Домашен
Червар ги отпиша Борко и Ацо Јоноски, во тимот го врати Миркуловски
Селекторот на машката ракометна репрезентација на Македонија, Лино Червар, на подоготвките за Мундијалот во Франција, не ги повика голманот Борко Ристовски и столбот на одбраната Ацо Јоноски, а националниот тим го врати Филип Миркуловски.
Долгогодишните репрезентативци Борко Ристовски и Ацо Јоноски нема да играат на Светското првенство во Франција, откако селекторот Лино Червар не ги повика на подготвките кои ќе започнат на 20. декември. Покрај овие двајца кои се долгогодишни репрезнетативци на Македонија, Червар го изостави и натурализираниот Македонец Немања Прибак.
Со оваа своја одлука, да не повика двајца долгогодишни репрезентативци, Червар го започна процесот на подмладување на националниот тим.
„Го почитувам Борко, кој зад себе има одлична кариера. Реков дека доколку некој не е во репрезентацијата дека тоа не значи дека тој е лош ракометар. Го видов Ристовски на четири натпревари и сметам дека емоционално е истрошен. Репрезентацијата ќе го менува стилот на игра, често ќе играме ‘седум на шест’, поради што решив дека ова е моментот кога треба да ја направам замената. Оваа одлука не е лична, долго време беше анализирана и јас стојам зад неа“, рече Червар.
Покрај голманот на Барселона, на Мундијалот во Франција нема да патува ниту столбот на одбраната Ацо Јоноски.
„Ќе играме поагресивно во одбраната 3-2-1 или 5-1, каде до израз треба да дојде брзината. Токму промената на играта во одбраната е причината што не го повикав Јоноски. И за него сметам дека и тој е емоционално испразнет“.
Македонскиот селектор успеа во националниот тим да го врати Филип Миркуловски, кој во јуни против Чешка објави крај на репрезентативната кариера. Токму Миркуловски заедно со Дејан Манасков ќе бидат ракометарите, кои поради клупските обврски, последни ќе се приклучат на подготвките.
Лино Червар подготвките ќе ги започне со 28 ракометари, 11 од нив се дебитанти, додека конечниот список на играчи кои ќе настапат во Франција ќе го објави на 8. јануари.
Првата фаза од подогтвките репрезентацијата ќе ја спроведе во Маврово од 20. До 30. декември, а по слободните денови на 31. декември и 1. јануари, од 2. јануари ќе започне втората фаза која ќе се спроведе во Скопје.
Македонија на СП во Франција ќе игра во Ц групата во Мец, а противници ќе и бидат Тунис, Ангола, Словенија, Шпанија и Исланд./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.