Домашен
Марко Блажевски нема да плива на ОИ во Рио де Жанеиро
Пливачот Марко Блажевски нема да настапи на престојните Олимписки игри во Рио де Жанеиро, објави преку соопштение Македонскиот олимписки комитет (МОК). Блажевски, оствари Б норма за настап во Рио де Жанеиро на 200 и 400 метри мешано, но во Бразил нема да патува поради правилото на МОК, кое вели дека „еден спортист не може да учествува на две Олимписки игри со покана“.
„Иако Меѓународната пливачка федерација (ФИНА) како пливач со покана (вајлд карта) во машка конкуренција го покани и Марко Блажевски, кој имаше учество на Светското првенство во Казан 2015 година, момент кој е и критериум за добивање на покана од ФИНА, според правилата на Македонскиот олимписки комитет (“еден спортист не може да учествува на две Олимписки игри со покана“) тој нема да може да учествува на игрите во Рио.
Македонскиот олимписки комитет, во оваа насока оствари бројни консултации и разговори со релевантните одделенија и одговорни лица од Меѓународниот олимписки комитет (ИОК), вложувајќи сериозни напори сепак да се реализира учеството на Марко Блажевски. Покрај ова, Македонскиот олимписки комитет, во изминатите два олимписки циклуси (Лондон 2012 и Рио 2016) обезбеди олимписка стипендија за Марко Блажевски, во насока на исполнување на неговиот план и програма.
Заинтересираноста на МОК за учество на Марко Блажевски на Олимписките игри во Рио е повеќе од евидентна имајќи ја во предвид и обезбедената стипендија од страна на МОК, за школување на Марко Блажевски на Универзитет во САД, кој имаше соодветен пливачки тренажен програм за унапредување на спортските резултати на Марко Блажевски, но и добивање и диплома и едукација која ќе му користи во кариерата после неговата спортска кариера“, се вели во соопштението на МОК.
Македонија на ОИ во Рио де Жанеиро ќе ја претставуваат атлетичарите Ристе Пандов (100 метри) и Дрита Исљами (400 метри со пречки), пливачката Анастасија Богдановски (200 метри слободно), џудиската Катерина Николовска (-63 кг) и Нина Балабан (стрелаштво, воздушна пушка 10 метри). крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.