порача дека уште сега ја испраќа пораката дека „образот и честа“ се најважни за секој човек и додаде дека ќе даде сè за тие да останат најчистиот дел од политичката работа.

„Тоа сите заедно му го должиме на народот“, рече Мицкоски.

Осврнувајќи се на претстојните локални избори, Мицкоски рече дека ВМРО-ДПМНЕ интензивно се подготвува и дека објавата на кандидатите за градоначалници ќе се одвива во два циклуса, од кои првиот ќе почне до крајот на месецов.

„Чест и обврска ми е да соопштам дека нашите кандидати, во речиси сите општини, водат најмалку три до четири пати повеќе споредено со кандидатите од опозицијата. А ако продолжат вака, опозицијата можеби нема да освои ниту една општина“, изјави Мицкоски.

Во своето обраќање, Мицкоски упати благодарност до членовите на Унијата на жени, нарекувајќи ја организацијата „дел од срцето на партијата“ и „заштитник на женските права“.

„Работиме посветено и одговорно, свесни за обврската која сме ја презеле. Оваа наша борба не е само на една генерација, туку залог за идните. Ќе ги вратиме вистинските вредности во политиката – почитување на законите, работа, чесност, принципиелност“, изјави премиерот.