Кајл Кузма постигна тројка на само 0.4 секунди пред крајот на мечот за да ги „крене“ Лос Анџелес лејкерс до 124:121 победа над Денвер нагетс во драматична завршница во Орландо со која се прекина низата од три порази за „езерџиите“.

Леброн Џејмс постигна 29 поени и имаше 12 аситенции, Ентони Дејвис заврши со 27 поени, а Кузма со фантастични 25 поени. Кај Нагетси осум кошаркари имаа двоцифрен број на поени – Пи Џеј Дозиер стигна до 18, Мајкл Портер Јуниор имаше 15 поени (со 3-од-3 за тројки), а Никола Јокиќ додаде 12.

Нагетси ги одмараа своите стартери во поголемиот дел од последната четвртина, и сега со поразот остануваат на меч и пол зад Лос Анџелес клиперс на второто место на Западот на два меча пред крајот. Двата тима се среќаваат во среда.

Шампионите Торонто без своите клучни играчи стигна до 114:106 победа над Милвоки бакс. Крис Бушер имаше 25 поени и 11 скока, Мет Томас додаде 22 поени, а Норман Пауел имаше 21 поени и осмум скока.

НБА

ЛА Лејкерс – Денвер 124:121

Торонто – Милвоки 114:106

Феникс – Оклахома Сити 128:101

Далас – Јута 122:114

Мајами – Индијана 114:92

Повеќе од 120 минути фудбал во Келн, силите во четвртфиналето од ЛЕ ги одмерија Манчестер Јунајтед и ФЦ Копенхаген.

За нијанса поконкретни беа „ѓаволите“. Бруно Фернандеш од белата точка (направен беше фаул врз Марсијал) во 95 минута од првото продолжение донесе предност од 1-0 откако во регуларниот дел, по 90 минути беше 0-0.

Иако статистиката и фаворитската улога беше на страна на премиерлигашот, сепак клубот од Данска имаше свои шанси кои не ги искористи.

Мрежата од голот на голманот Јонсон првпат беше затресена во 45 минута, погоди Гринвуд. Но по ВАР асистенција голот беше поништен поради офсајд.

Во вториот дел на двапати „ѓаволите“ ја погодуваа конструкцијата на голот на Копенхаген, а одлични голмански вештини презентираше и самиот Јонсон, па ја држеше неизвесноста во регуларниот дел.

Мораше да се играат продолженија, двапати по 15 минути за да се одреди полуфиналистот.

По 105 минути игра, откако Јунајтед веќе поведе од пенал (Фернандеш 95 минута) статистиката покажуваше дека фудбалерите на англискиот клуб упатиле 26 удари кон голот на Копенхаген, а од нив 14 во рамките на голот. Јонсон одличен, со 13 одбрани.

Копенхаген во таа статистика се на нула, но дефанзивците на Јунајтед на неколкупати го спасуваа својот гол од непосредна близина.

Во второто продолжение данскиот тим падна на физички план, па олеснета беше задачата на „ѓаволите“.

Манчестер во полуфиналето на ЛЕ го чека подобриот од утрешното четвртфинале Вулверхемптон – Севилја.

Фудбалерите на милански Интер први го „визираа“ полуфиналето во Лигата на Европа на УЕФА. Предмалку пулените на Антонио Конте го совладаа во Германија, на стадионот во Диселдорф тимот на Баер Леверкузен со 2-1.

Трите гола беа постигнати во првото полувреме.

На првиот гол за водство на гостинот од Италија се чекаше до 15 минута. Убав гол од дваесетина метри постигна Барела откако претходно, во текот на акцијата Лукаку одлично се загради и биеше, но беше изблокиран.

Токму Белгиецот во 21 минута на ист начин, со одлична игра без топка стигна до погодок, за 2-0.

Сепак, кога се очекуваше фудбалерите на Баер психолошки да паднат, тука беше Каи Хаверц кој погоди за 2-1 во 24 минута.

Оттогаш до крајот на мечот иако Баер ја имаше иницијативата, сепак Интер беше тимот кој имаше повеќе закани кон противничкиот гол. Во 90 минута судијата покажа на белата точка за „сино-црните“, но по ВАР асистенција пеналот беше поништен (слична можност за зголемување на водството на Интер му беше ускратена и во првиот дел) и остана актуелниот резултат.

Во полуфиналниот меч, противник на екипата од Милано ќе биде подобриот од дуелот Базел – Шахтјор Доњецк што се игра утре од 21 часот.