Легендата на Вест хем, Италијанецот Паоло ди Канио открива дека ја одбил понудата од Сер Алекс Фергусон за трансфер во тогаш доминантниот Манчестер јунајтед во 2001 година поради верноста кон навивачите на „чеканите“.

Ди Канио пристигна во Вест хем во 1999 година и стана капитен на клубот, по што иако тогаш имаше 33 години го привлече интересот на Фергусон, кој му се јавил на Божиќ во 2001 година.

„Искрено, мислев дека е шега на еден мој пријател од Италија. Потоа стомакот ми се сврте, бидејќи помислив можеби сум поголем од тоа што си мислам. Те бараат Манчестер јунајтед. Неколку моменти се чувствував голем и силен. Ми беше чудно да му речам не на Сер Алекс. Му кажав: ’Илјада пати Ви благодарам, но не можам. Вест Хем се моето семејство кое ме прифати во најтешките моменти во мојот живот, а сега сум капитен’. Тој одговори: ’Паоло, само почит за ова. Ги сакам луѓето кои се такви и навистина си човек каков што верував дека си’“, открива Ди Канио.

Во тој момент, Јунајтед беа актуелни шампиони и најуспешниот тим во Премиер лигата со 7 титули во 9 години, но Ди Канио инсистира дека не жали за одлуката.

„На крајот останав во Вест хем и не жалам за тоа, иако Јунајтед беа најдобри, освоија Лига на шампиони. Не би ги земал тие титули за четири и пол години во кои го носев дресот на Вест хем“, додава Ди Канио.

Претседателот на УФЦ, Дејна Вајт го исполни ветувањето и следниот викенд ќе има УФЦ 249 на „индијанска територија“ во Калифорнија без првата ѕвезда Хабиб Нурмагомедов, но со огромен број на правила кои мораат да се почитуваат.

Шоуто на 18 април според сите вести ќе се оддржи во „Таки палас“ казиното во централна Калифорнија, територија која не е официјално под власт на американската федерална влада за да се избегнат сите ограничувања на движењето и правилата за изолација кои важат во поголемиот дел на САД.

Таканаречените „племенски територии“ не потпаѓаат под федералната власт на САД, и затоа честопати на нивна територија се градат коцкарници со кои се заработуваат пари за племето и не се плаќа данок на федералната власт.

Главниот меч на УФЦ 249 ќе биде тој помеѓу Тони Фергусон и замената Џастин Гетџи, откако Хабиб Нурмагомедов „заглави“ во Русија.

Меѓутоа и тука ќе треба да се почитуваат голем број на правила:

– Само УФЦ и персоналот кој работи во казиното ќе имаат пристап до објектот и сите ќе бидат подвргнати на детални медицински тестови.

– Во собите на фајтерите ќе бидат поставени ленти за тренинг и подвижни сауни, додека надвор од казиното ќе биде изградена патека за трчање.

– Фановите нема да бидат присутни, но ќе има „ограничен“ број на медиуми.

– Собарите и собарките нема да имаат пристап до собите по влегувањето на фајтерите. Храната и сите потребни работи ќе им се доставуваат пред врата.

– УФЦ коментаторите најверојатно ќе бидат во иста соба, но не директно до откагонот.

– Ќе се практикува „социјално дистанцирање“ и во ниту еден момент нема да има повеќе од 10 луѓе во иста соба.

– Бројот на лекари кои работат на еден УФЦ настан ќе биде удвоен.

Бундеслигашот Шалке побара од носителите на сезонски билети да се откажат од своето право на попуст со што финансиски би помогнале на клубот кој е во криза по пандемијата на корона вирусот.

Од Шалке се пожалија дека се во потенцијално „егзистенцијално критична финансиска ситуација“ по паузата на БУндеслигата од март и побараа фановите да направат нешто за својот клуб.

„Има многу понуди од фановите за одбивање на попустот за сезонските билети кои веќе се купени и тоа го сметаме како одличен гест. Секој ваков гест има огромно значење за финансиската ликвидност на клубот и обезбедувањето на иднината. Клубот во моментов е во егзистенцијално критична финансиска ситуација“, велат од Шалке.

Тие објавија дека ќе подарат специјален дрес за секој носител на сезонски билет кој нема да ги побара назад парите.